Heburuw 5 - LAYIDUKURA

An dɛmɛbaga

¹ Sarakalasebagaw kuntigiba bɛ woloma ka bɔ jama cɛma ka sigi ka jama ni Ala cɛ koow nyanabɔ, ani ka sarakaw ni sɔnnifɛnw di Ala ma kojuguw yafako la.

² Mɔgɔ minw tɛ foyi lɔn n'u bɛ to ka fili, a bɛ se k'olu dɛmɛcogo lɔn. Bari ale fana bɛ dɛsɛ.

³ O kama, a ka kan ka sarakaw bɔ Ala ye, ale ni jama ka kojuguw kɔsɔn.

⁴ Mɔgɔ t'o tɔgɔ nin sɔrɔ a yɛrɛ ma, nga Ala le b'o d'a ma i n'a fɔ Arɔn ta kɛra cogo min na.

⁵ O cogo la, a ma kɛ i n'a fɔ ko Krista le ye sarakalasebaga kuntigibaya tɔgɔ la a yɛrɛ kan dɛ. Nga Ala min y'a fɔ a ye ko: “I ye ne Deen ye. Ne le y'i wolo bii,” ale le y'a d'a ma.

⁶ Ala y'a fɔ fana ko: “Ele, i kɛra sarakalasebaga ye waati bɛɛ Mɛlikisedɛki cogo la.”

⁷ Yezu tun bɛ dinyɛ na tuma min na, Ala min bɛ se k'a kisi saya ma, a ye ale dali kosɛbɛ ni mankanba ni nyaji ye. A ka yɛrɛmajigi kɔsɔn, a ka dalili minɛna.

⁸ A n'a ka Aladenya bɛɛ, a ye sɔnna Ala sago la a ka tɔɔrɔ seen fɛ.

⁹ O le y'a to a ka koo bɛɛ dafara o cogo la tuma min na, mɔgɔ minw bɛɛ bɛ mɛnni kɛ a fɛ, a kɛra olu bɛɛ kisibaga ye tuma bɛɛ.

¹⁰ Bari Ala yɛrɛ le y'a kɛ sarakalasebaga kuntigiba ye i n'a fɔ Mɛlikisedɛki.

Kretinyɛ kɔgɔnin

¹¹ Koo caaman bɛ yen k'a fɔ sarakalasebagaw kuntigiba nin koo la. Nga a bɛna fɔ cogo min na, n'aw b'a faamu, o le ka gwɛlɛ, bari aw tɛ koo faamu joona.

¹² Kabini tumajan, aw tun ka kan ka kɛ tɔw kalanbagaw ye. Nga Ala ka koo minw faamu man gwɛlɛ, aw b'a fɛ mɔgɔ k'aw kalan o koo la halibi. Aw kɛra dennyɛninw ye minw bɛ siin min. Aw tɛ se dumuni gwiliman kɔrɔ!

¹³ Sinminbaga ye denmisɛn ye, a tɛ se ka konyuman ni kojugu lɔn ka bɔ nyɔgɔn na.

¹⁴ Nga mɔgɔkɔrɔbaw bɛ dumuni gwiliman dumu. U delila o la minkɛ, u ye hakili sɔrɔ ka nyumaman ni juguman lɔn ka bɔ nyɔgɔn na.