Galasikaw 4 - LAYIDUKURA

Jɔnya banko

¹ Ne b'a fɛ ka min fɔ, o ye nin ye: Ni deen min ka kan k'a facɛ cɛɛn ta, k'a to denmisɛnya la, ale ni jɔɔn bɛɛ ka kan, hali ni fɛɛn bɛɛ y'a ta ye cogo o cogo.

² A bɛ to a marabagaw bolo, fɔɔ ka taa se a facɛ ka waati latigɛnin ma.

³ Anw fana, an tun bɛ i n'a fɔ denmisɛnw waati min na, an tun bɛ tugura dinyɛ koow kɔ, ka kɛ u ka jɔɔnw ye.

⁴ Nga Ala ka waati latigɛnin dafara tuma min na, a y'a Dencɛ ci, muso y'a wolo sariya kɔrɔ,

⁵ waasa mɔgɔ minw tun bɛ sariya bolo, a k'olu hɔrɔnya janko an ka se ka kɛ Ala deenw ye.

⁶ Aw ye Ala deenw ye sɛbɛ la. Ala yɛrɛ y'a Dencɛ Nii don an kɔnɔ, ale min b'a to an bɛ Ala wele ko an Faa.

⁷ O cogo la, e tɛ jɔɔn ye tugu, nga Ala deen. E y'a deen ye, o la, Ala bɛna niyɔrɔ d'i ma i n'a fɔ a b'a di a ka deen tɔw ma cogo min na fana.

Pɔli bɛ kɔrɔtɔ Galatikaw koo la

⁸ Fɔlɔfɔlɔ, aw tun tɛ Ala lɔn tuma min na, aw tun bɛ fɛɛn wɛrɛw bato ka kɛ u ka jɔɔnw ye minw tun tɛ Ala ye.

⁹ Nga sisan aw ye Ala lɔn, walima Ala le y'aw lɔn. Fɛɛn minw tɛ foyi nya, a kɛra di aw bɛ kɔsegi ka kɛ olu ka jɔɔnw ye tugu?

¹⁰ Aw bɛ janto loonw, ni kalow la, ani waatiw ni saanw na kosɛbɛ ka olu labato.

¹¹ Sisan, ne bɛ siran ko, ne ye baara min kɛ aw cɛma, o kana kɛ gwansan ye.

¹² Ne balimaw, ne b'aw dali ko aw k'aw yɛrɛ kɛ i n'a fɔ ne bɛ cogo min na, bari ne ye n yɛrɛ kɛ i n'a fɔ aw bɛ cogo min na, aw ma kojugu si kɛ ne la.

¹³ Aw y'a lɔn ko ne ka bana koo le kɛra sababu ye ne ka sɔrɔ ka kibaru diman fɔ aw ye.

¹⁴ Ka ne to o bana bolo, o tun ye kɔrɔbɔli ye aw ma, nga o bɛɛ n'a ta, ne nigɛ ma bɔ aw la, aw ma ne dɔgɔya fana. Nga aw ye ne minɛ i n'a fɔ mɛlɛkɛ, walima Yezu Krista yɛrɛ.

¹⁵ Aw minw tun nisɔndiyara kosɛbɛ, aw ka nisɔndiya nin tora min? Ne b'a fɔ tinyɛ na ko n'aw tun bɛ se k'aw nyaa wɔgɔbi k'o di ne ma, aw tun bɛna o kɛ.

¹⁶ Sisan ne kɛra aw jugu ye bari ne bɛ tinyɛ fɔra aw ye wa?

¹⁷ Mɔgɔ nunu jijanin bɛ aw kɔsɔn cogo min na, u ka miiri ma nyi, u b'a fɛ k'aw faran ka bɔ ne la, waasa u ka se k'u yɛrɛ diya bɔ.

¹⁸ N'aw bɛ jija konyuman kɛli kama tuma bɛɛ, o ka nyi. A kana kɛ ne nyanako dama ye.

¹⁹ Ne deenw halibele, ne bɛ tɔɔrɔ munyuna aw kɔsɔn, tɔɔrɔ min ni muso jigibagatɔ ta ye kelen ye, janko Krista ka koo ka sigiyɔrɔ sɔrɔ aw kɔnɔ.

²⁰ A tun ka di ne ye ka sɔrɔ aw cɛma sisan yɛrɛ, ka se ka ne ka kuma fɔcogo yɛlɛma, bari ne hakili nyagaminin lo aw kɔsɔn.

Layidu fila ka koo

²¹ Aw minw b'a fɛ ka to sariya kɔrɔ tugu, aw ka ne jaabi. Min fɔra Ala ka kuma na, aw m'o mɛn wa?

²² A fɔra Ala ka kuma na ko Ibrayima tun ye deen fila sɔrɔ, kelen sɔrɔla jɔnmuso fɛ, kelen fana sɔrɔla hɔrɔnmuso fɛ.

²³ Deen min sɔrɔla jɔnmuso fɛ, ale tun sɔrɔla ka kɛnyɛ ni farisogo sago ye, nga deen min sɔrɔla hɔrɔnmuso fɛ, ale tun ye layidu dafa deen ye.

²⁴ O koo nin kɔrɔ ka bon, bari muso nunu kɛra layidu fila dafananw ye. Layidu min sɔrɔla Sinayi kulu kan, ale bɛ mɔgɔ kɛ jɔɔn ye. O ye Agari ye.

²⁵ Agari ye Sinayi kulu ye min bɛ Arabi jamana na. Agari fana bɛ i n'a fɔ Zeruzalɛmu min bɛ yen bii, bari ale n'a deenw ye jɔɔnw ye.

²⁶ Nga Zeruzalɛmu min bɛ sankolo la, ale ye hɔrɔn ye, ale le y'an bamuso ye.

²⁷ Bari a fɔra Ala ka kuma na ko: “E muso min ye wolobali ye, e ka nisɔndiya. E le min ma deen wolo tɔɔrɔ lɔn, e ka nisɔndiya kosɛbɛ, bari muso min tun tɛ wolo, ale ka denmisɛnw bɛna caya ka tɛmɛ baaramuso deenw kan.”

²⁸ N balimaw, aw kɔni aw ye layidu deenw ye i n'a fɔ Isiyaka.

²⁹ Deen min sɔrɔla ka kɛnyɛ ni farisogo sago ye, ale tun bɛ Nii Senuman deen tɔɔrɔ cogo min na, a b'o cogo kelen na sisan fana.

³⁰ Nga Ala ka kuma ye mun le fɔ? A ko: “I ka jɔnmuso n'a deen gwɛn, bari jɔnmuso deen man kan ka jɛn cɛɛn kan ni hɔrɔnmuso ka deen ye.”

³¹ O cogo la ne balimaw, an tɛ jɔnmuso ka deenw ye, nga hɔrɔnmuso ka deenw.