Kɔlɔsikaw 1 - LAYIDUKURA

Foli

¹ Ne Pɔli min kɛra Yezu Krista ka ciden ye ka kɛnyɛ ni Ala sago ye, ani an balimacɛ Timote,

² an bɛ bataki nin ci Ala ka jama ma Kɔlɔsi dugu kɔnɔ, aw minw kɛra balimasɛbɛw ye Krista barika la, an Faa Ala ka nɛɛma ni hɛrɛ kɛ aw ye.

Kibaru diman ka koo Kɔlɔsi

³ An bɛ Ala dali aw ye tuma o tuma, ka barika la a ye ale min ye an Matigi Yezu Krista Faa ye.

⁴ Bari an y'a mɛn ko aw fana lara Yezu Krista la ani ko aw bɛ Ala ka mɔgɔw kanu.

⁵ Aw jigi lanin bɛ fɛɛn min kan arijana na, aw ye o jigi nin sɔrɔ kibaru diman barika la, o min ye tinyɛ kuma ye, aw kɔnna k'o le mɛn.

⁶ O le sera dinyɛ yɔrɔ bɛɛ la, n'a bɛ baara kɛra yen kosɛbɛ, i n'a fɔ a b'a kɛra aw fɛ cogo min na, kabin'a sera aw fɛ, aw sɔnna a ma, o le y'aw dɛmɛ ka Ala ka nyumanya lɔn sɛbɛ sɛbɛ la.

⁷ An ka baarakɛnyɔgɔn Epafarasi, min koo ka gwɛlɛ an ma, n'ale ye Krista ka baarakɛlanyuman ye anw fɛ aw cɛma, ale le y'aw kalan o koo la.

⁸ Aw bɛ nyɔgɔn kanu cogo min na Nii Senuman barika la, ale le y'o fɔ an ye.

Pɔli bɛ Ala dali Kɔlɔsikaw ye

⁹ O le y'a to, kabini an ye aw koo mɛn, an bɛ Ala dali aw ye tuma bɛɛ. An b'a dali ko a ka hakilitigiya di aw ma Nii Senuman barika la, janko aw ka se k'a sago lɔn kosɛbɛ.

¹⁰ O la, aw ka taamacogo ka se ka bɛn ni Matigi sago ye, ani aw koo ka diya a ye tuma bɛɛ, aw ka se ka baaranyuman sifa bɛɛ kɛ, ani ka Ala lɔn kosɛbɛ kosɛbɛ.

¹¹ An b'a dali ko a ka fanga d'aw ma kosɛbɛ a ka sebagayaba barika la, o cogo la aw bɛna se k'aw jija ka koo bɛɛ munyu ni nisɔndiya ye.

Krista ka koo

¹² Aw ka barika la an Faa ye ale min y'a kɛ aw bɛ se ka niyɔrɔ sɔrɔ, o min labɛnnin bɛ Ala ka mɔgɔw ye a fɛ.

¹³ A y'an tila ka bɔ dibi ka fanga bolo, ani k'an don a Deen ka mara la, deen min koo ka di a ye kosɛbɛ.

¹⁴ O deen min barika la, an ka kojugu yafara, an kisira.

¹⁵ Ale le ye Ala jaa ye, an tɛ se ka Ala min ye. Ale fana le kɔnna danfɛn bɛɛ nya, ani a ka bon n'u bɛɛ ye.

¹⁶ Bari fɛɛn bɛɛ danna ale le barika la. Sankololafɛnw wo, dugukolo kan fɛɛnw wo, danfɛn minw bɛ se ka ye wo, minw tɛ se ka ye wo, a masaya fara a kuntigiw kan, ani a fangatigi fara a setigiw kan, o bɛɛ lajɛnnin danna ale le barika la, ani u danna ale le kɔsɔn.

¹⁷ Ale le kɔnna fɛɛn bɛɛ nya, fɛɛn bɛɛ fana bɛ yen ale le barika la.

¹⁸ Ale le ye Ala ka jama kuntigi ye, o min y'a farisogo ye. A daminɛna ni ale ye, ale le kɛra suu fɔlɔ ye ka kunun, waasa a ka kɛ bɛɛ nyafɛ.

¹⁹ Bari a diyara Ala ye k'a yɛrɛ ka Alaya nɔɔrɔ bɛɛ la ale kan.

²⁰ Ani ka bɛn ni danfɛnw bɛɛ ye a deen nin barika la, dugukolo kan fɛɛnw, ni sankololataw, ka hɛrɛ kɛ a deen nin ka saya barika la lɔgɔ kan.

²¹ Aw minw yɔrɔ tun ka jan Ala la fɔlɔfɔlɔ, ani aw tun ye Ala juguw ye aw ka miiriya, n'aw ka kɛwalijuguw kɔsɔn,

²² sisan Ala bɛnna n'aw ye a Dencɛ ka saya barika la, waasa aw saniyanin, ni jalakibali ka se ka lɔ a nyakɔrɔ.

²³ Nga aw ka jija k'aw jigi la a kan kosɛbɛ, fɛɛn si kana aw ka miiriya nyagami k'aw jigi bɔ kibaru diman kan aw ye o min mɛn, ale min koo fɔra danfɛnw bɛɛ ye dinyɛ kɔnɔ. Ne Pɔli kɛra o min baarakɛla ye.

Pɔli ye baara min kɛ

²⁴ Ne bɛ nisɔndiya ne ka tɔɔrɔ koow la aw kɔsɔn, Krista ka sɛgɛn tɔɔ min tun tora, ne b'o la Ala ka jama kɔsɔn o min y'a farisogo ye.

²⁵ Ne kɛra jama nin ka baarakɛla ye, ka kɛnyɛ ni Ala ka weleli ye aw dɛmɛ kama. A ye ne wele k'a ka kuma fɔ ka nya kosɛbɛ.

²⁶ O ye Ala ka koo dogonin ye, a tun dogora kabini waatijan, mɔgɔw ye. Nga sisan Ala y'a yira a ka mɔgɔw la.

²⁷ A b'a fɛ ka o koo dogonin ka nyumanya yira siyaw cɛma, min ye nin ye: Krista bɛ aw cɛma, ale kɛra aw jigi ye ko aw bɛna nɔɔrɔ sɔrɔ sini.

²⁸ An bɛ ale Krista le koo fɔra mɔgɔ bɛɛ ye, k'u ladi, ani k'u kalan ni hakilitigiya bɛɛ ye, waasa an ka se ka mɔgɔ kelen kelen bɛɛ labɛn u dafanin ka lɔ Ala nyakɔrɔ Krista barika la.

²⁹ O le kɔsɔn ne bɛ baara kɛ, ani ne bɛ bondori kɛ n'a ka fanga ye, o min bɛ baara kɛra ne kɔnɔ kosɛbɛ.