Ɛfɛsikaw 3 - LAYIDUKURA

Krista ka koo dogonin

¹ O le y'a to ne Pɔli min bɛ kaso la Yezu Krista kɔsɔn aw siya wɛrɛw kama,

² Ala ye nɛɛma kɛ ne ye ka baara min kalifa ne ma aw ka hɛrɛ kama, aw y'o koo mɛn.

³ Ala y'a ka koo dogonin yira ne la. N y'o koo fɔ aw ye dɔɔni ka tɛmɛ.

⁴ N'aw b'o kalan tuma min na, aw bɛn'a ye ko ne bɛ Krista ka koo dogonin nin lɔn.

⁵ O koo dogonin ma se ka yira adamaden si la waatitɛmɛninw na, i n'a fɔ a yirala Ala ka cidenw, n'a ka kiraw la cogo min na sisan Nii Senuman barika la.

⁶ O kɔrɔ ko siya wɛrɛw ye Isirayɛlidenw ka niyɔrɔ nyɔgɔn sɔrɔ Ala ka koo la, ani layidu koo la, ani ka jɛn ka kɛ kelen ye, kibaru diman kɔsɔn Yezu Krista barika la.

⁷ Ala ye nɛɛma kɛ ne ye a ka sebagaya barika la, ka ne kɛ kibaru diman nin fɔbaga ye.

⁸ Ne min ye Ala ka mɔgɔw bɛɛ la kɔmɔgɔ ye. O bɛɛ n'a ta, Ala ye nɛɛma kɛ ne ye waasa ne ka Krista ka nyumanya fɔ siya wɛrɛw ye, daan tɛ nyumanya min na.

⁹ Ala min ye fɛɛn bɛɛ dan, ale ye koo min dogo kabini waatijan, ne k'o koo kɛcogo fɔ ka gwɛ.

¹⁰ O cogo la, sankolo kɔnɔ fangatigiw ni setigiw ka se ka Ala ka hakilitigiya lɔn cogo bɛɛ la, Ala ka jama barika la bii,

¹¹ ka kɛnyɛ n'a ka koo latigɛnin ye kabini fɔlɔfɔlɔ, a y'o min kɛ an Matigi Yezu Krista barika la.

¹² N'an lara ale la ka jɛn n'a ye, sira dinin b'an ma ka gwɛrɛ Ala la ni jigi ye.

¹³ O la, ne b'aw dali ko aw kana aw jigi tigɛ ne ka tɔɔrɔko kɔsɔn, ne b'o minw kɛ aw kama, o le ye aw ka yɛrɛbonya sababu ye.

Pɔli bɛ Ala dali Efɛzikaw ye tugu

¹⁴ O le kɔsɔn, ne bɛ n kunbiri gwan an Faa Ala nyakɔrɔ,

¹⁵ ale min ye sankolo ni dugukolo kan mɔgɔw bɛɛ dan.

¹⁶ A ka nyumanya ka bon. O la, ne b'a dali a ka fanga di aw ma k'aw jaa gwɛlɛya a ka Nii Senuman barika la,

¹⁷ janko Krista koo ka se ka sigi aw kɔnɔ jigi barika la, kanuyasɛbɛ ka se ka sɔrɔ aw kɔnɔ fɔɔ ka nya.

¹⁸ O cogo la, daan tɛ Krista ka kanuya min na, aw ni Ala ka mɔgɔw bɛɛ bɛna se k'o faamu.

¹⁹ Krista ka kanuya min tɛmɛna lɔnniya bɛɛ kan, aw bɛna se k'o faamu, ka se ka kɛ i n'a fɔ Ala.

²⁰ An bɛ fɛɛn minw dali, walima ka miiri minw koo la, Ala min bɛ se k'o d'an ma, hali ka tɛmɛ o kan yɛrɛ, a ka sebagaya barika la o min bɛ baara kɛ an kɔnɔ,

²¹ bonya ka la ale kelen kan, a ka jama cɛma Yezu Krista kɔsɔn, waati bɛɛ la! Amiina!