Kɔlɔsikaw 3 - LAYIDUKURA

¹ N'aw ni Krista korila ka kunun nyɔgɔn fɛ, fɛɛn minw bɛ sɔrɔ arijana na aw ka olu le nyini. Krista siginin bɛ Ala kinibolo la o yɔrɔ la.

² Aw ka miiri arijana kɔnɔfɛnw koo la, aw kana miiri dinyɛ kɔnɔfɛnw na,

³ bari a kɛra i n'a fɔ aw sara dinyɛ faan fɛ, aw nii bɛ ni Krista ye Ala fɛ.

⁴ Krista min kɛra aw ka nii ye, n'ale y'a yɛrɛ yira tuma min na, aw fana bɛna ye o tuma na ni nɔɔrɔ ye.

Jogokɔrɔ ni jogokura ka koo

⁵ Koo minw kɛra dugukolo kan koow ye, aw ka olu bɛɛ dabila, i n'a fɔ kakalaya, ni mɔgɔkolonya, ani miirijugu, ni kojugu nigɛ, ani wasabaliya, o min ni josɔn bɛɛ ye kelen ye.

⁶ O koo nunu nyɔgɔn le kɔsɔn, Ala bɛ dimi mɔgɔmurutininw kɔrɔ.

⁷ Tuma min na aw tun bɛ to ka kojugu kɛ, aw tun bɛ o nyɔgɔnw le kɛ.

⁸ Nga sisan aw ka nin koow bɛɛ dabila, n'o ye dimi koo, dusubɔ, juguya, ani mɔgɔ tɔgɔcɛn, ani malobaliya kuma minw bɛɛ bɛ se ka bɔ aw daa la.

⁹ Aw kana galon tigɛ nyɔgɔn ye tugu, bari, aw ye aw jogokɔrɔ bɛɛ dabila ka ban,

¹⁰ ka jogokura ta, o min bɛ sabati tuma bɛɛ Ala ka lɔnniya barika la, ka kɛ i n'a fɔ aw danbaga.

¹¹ O cogo la, siya wɛrɛ ni Zuwifu kɛra kelen ye, kɛnɛkɛnɛninw ni kɛnɛkɛnɛbaliw kɛra kelen ye, lonanw ni siyajuguw kɛra kelen ye, jɔɔnw ni hɔrɔnw kɛra kelen ye. U bɛɛ kɛra kelen ye Krista barika la.

¹² Ala ye aw woloma k'aw kɛ a ka mɔgɔw ye ani aw koo ka di a ye kosɛbɛ. O la, aw ka kɛ mɔgɔnyumanw ye, minw bɛ makari. Aw k'aw yɛrɛ majigi, ka kɛ mɔgɔsabalininw ye, minw bɛ munyuli kɛ.

¹³ N'a sɔrɔla ko dɔ ye koo dɔ kɛ min ma bɛn a tɔnyɔgɔn ma, aw ka yafa nyɔgɔn ma tuma bɛɛ ka nyɔgɔn dɛmɛdɛmɛ. Krista yafara aw ma cogo min na, aw fana ka yafa nyɔgɔn ma ten.

¹⁴ Koo bɛɛ la, kanuya ka sɔrɔ aw kɔnɔ, ale sababu la, aw bɛna se ka nyɔgɔn minɛ kosɛbɛ.

¹⁵ Krista ka hɛrɛ ka kɛ n'aw ye, aw welela o min kama ka kɛ farisogo kelen ye, ani aw ka kɛ nyumanlɔnbagaw ye.

¹⁶ Krista ka kuma ka se ka sigi aw kɔnɔ kosɛbɛ. Aw ka nyɔgɔn kalan ani ka nyɔgɔn ladi ni hakilitigiya bɛɛ ye. Aw ka Ala tando ka barika la a ye ni dɔnkiliw ye minw bɛ sɔrɔ Ala ka kuma kɔnɔ, ani dɔnkili wɛrɛw, ni dɔnkili minw bɛ sɔrɔ Nii Senuman barika la.

¹⁷ N'aw bɛ fɛɛn o fɛɛn kɛ walima ka fɛɛn o fɛɛn fɔ, aw k'o bɛɛ kɛ Matigi Yezu tɔgɔ la, ka barika la an Faa Ala ye.

Pɔli ka ladili, denbaya ka koo la

¹⁸ Musow, aw k'aw yɛrɛ majigi aw cɛɛw ye i n'a fɔ a bɛnnin bɛ Matigi ka mɔgɔw fɛ cogo min na.

¹⁹ Cɛɛw, aw k'aw ka musow kanu, aw kana fariya u ma.

²⁰ Denmisɛnw, koo bɛɛ la aw k'aw wolobagaw bonya, bari o le ka di Matigi ye.

²¹ Wolobagaw, aw fana kana aw deenw degun kojugu fɔɔ u bɛ dimi, waasa o jigi kana tigɛ.

Jɔɔnw n'u kuntigiw ka koo

²² Jɔɔnw, aw ka mɛnni kɛ aw kuntigiw fɛ koo bɛɛ la ka kɛnyɛ ni adamadenya ye, aw kana baara kɛ aw ka kuntigiw nyana dɔrɔn janko k'aw koo diya u ye, nga o ka kɛ ni dusukun gwɛnin ye Matigi nyasiran kɔsɔn.

²³ Aw bɛ baara o baara kɛ aw k'o kɛ ni dusukunnyuman ye, i n'a fɔ Matigi ka baara lo, aw kan'a kɛ i n'a fɔ mɔgɔ ta lo.

²⁴ Aw ka l'a la ko aw bɛna niyɔrɔ sɔrɔ Matigi fɛ min ye aw ka sara ye. Aw ka Matigi, o ye Krista ye, aw bɛ baara kɛra ale le ye.

²⁵ Ni mɔgɔ min ye baarajugu kɛ, o tigi bɛna o baarajugu le sara sɔrɔ, Ala tɛ mɔgɔ woloma ka bɔ mɔgɔ la.