Galasikaw 2 - LAYIDUKURA

Pɔli ni ciden tɔw ka nyɔgɔn kunbɛnko

¹ Saan tan ni naani tɛmɛna, ne ni Barinabasi sɔrɔla ka taa Zeruzalɛmu tugu. Titi fana taara n'an ye.

² Ala tun ye koo dɔ yira ne la, o seen fɛ ne tun taara yen. Ne tun bɛ kibaru diman min fɔ siya wɛrɛw cɛma, ne y'o koo fɔ u ye. Ne y'o nyafɔ fana nyamɔgɔw ye danna, janko ne ye baara minw kɛ ka ban, ani ne bɛ minw kɛra, o kana kɛ gwansan ye.

³ Nga n taamanyɔgɔn Titi min tun ye siya wɛrɛ ye, a tun ma kɛ wajibi ye ale ka kɛnɛkɛnɛ.

⁴ Nga an balimakolon dɔw le tun b'a fɛ a ka kɛnɛkɛnɛ olu minw farala an kan nanbara kɔsɔn. An ye hɔrɔnyali min sɔrɔ Yezu Krista fɛ, u tun b'a fɛ k'o cogo lɔn, k'an bɔ o la k'an don jɔnya la.

⁵ An ma sɔn o mɔgɔ nunu ka fɔta ma tuma si waasa kibaru diman o min ye tinyɛ ye, o kana yɛlɛma aw kɔsɔn.

⁶ Hali mɔgɔ minw tun bɛ jati nyamɔgɔw ye, o n'u ka nyamɔgɔya bɛɛ, ne tun t'o jati, bari Ala fana tɛ adamadenya jati. O nyamɔgɔ nunu ma foyi fɔ ne ye fana.

⁷ Nga olu y'a faamu ko Ala ye kibaru diman fɔ baara kalifa ne ma siya wɛrɛw cɛma, i n'a fɔ a y'a kalifa Piyɛri fana ma cogo min na Zuwifuw cɛma.

⁸ Bari Ala min tun ye Piyɛri kɛ ciden ye Zuwifuw cɛma, ale Ala kelen le ye ne fana kɛ ciden ye siya wɛrɛw cɛma.

⁹ Zaki ni Piyɛri ani Zan olu minw tun bɛ jati kosɛbɛ, olu fana y'a lɔn ko Ala ye nɛɛma kɛ ne ye. U y'u bolo don ne ni Barinabasi bolo la, k'a yira ko an bɛɛ kɛra baarakɛnyɔgɔnw ye, waasa an ka taa siya wɛrɛw fɛ, olu ka taa Zuwifuw fɛ.

¹⁰ U y'a nyini an fɛ ko an ka kan k'an janto dɛsɛbagatɔw la Ala ka jama cɛma, ne y'o le kɛ fana.

Pɔli bɛ Piyɛri jalaki Antiyɔsi

¹¹ Piyɛri nana Antiyɔsi tuma min na, ne y'a jalaki mɔgɔ bɛɛ nyana, bari a tun ye koo dagabali le kɛ.

¹² Yan ni Zaki ka cidenw ka na, ale Piyɛri tun bɛ to ka dumuni kɛ ni siya wɛrɛw ye. Nga o ciden nunu sera dɔrɔn, a faranna u la Zuwifuw nyasiran kɔsɔn.

¹³ Zuwifu minw lara Krista la, olu fana tugura ale kɔ a ka nanbarantɔya la, ani Barinabasi fana.

¹⁴ Ne y'a ye tuma min na k'u tɛ taamana ka kɛnyɛ ni kibaru diman ye, o min ye tinyɛ ye, ne tilenna k'a fɔ Piyɛri ye mɔgɔ bɛɛ nyana, ko: “E min ye Zuwifu yɛrɛ yɛrɛ ye, e do y'i yɛrɛ minɛ i n'a fɔ siya wɛrɛ, mun na e bɛ tila ka siya wɛrɛw karaba k'olu ka kɛ i n'a fɔ Zuwifu?”

¹⁵ An kɔni, an wolola Zuwifuya la, an ma kɛ siya wɛrɛw ye olu minw bɛ jati kojugukɛlaw ye.

¹⁶ An b'a lɔn ko mɔgɔ si tɛ se ka jati mɔgɔtilennin ye sariya labatoli fɛ, nga fɔɔ ni min lara Yezu Krista la. O la, an lara Yezu Krista la fana, waasa an ka se ka jati mɔgɔtilenninw ye o lanaya barika la, a kana kɛ sariya labatoli barika la, bari mɔgɔ si tɛ se ka jati mɔgɔtilennin ye sariya labatoli barika la.

¹⁷ K'an to tilenninyanyini na Krista barika la, n'a sɔrɔla ko an ye kojugukɛlaw ye, o b'a yira k'o bɔra Krista la wa? Ayi dɛ!

¹⁸ Bari ni ne yɛrɛ ye fɛɛn dɔ cɛn ka tila k'a lalaga, ne yɛrɛ le b'a yira ko ne ye kojugu kɛ.

¹⁹ Ne kɔni, sariya faan fɛ ne sanin lo ale sariya yɛrɛ sababu la, waasa ne ka kɛ mɔgɔ nyanaman ye Ala faan fɛ. Ne ni Krista an fila bɛɛ sara nyɔgɔn fɛ lɔgɔ kan.

²⁰ Hali n'aw y'a ye ko ne bɛ nii na halibele, o tɛ ne yɛrɛ sababu ye, o ye Krista ka sababu ye. Bari n'aw y'a ye ko ne nyanaman lo farisogo la, o kɛra Ala Dencɛ barika la, ne ye n jigi la o min kan. A ye ne kanu fɔɔ k'a yɛrɛ di ne kɔsɔn.

²¹ N'a kɛra ko mɔgɔ bɛ se ka jati mɔgɔtilennin ye sariya labatoli fɛ, Krista ka saya koo kɛra gwansan ye. Ne tɛna sɔn ka ban Ala ka nɛɛma na.