Kɔlɔsikaw 4 - LAYIDUKURA

¹ Kuntigiw, koo minw ka nyi ani minw bɛnnin lo, aw fana k'o kɛ aw ka jɔɔnw ye, aw ka l'a la ko kuntigi dɔ bɛ aw fana fɛ arijana na.

Ladili wɛrɛw

² Aw ka jija Ala dali la, ka barika la a ye kosɛbɛ.

³ Aw ka Ala dali an ye fana, janko an ka waajuli ka se ka sabati, an ka se ka Krista koo fɔ ale min kɔsɔn ne bɛ kaso kɔnɔ.

⁴ A ka koo nin, min tun dogonin lo, ne ka se k'o fɔ ka gwɛ.

⁵ Minw ma la Matigi la, aw ka taama ni hakilitigiya ye olu cɛma, n'aw ye sababunyuman sɔrɔ, aw ka banba ka Matigi koo fɔ u ye.

⁶ Aw k'aw ka kuma fɔcogo nya tuma bɛɛ, a ka diya bɛɛ ye, waasa aw ka se ka mɔgɔ bɛɛ jaabi ka nya.

Pɔli ka foli laban

⁷ Ne balimacɛ Tisiki, baarakɛlasɛbɛ lo. A koo ka di ne ye kosɛbɛ. A kɛra ne jɛnnyɔgɔn ye Matigi ka baara la. Ale bɛna an ka kibaruya bɛɛ fɔ aw ye.

⁸ Ne b'a ci aw fɛ o le kɔsɔn, janko aw ka se k'an ka koow faamu, k'aw jigi tugu.

⁹ Ne b'a ci, ale n'an balimacɛ Onezimu mɔgɔsɛbɛ, ale min koo fana ka di ne ye kosɛbɛ. A kɛra aw dɔ ye. Olu bɛna yan kibaruya fɔ aw ye.

¹⁰ Arisitaaki, ale min ye ne tɔnyɔgɔn ye kaso kɔnɔ, ale b'aw fo, ani Barinabasi belenden Mariki fana, ale min koo tun fɔra aw ye ka ban, n'a nana se aw fɛ tuma min na, aw k'a kunbɛn ka nya.

¹¹ Yezu, o bɛ min wele ko Zusitusi, b'aw fo. Olu dama le ye Zuwifu ye minw bɛ Ala ka baara kɛra ni ne ye yan, ani olu le ye ne jigi tugulaw ye.

¹² Epafarasi, ale min ye aw balima dɔ ye, b'aw fo, ale min kɛra Yezu Krista ka baarakɛla ye. A bɛ to ka Ala dali aw ye tuma bɛɛ, waasa aw ka se ka kɔgɔ Ala koo la ani ka sɔn a sago ma kosɛbɛ.

¹³ Ne b'a tando, a banbanin lo kosɛbɛ aw ka koo la ani balima minw bɛ Lawodise, ni minw bɛ Iyerapoli.

¹⁴ An teri dɔgɔtɔrɔcɛ Luka bɛ aw fora, ani Demasi fana.

¹⁵ Aw ka an balima Lawodisekaw fo, ka Nɛnfa fo, ani Ala ka jama min bɛ nyɔgɔn lajɛn a ka soo.

¹⁶ Ni bataki nin nana se aw ma, n'aw y'a kalan ka ban, aw k'a ci Lawodisekaw ma janko olu fana k'a kalan. Ni min fana bɔra olu fɛ ka na di aw ma, aw k'o kalan fana.

¹⁷ Aw k'a fɔ Arisipi ye ko Matigi ye baara min kalifa a ma, ko a ka banba k'o kɛ ka nya.

¹⁸ Ne Pɔli b'aw fo, yan sɛbɛn nɔɔ nin ye ne yɛrɛ bolonɔ ye. Aw kana nyinɛ ko ne bɛ kaso kɔnɔ. Ala ka nɛɛma kɛ aw ye.