Ɛfɛsikaw 5 - LAYIDUKURA

¹ Aw ka banba ka Ala ladege, bari aw y'a deenw ye minw koo ka d'a ye.

² Aw ka koo bɛɛ kɛ ni kanuya ye, i n'a fɔ Krista, ale min y'an kanu k'a yɛrɛ di ka kɛ saraka ye an kɔsɔn o min diyara Ala ye i n'a fɔ wusulan.

³ Kakalaya, walima mɔgɔkolonya, ani wasabaliya, o koo si kana mɛn aw cɛma, bari Ala ka mɔgɔw man kan k'o kɛ.

⁴ Malobaliyakuma, ni kumakolon ani kumanɔgɔnin fana ma nyi. Aw ka to ka Ala tando dɔrɔn.

⁵ Aw k'a faamu kosɛbɛ ko kakalaw ni mɔgɔnɔgɔninw, ni wasabaliw tɛna don Krista ni Ala ka mara kɔnɔ. Wasabaliya ni josɔn bɛɛ ye kelen ye.

Kɛnɛ ni dibi koo

⁶ Aw kana sɔn mɔgɔ si k'aw nyagami n'a ka kuma fufafu ye, bari o nyɔgɔn le b'a to Ala bɛ dimi a ka kuma labatobaliw fɛ.

⁷ Aw kana jɛn n'u ye fewu.

⁸ Fɔlɔfɔlɔ, aw kɔnɔ tun finnin lo, sisan aw kɔnɔ gwɛnin lo Matigi barika la. Mɔgɔ minw kɔnɔ gwɛnin lo, aw ka taama i n'a fɔ olu,

⁹ bari mɔgɔ minw kɔnɔ gwɛnin lo, olu ka kɛwaliw ye nin ye: Nyumanya, tilenninya, ani tinyɛko.

¹⁰ Fɛɛn min ka di Matigi ye, aw ka banba k'o lɔn.

¹¹ Aw kana dibidibiko kɛ, tɔnɔ tɛ o la. Aw ka ban o ma k'o koo fɔ ka gwɛ mɔgɔw ye,

¹² bari u bɛ koo minw kɛ dogo la, o fɔko yɛrɛ ye maloya ye.

¹³ Nga ni fɛɛn o fɛɛn bɔra kɛnɛ kan, o koo bɛ faamu.

¹⁴ Bari ni koo o koo bɔra kɛnɛ kan ka ban, o bɛ faamu. O le y'a to a fɔra ko: “Wili, e min bɛ sinɔgɔ la, wili ka bɔ suuw cɛma, Krista bɛn'a ka yeelen bɔ i ye.”

¹⁵ Aw k'aw yɛrɛ kɔlɔsi kosɛbɛ, aw kana kɛ nalomanw ye, nga hakilitigiw.

¹⁶ Waati min b'aw bolo, aw ka banba ka konyuman kɛ, n'o tɛ waati ka gwɛlɛ.

¹⁷ O la, aw kana kɛ kolɔnbaliw ye, nga aw ka Matigi sago nyini k'o lɔn.

¹⁸ Aw kana kɛ dɔrɔtɔw ye, o bɛ mɔgɔ bila kakalaya la, aw k'aw yɛrɛ bɛɛ di Nii Senuman ma.

¹⁹ Aw ka nyɔgɔn dɛmɛ ni Ala tandoli dɔnkiliw ye o minw bɛ Ala ka kuma kɔnɔ, ni dɔnkili wɛrɛw ye, ani Nii Senuman ye minw d'aw ma. Aw ka dɔnkili la, ka barika la Matigi ye n'aw dusukun bɛɛ ye.

²⁰ Aw ka barika la an Faa Ala ye an Matigi Yezu Krista tɔgɔ kɔsɔn, waati bɛɛ ani koo bɛɛ la.

Furucɛ ni furumuso koo

²¹ Krista nyasiran kɔsɔn, aw k'aw yɛrɛ majigi nyɔgɔn ye.

²² O la, musow, aw k'aw yɛrɛ majigi aw cɛɛw ye, i n'a fɔ aw b'a kɛ Matigi ye cogo min na.

²³ Bari cɛɛ le y'a ka muso kuntigi ye, i n'a fɔ Krista ye Ala ka jama kuntigi ye cogo min na, o min y'a farikolo ye, a kɛra o min kisibaga ye.

²⁴ Ala ka jama b'a yɛrɛ majigi Krista ye cogo min na, o cogo kelen na muso ka kan k'a yɛrɛ majigi a cɛɛ ye koo bɛɛ la.

²⁵ Cɛɛw, aw k'aw ka musow kanu, i n'a fɔ Krista ye Ala ka jama kanu cogo min na, fɔɔ k'a nii di a kɔsɔn,

²⁶ waasa k'a saniya batizeli barika la jii kɔnɔ ni kuma ye,

²⁷ a ka jama dafanin ka sɔrɔ a yɛrɛ nyakɔrɔ, nɔɔ si kana ye a kan, ni kurukuruyɔrɔ ani dɛsɛyɔrɔ si kana ye a la. A b'a fɛ a ka jama ka kɛ a nyanaman ye, jalakiyɔrɔ kana sɔrɔ a la.

²⁸ O cogo kelen na, cɛɛw ka kan k'u ka musow kanu i n'a fɔ u yɛrɛ farisogo. Cɛɛ min b'a ka muso kanu, o tigi b'a yɛrɛ le kanu,

²⁹ bari mɔgɔ si t'a yɛrɛ kɔniya fewu, nga a b'a yɛrɛ balo ani k'a yɛrɛ mara ka nya, i n'a fɔ Krista b'a ka jama kɛ cogo min na,

³⁰ bari an ye Krista farikolo dɔ ye.

³¹ “O le y'a to, cɛɛ bɛn'a faa n'a bamuso to yen ka nɔrɔ a ka muso la, u fila bɛna jɛn ka kɛ kelen ye.”

³² O koo nin kɔrɔ ka bon kosɛbɛ, ne y'o kuma min fɔ, o nyasinnin bɛ Krista n'a ka jama ka koo ma.

³³ O kɔ, aw kɔni, aw kelen kelen bɛɛ k'a ka muso kanu i n'a fɔ aw yɛrɛ, musow fana k'u ka cɛɛw bonya.