Galasikaw 3 - LAYIDUKURA

Galatikaw ka nalomanya

¹ Aw Galatika nalomanw, mɔgɔ jumɛn le y'aw nyaa nyini ten? K'a sɔrɔ Yezu Krista ka sayako lɔgɔ kan fɔra ka gwɛ aw ye kosɛbɛ.

² Ne b'a fɛ ka fɛɛn min faamu aw fɛ, o ye nin ye: Aw ye Nii Senuman sɔrɔ aw ka sariya labatoli barika la wa, walima aw sɔnna kibaru diman ma minkɛ, o kɔsɔn lo?

³ Aw ka nalomanya nin sera o bɛɛ ma wa? Aw daminɛna ni Nii Senuman ye, aw b'a fɛ k'o koo laban adamadenya la wa?

⁴ Aw y'o koo ye k'o lɔn gwansan wa? N'o kɛra gwansan ye.

⁵ Ala min b'a ka Nii Senuman d'aw ma ani ka kabakow kɛ aw cɛma, ale b'o kɛ aw ka sariya labatoli le kama wa? walima aw sɔnna kibaru diman ma minkɛ, o le kɔsɔn?

Ala b'an jati mɔgɔtilenninw ye jigi barika la

⁶ A fɔra Ala ka kuma na ko: “Ibrayima lara Ala la minkɛ, o la a y'a jati mɔgɔtilennin ye.”

⁷ Aw k'a lɔn ko mɔgɔ minw lara kibaru diman na, olu le ye Ibrayima deenw ye.

⁸ O la, Ala tun kɔnna ka kibaru diman nin fɔ ko: “Siya bɛɛ bɛna duba sɔrɔ i barika la,” bari Ala tun y'a latigɛ ko a bɛna siya wɛrɛw jati mɔgɔtilenninw ye jigi barika la.

⁹ Ibrayima lara Ala la, o la, a ye duba sɔrɔ. O cogo la, mɔgɔ o mɔgɔ mana la Ala la, o tigi bɛ duba sɔrɔ fana.

¹⁰ Mɔgɔ minw jigi bɛ sariya kan, olu bɛɛ danganin lo. Bari a fɔra Ala ka kuma na ko: “Mɔgɔ minw tɛ sariya bɛɛ labato, olu bɛɛ danganin lo.”

¹¹ A fana gwɛnin lo ko Ala nyakɔrɔ mɔgɔ si tɛ se ka jati mɔgɔtilennin ye sariya barika la, bari a fɔra Ala ka kuma na ko: “Mɔgɔ min y'a jigi la Ala kan, Ala ka sɔrɔ k'a jati mɔgɔtilennin ye, o tigi bɛna kisi.”

¹² Nga sariya ta, ni jigi ta tɛ kelen ye. A fana fɔra Ala ka kuma na ko: “Mɔgɔ min bɛ sariya bɛɛ labato, o tigi bɛ kisi o le barika la.”

¹³ A fɔra Ala ka kuma na ko ni mɔgɔ o mɔgɔ dulonna yiri la, k'o tigi ye dangaden ye. Krista yɛrɛ sɔnna o ma an kɔsɔn, waasa k'an kisi sariya ka danga ma.

¹⁴ O cogo la, Ala tun ye hɛrɛ min koo fɔ Ibrayima ye, o ka se ka kɛ siya wɛrɛw ye Yezu Krista barika la, ani an ka se ka Nii Senuman sɔrɔ jigi barika la Ala tun y'o layidu min ta.

Sariya ka baara

¹⁵ N balimaw, ne bɛ nin koo kɛnyɛ ni adamadenya ye. Ni mɔgɔ dɔ y'a ka koo dɔ latigɛ ka nya sanni a ka sa, mɔgɔ wɛrɛ tɛ se k'o cɛn walima ka dɔ fara o kan.

¹⁶ Ala tun ye layiduw ta Ibrayima n'a kɔmɔgɔ le ye. O kɔmɔgɔ nin ye Krista le ye. O la, a tun y'a fɔ ko: “E n'i kɔmɔgɔ.” Nga a m'a fɔ ko: “E n'i kɔmɔgɔw.”

¹⁷ Ne b'a fɛ ka fɛɛn min fɔ, o ye nin ye: Ala ye layidu ta min tɛna yɛlɛma. Saan kɛmɛ naani ni bi saba tɛmɛnin kɔ sariya min nana sigi, ale tɛ se ka layidu nin yɛlɛma fewu.

¹⁸ Bari Ala bɛ fɛɛn min layidu ta, n'ale bɛ sɔrɔ sariya labatoli barika la, o ma kɛ layiduko ye tugu. Nga Ala ka layidu le kɔsɔn, a ye nɛɛma kɛ Ibrayima ye.

¹⁹ Sariya do sigira mun le kama sa? A sigira janko kojugu ka lɔn, yan ni Ibrayima Kɔmɔgɔ nin ka na. Mɛlɛkɛw le y'o sariya nin di mɔgɔ dɔ le barika la.

²⁰ Nga ni dɛmɛbaga koo bɛ fɔ yɔrɔ min na, o tɛ mɔgɔ kelen koo ye tugu, Ala do ye kelen ye.

²¹ O tuma na, sariya ni Ala ka layidu bɛ nyɔgɔn kɛlɛ wa? Ayi, ni sariya tun dira min bɛ se k'a to mɔgɔ bɛ kisi, o tuma na mɔgɔ fana tun bɛ se ka jati mɔgɔtilennin ye sariya barika la kɛ.

²² A fɔra Ala ka kuma na ko mɔgɔ bɛɛ bɛ kojugu ka fanga kɔrɔ, waasa mɔgɔ minw lara Yezu Krista la olu ka Ala ka layidu nɛɛma sɔrɔ.

²³ Mɔgɔw k'u jigi la Krista kan, yan ni o waati ka se, an tun bɛ sariya bolo fɔlɔ, k'o waati makɔnɔ.

²⁴ O cogo la, sariya tun kɛra an kɔlɔsibaga ye, ka Yezu Krista makɔnɔ, waasa an ka se ka jati mɔgɔtilenninw ye jigi barika la.

²⁵ Sisan lanaya waati le bɛ yen, an tɛ kɔlɔsibaga nin bolo tugu.

²⁶ Bari aw minw lara Yezu Krista la, aw bɛɛ ye Ala deenw ye jigi barika la.

²⁷ Aw minw bɛɛ batizera waasa ka jɛn ni Krista ye, aw sɔnna ka jɛn n'a ye ka kɛ kelen ye.

²⁸ O cogo la, Zuwifu ni siya wɛrɛ bɛɛ ye kelen ye, jɔɔn ni hɔrɔn fana ye kelen ye, cɛɛ ni muso bɛɛ ye kelen ye. Bari aw bɛɛ kɛra kelen ye Yezu Krista barika la.

²⁹ N'aw kɛra Krista ta ye, aw ye Ibrayima kɔmɔgɔw ye, aw fana bɛna niyɔrɔ sɔrɔ Ala ka layidu la.