Kɔlɔsikaw 2 - LAYIDUKURA

¹ Ne b'a fɛ aw k'a faamu ko ne bɛ bondorigwɛlɛn lo kɛra aw ni Lawodisekaw fana kɔsɔn ani mɔgɔ minw nyaa ma la ne kan ka ye,

² waasa olu ka se ka jigitugu sɔrɔ, ani u ka se ka kɛ kelen ye kanuya la, fɛɛn min dogonin tun bɛ Ala fɛ, ka hakili nyanaman sɔrɔ ka se k'o lɔn, o min ye Krista ye.

³ Mɔgɔ bɛ se ka koo min bɛɛ lɔn Ala faan fɛ, Krista ye o le yira.

⁴ Ne ye kuma nin fɔ aw ye janko mɔgɔ si kana aw lafili ni manamanakuma ye.

⁵ Tinyɛ lo, ne tɛ aw cɛma, nga ne hakili bɛ aw la, ne nisɔndiyanin bɛ k'a ye ko aw bɛnnin lo kosɛbɛ, ani ko aw jijanin lo nyɔgɔn fɛ k'aw jigi la Krista kan.

Kɔlɔsikaw ni Krista koo

⁶ Aw lara an Matigi Yezu Krista la cogo min na, aw ka taama ka kɛnyɛ n'ale sago ye.

⁷ Aw k'aw yɛrɛ d'a ma, ka nɔrɔ a la, ka jija k'aw jigi la a kan ka kɛnyɛ ni kalan ye aw y'o min kɛ, ani aw ka barika la Ala ye kosɛbɛ.

⁸ Aw k'aw yɛrɛ kɔlɔsi mɔgɔ si kana aw kunna cɛn n'a ka lɔnniya fu ye u bɛ o min sɔrɔ adamaden ka landa koo la, ani jinaw ka koo, olu minw bɛ dinyɛ kunna, o lɔnniya nin tɛ Krista ta ye.

⁹ Bari alaya dafanin le bɛ ale farisogo la.

¹⁰ Fɛɛn bɛɛ b'aw fɛ ale le barika la, ale le bɛ setigi ni fangatigi yebaliw bɛɛ kunna.

¹¹ Ale barika la aw kɛnɛkɛnɛna. O kɛnɛkɛnɛko nin ma kɛ mɔgɔ sababu la, nga o kɛra Krista ta ye, o kɔrɔ ko aw jogojugu yɛlɛmana.

¹² Aw batizera tuma min na, o waati la aw suu donna n'a ye, ani ka kunun n'a ye, aw jigi lanin kɔsɔn setigi Ala kan, ale min y'a kunun.

¹³ Aw minw tun ye suuw ye Ala fɛ aw ka kojugu kɔsɔn, ani aw ka kɛnɛkɛnɛbaliya kɔsɔn, Ala y'aw kunun n'a ye. A ye an ka kojugu bɛɛ yafa.

¹⁴ Sariya tun bɛ jalaki min ben an kan, a ye o ta ka bɔ yen, o min tun sigira an kama, a y'o ban a ka saya barika la lɔgɔ kan.

¹⁵ Ala ye fangatigiw, ni setigi yebaliw ka sebagaya cɛn, k'u minɛ ka kɛ jɔɔnw ye k'u yira kɛnɛ kan bɛɛ nyakɔrɔ, a ye see sɔrɔ u kan Krista ka saya barika la lɔgɔ kan.

¹⁶ Aw kan'a to mɔgɔ si k'aw jalaki dumuni koo ni minnifɛn koo la, walima sankura nyanagwɛ koo, walima kalokura nyanagwɛ koo la, walima lafinyɛlon koo la.

¹⁷ Olu ye koo nataw jaaw ye, nga u yɛrɛ yɛrɛ bɛ Krista le la.

¹⁸ Mɔgɔ minw b'a kɛ i n'a fɔ u majiginin lo ani minw bɛ to ka mɛlɛkɛw bato, aw kan'a to u si k'aw nyagami. U jijanin lo u ka fɛɛn yetaw fɔko la. U b'u yɛrɛ bonya ni adamaden ka miiriya dama ye.

¹⁹ Olu ma sɔn ka nɔrɔ Krista la ale min kɛra kungolo ye, ale min barika la farisogo bɛ kɛ kelen ye k'a ka makonyafɛnw sɔrɔ fasajuru ni joli siraw fɛ, ka sɔrɔ ka bonya ka kɛnyɛ ni Ala sago ye.

Kɔlɔsikaw ka saya koo ni u kununko ani Krista

²⁰ N'aw sara ni Krista ye nyɔgɔn fɛ ka faran jinaw ka koow la, olu minw bɛ dinyɛ kunna, mun na aw bɛ sɔn k'u ka landaw labato tugu i n'a fɔ aw ye dinyɛ ta ye?

²¹ U ko aw kana nin dumu, aw kana a nɛnɛ, aw kana maga a la yɛrɛ.

²² O fɛɛn nunu bɛɛ bɛ laban ni cɛnni ye, ani u fana juu sigira adamadenw ka landa n'u ka ladili le kan,

²³ o kɛra i n'a fɔ u ka nyi. Ka batoli kɛ u yɛrɛ sago la, k'u yɛrɛ majigi, ka tɔɔrɔ la u farisogo kan, u b'o koo nunu bonya, k'a sɔrɔ u man kan ni bonya ye, olu ye farisogo ka diyako dama le ye.