Heburuw 3 - LAYIDUKURA

Krista lɔyɔrɔ ka bon ni Musa ta ye

¹ O kɔsɔn, n badenw, aw minw kɛra Ala taw ye n'a y'aw wele sini hɛrɛ kama, aw ka Yezu filɛ, ale min ye Ala ka ciden, ni sarakalasebagaw kuntigiba ye Ala ka sira la an b'o min koo fɔ.

² Yezu kɛra kantigi ye Ala nyakɔrɔ a ka baara bɛɛ la i n'a fɔ Musa tun kɛra kantigi ye a ka baara bɛɛ la Ala ka mɔgɔw cɛma cogo min na.

³ Bonlɔbaga bɛ tɔgɔ sɔrɔ ka tɛmɛ a ka boon lɔnin kan cogo min na, o cogo kelen na, Yezu lɔyɔrɔ ka bon ni Musa ta ye.

⁴ Ayiwa, boon bɛɛ n'a lɔbaga lo, nga fɛɛn bɛɛ lajɛnnin danbaga ye Ala le ye.

⁵ Musa kɔni kɛra kantigi ye a ka baara bɛɛ la Ala ka soo kɔnɔ. Ala ka dalaminɛ tun lo. Nga Krista min ye Ala Dencɛ ye, ale kɛra kantigi ye Ala ka soo kunna.

⁶ An y'an jigi la fɛɛn min kan, n'an y'an jaa gwɛlɛya ka la o la kosɛbɛ, anw bɛ kɛ a ka somɔgɔw ye.

Ala ka hɛrɛ sɔrɔko

⁷ O kama, Nii Senuman y'a fɔ ko: “N'aw ye Ala kumakan mɛn bii,

⁸ aw kana tulogwɛlɛya kɛ i n'a fɔ aw faaw murutira Ala ma loon min na kongokolon kɔnɔ, k'a kɔrɔbɔ.

⁹ O yɔrɔ la, aw faaw murutira ne Ala ma ka n kɔrɔbɔ. K'a sɔrɔ ne ye koo min bɛɛ kɛ saan bi naani kɔnɔ, u y'o ye.

¹⁰ O le y'a to ne dimina u kɔrɔ, n y'a fɔ ko nunu kɔni bɛ to fili la tuma bɛɛ, u ma ne ka sira lɔn fɔlɔ.

¹¹ Dimikojugu fɛ, ne y'a latigɛ ko u tɛna sɔrɔ ka don n ka lafinyɛyɔrɔ la.”

¹² O tuma na n badenw, aw bɛɛ k'aw yɛrɛ minɛ aw si kana kɛ mɔgɔjugu ye, jigitanya kan'a kɛ aw bɛ ban Ala la.

¹³ Nga aw ka nyɔgɔn ladi loon o loon hali n'o ka kan ka kɛ waatijan koo ye, o min bɛ fɔ ko bii, janko mɔgɔ si kana tulogwɛlɛya kɛ ka fili kojugu kɔsɔn.

¹⁴ An daminɛna ni jigi min ye, n'an tora o kan fɔɔ a daan na, o tuma na, an ye Krista taamanyɔgɔnw ye.

¹⁵ A fɔra Ala ka kuma na ko: “N'aw ye Ala kumakan mɛn bii, aw kana tulogwɛlɛya kɛ i n'a fɔ aw faaw murutira Ala ma cogo min na.”

¹⁶ Mɔgɔ jumɛnw le ye Ala kumakan mɛn ka muruti? Musa bɔra ni minw bɛɛ ye Ezipiti jamana na, olu lo.

¹⁷ Ala dimina jonw le kɔrɔ saan bi naani kɔnɔ? Minw ye kojugu kɛ n'u suuw tora kongokolon kɔnɔ, olu lo.

¹⁸ A ko jonw le tɛna don ale ka yɔrɔ labɛnnin na ka lafinyɛ? Olu mɔgɔmurutinin nunu tɛ wa?

¹⁹ O la, an b'a yera fana k'u ka lanabaliya kɔsɔn, u ma se ka don.