Filipikaw 1 - LAYIDUKURA

Foli

¹ Ne Pɔli ani Timote, Yezu Krista ka jɔɔnw, an bɛ nin sɛbɛ ci aw ma, aw minw kɛra Ala ka mɔgɔw ye Filipi dugu kɔnɔ Yezu Krista barika la, an b'a ci aw ka nyamɔgɔw n'u dɛmɛbagaw ma fana.

² An Faa Ala, n'an Matigi Yezu Krista ka nɛɛma ni hɛrɛ kɛ aw ye.

Pɔli bɛ Ala dali Filipi kretinyɛw ye

³ Tuma o tuma ni ne hakili jigira aw koo la, ne bɛ barika la n ka Ala ye.

⁴ Ni ne bɛ Ala dali aw ye tuma min na, ne b'o kɛ ni nisɔndiya ye tuma bɛɛ,

⁵ bari kabini ne y'a daminɛ ka kibaru diman fɔ aw fɛ, fɔɔ ka na se bii ma, aw bɛ ne dɛmɛna k'aw niyɔrɔ ta o baara la.

⁶ Ne lanin b'a la ko Ala min ye baaranyuman nin daminɛ aw dusu la, ko ale bɛna taa nya k'aw dɛmɛ o la fɔɔ ka taa se Yezu Krista kɔsegilon ma.

⁷ Tinyɛ bɛ ne fɛ ka miiri aw koo la tuma bɛɛ, bari aw koo bɛ ne dusu la. Ka ne to kaso la, walima ne tun bɛ kibaru diman fɔra ka gwɛ mɔgɔw ye tuma min na, janko u k'u jigi l'a kan kosɛbɛ, Ala ye bonya min la ne kan, aw y'aw niyɔrɔ ta o baara la.

⁸ Ala yɛrɛ b'a lɔn ko aw bɛɛ koo ka di ne ye i n'a fɔ aw koo ka di Yezu Krista ye cogo min na.

⁹ Ne bɛ Ala dali aw ye ko a ka dɔ fara aw ka nyɔgɔn kanuya kan tuma bɛɛ, o ka kɛ lɔnniya ni hakilitigiya la,

¹⁰ waasa aw ka se ka konyuman lɔn, ka kɛ mɔgɔnyuman jalakibaliw ye Krista kɔsegilon na,

¹¹ ani janko aw ka kɛwalinyuman kɛ sɛbɛ la, o min see bɛ sɔrɔ Krista barika la, waasa bonya ni tandoli ka kɛ Ala ye.

Kibaru diman fɔko

¹² Ne balimaw, ne b'a fɛ aw ka min faamu, o filɛ nin ye: Koo minw ye ne sɔrɔ, o kɛra sababu ye kibaru diman taara nya.

¹³ O cogo la, sɔlidasi minw bɛ masacɛ ka luu kɔnɔ, ani mɔgɔ tɔw bɛɛ, olu bɛɛ y'a lɔn ko ne bɛ kaso la Krista ka baara kɔsɔn.

¹⁴ Ne minɛko kɛra sababu ye an balimaw caaman ye jagwɛlɛya sɔrɔ Matigi barika la. Olu bɛ taara nya ka Ala ka kuma fɔ ni siranya t'o la.

¹⁵ Tinyɛ na, mɔgɔ dɔw bɛ Krista ka kibaru fɔ ni keliya ani kɔnɔnajuguya ye, nga dɔw kɔni b'a fɔra ni kɔnɔgwɛ ye.

¹⁶ Olu b'o kɛ ni kanuya ye, bari u y'a lɔn ko ne bɛ yan kibaru diman le kɔsɔn k'a gwɛya mɔgɔw ye.

¹⁷ Nga minw kɔnɔ gwɛnin tɛ, n'u bɛ Krista ka kibaru fɔra ni kɔnɔnajuguya ye, olu b'a fɛ ka dɔ fara ne ka sɛgɛn kan kaso la.

¹⁸ Hali n'u b'a kɛra ni kɔnɔnajuguya ye, walima ni kɔnɔgwɛ ye wo, o si tɛ baasi ye. Ne kɔni bɛ nisɔndiya bari Krista ka kibaru diman bɛ fɔra cogo bɛɛ la, o la, ne bɛna taa nya ni n ka nisɔndiya ye.

¹⁹ Bari ne lanin b'a la ko aw ka Ala dali, ni Yezu Krista ka nii barika la, o koo bɛɛ laban na, Ala bɛna ne kunmabɔ.

²⁰ Ne jigi bɛ min kan kosɛbɛ, ni n b'a makɔnɔna sɛbɛ sɛbɛ la, ale kama ne tɛna maloya fɔɔ ne bɛ jagwɛlɛya sɔrɔ le. K'a ta sisan ma ani tuma bɛɛ, ne bɛ nii na wo, ne sara wo, ne b'a fɛ ka bonya la Krista tɔgɔ kan,

²¹ bari ni ne bɛ nii na, ne bɛ nii na Krista ka baara kɔsɔn, nga ni ne sara, o fana bɛ kɛ ne ma hɛrɛ ye.

²² Nga ka ne to nii na, ni ne bɛna se ka baaranyuman kɛ tugu, o la ne kɔni m'a lɔn ne bɛna min ta.

²³ Ne ka miiriya bɛ a faan fila bɛɛ la, nga min ka fisa kosɛbɛ ne fɛ, o ye ne ka bɔ nin dinyɛ na ka taa to Krista fɛ.

²⁴ Nga ni ne tora nii na, o le ka fisa aw ma kosɛbɛ,

²⁵ o la, ne lanin b'a la ko ne bɛna to nii na aw gɛrɛfɛ, k'aw bɛɛ dɛmɛ ka taa nya ani ka nisɔndiya sɔrɔ aw ka lanaya la Yezu la.

²⁶ Ni ne kɔsegira aw fɛ tuma min na, aw bɛna se k'aw yɛrɛ bonya Krista barika la ne kɔsɔn.

Kretinyɛ taamacogo

²⁷ Min ka gwɛlɛ, o ye nin ye: Aw ka taamacogo ka kan ka bɛn Krista ka koo ma, waasa hali ni ne nana aw fɛ, walima ne ma se ka na wo, ne k'a mɛn ko aw jijanin lo, ka bɛn ka baara kɛ ni miiriya kelen ye ani dusukun kelen ye kibaru diman kɔsɔn aw y'aw jigi la o min kan.

²⁸ Aw kana sɔn aw juguw ka siranya bila aw la, cogo si la. Ni aw jaa ma tigɛ fewu, u bɛn'a lɔn ko olu ta ye halaki ye, ani ko aw ta ye kisili ye o min bɔra Ala fɛ.

²⁹ Aw minw kɛra Krista ta ye, Ala ye nɛɛma min kɛ aw ye, o ye nin ye. A y'a kɛ aw y'aw jigi la a kan, o dama tɛ, aw bɛ sɛgɛn sɔrɔ a kɔsɔn fana.

³⁰ O sɛgɛn min b'aw kan, aw ye ne ye o le la, aw b'a lɔn ko halibi, n b'o la fana.