Galasikaw 5 - LAYIDUKURA

Pɔli ka ladili Galatikaw ma u ka hɔrɔnyali koo la

¹ Krista y'an hɔrɔnya janko an ka kɛ hɔrɔnw ye sɛbɛ la, o la, aw ye jija, aw kana tila ka don jɔnya la tugu.

² Ayiwa, ne Pɔli yɛrɛ b'a fɔ aw ye ko n'aw ye aw yɛrɛ kɛnɛkɛnɛ, Krista tɛna foyi nya aw ye tugu.

³ Ne bɛ tila k'a fɔ tugu ko ni mɔgɔ o mɔgɔ min y'a yɛrɛ kɛnɛkɛnɛ, a kɛra wajibi ye o tigi ma ka sariya bɛɛ labato.

⁴ Aw minw b'a fɛ ka tilenninya sɔrɔ Ala nyakɔrɔ sariya barika la, aw faranna ka bɔ Krista la. Ala ka nɛɛma t'aw kan tugu.

⁵ An kɔni jigi b'a la ko Nii Senuman barika la, Ala bɛna an jati mɔgɔtilenninw ye, an b'o le kɔnɔna.

⁶ N'an lanin bɛ Yezu Krista la, i kɛnɛkɛnɛna wo, walima i ma kɛnɛkɛnɛ wo, o si tɛ foyi ye. Min ye koo kuun ye, o ye jigi ye, min b'a to n'an bɛ baara kɛ kanuya kɔsɔn.

⁷ Aw ka koo tun nyana. Jon le ye aw bɔ tinyɛsira kan?

⁸ U ye fɛɛn min kɛ k'aw bali n'a ye, o ma bɔ aw welebaga Ala fɛ.

⁹ Kofitini le bɛ koba wili.

¹⁰ Ne kɔni, ne jigi bɛ Matigi kan aw koo la ko cogo o cogo, aw tɛna miiriya wɛrɛ ta, nga mɔgɔ min b'aw nyagami, a kɛra mɔgɔ o mɔgɔ, o tigi bɛn'a ta ye.

¹¹ N balimaw, n'a tun kɛra ko ne bɛ kɛnɛkɛnɛko le waajuli kɛra halibi, k'a fɔ ko a kɛra wajibiko ye, mun na u bɛ ne tɔɔrɔ tugu? Krista sayako lɔgɔ kan, ne b'o min waajuli kɛra, o tun tɛna kɛ baasi ye.

¹² Mɔgɔ minw b'aw nyagami, olu k'u ta bɛɛ tigɛ!

Ladili min kɛra taamacogo faan fɛ

¹³ N balimaw, aw welela hɔrɔnyali le kama. O hɔrɔnyali nin kana kɛ sababu ye aw b'aw farikolo sago kɛ. Nga aw ka nyɔgɔn kanu ka nyɔgɔn dɛmɛ.

¹⁴ Bari sariya kuma bɛɛ bɛ sɔrɔ kuma kelen nin le kɔnɔ ko: “I k'i mɔgɔnyɔgɔn kanu i n'a fɔ i b'i yɛrɛ kanu cogo min na.”

¹⁵ Nga n'aw tora nyɔgɔnnyimi na ni nyɔgɔnmandimini na i n'a fɔ kongosogow, aw k'aw yɛrɛ kɔlɔsi. N'o tɛ, aw bɛna nyɔgɔn ban.

¹⁶ Ne b'a fɔ aw ye ko aw k'aw yɛrɛ to Nii Senuman bolo ka mɛnni kɛ a fɛ. O cogo la, aw tɛna farisogo sago kɛ tugu.

¹⁷ Bari farisogo koo, ni Nii Senuman koo bɛ nyɔgɔn kɛlɛ. U tɛ bɛn. O kama, n'aw b'a fɛ ka koo min kɛ, aw tɛ se k'o kɛ.

¹⁸ Ni Nii Senuman le bɛ baara kɛ i kɔnɔ, e tɛ kɛ sariya bolo tugu.

¹⁹ Farisogo sago ye min ye, an b'o lɔn, o ye: Nyamɔgɔya, nɔgɔtɔya, ni kakalaya,

²⁰ josɔnko, ni subagaya, ani juguya, kɛlɛko ni keliya, dimi ni sɔsɔli, ani tilanni, ani ka faran ka kɛ jɛnkulu jɛnkulu,

²¹ wasabaliya, dɔrɔtɔya, ni nugubatɔya, ani o nyɔgɔnna koow. Ne bɛ kɔn k'o fɔ aw ye, i n'a fɔ n delila k'a fɔ aw ye cogo min na ko mɔgɔ minw b'o koow kɛ, k'olu tɛna don arijana na fewu.

²² Nga Nii Senuman bɛ fɛɛn minw di, o ye nin ye: Kanuya, nisɔndiya, hɛrɛ, munyuli, nyumanya, hinɛ, tilenninya, sabali, ni yɛrɛminɛ.

²³ Sariya t'o koo nunu kɛlɛ.

²⁴ Mɔgɔ minw sɔnna Krista ma, olu ye farisogo n'a ka sago bɛɛ ye k'o to yen.

²⁵ Ni Nii Senuman le b'an fɛ, an ka taama ka kɛnyɛ ni Nii Senuman sago ye kɛ.

Krista ka sariya koo

²⁶ An kana kɛ tɔgɔnyinilaw ye gwansan, ka to k'an tɔnyɔgɔnw darabɔ. An nyaa kana bɔ an tɔnyɔgɔnw ka fɛɛnw na.