Tim fɔlɔ 6 - LAYIDUKURA

Ladili, jɔɔnw koo la

¹ Mɔgɔ minw kɛra jɔɔnw ye olu k'u ka kuntigiw bonya ka nya, waasa mɔgɔ si kana yɔrɔ sɔrɔ ka kumajugu fɔ Ala koo la, ani an ka kalan koo la.

² Jɔɔn minw ka kuntigiw jigi bɛ Krista kan, olu kana ban k'u bonya, ko bari u balimaw lo, nga u ka baara kɛ u ye kosɛbɛ, bari mɔgɔ minw b'u ka baara nunu tɔnɔ sɔrɔ, olu kɛra Krista kɔmɔgɔw ye aw yɛrɛ bɛ minw kanu. E ka mɔgɔw kalan ni o koo ye ani ka u ladi.

Kalanjugu koo

³ Ni mɔgɔ dɔ bɛ mɔgɔw kalan ni koo wɛrɛ ye, n'o tigi ka kuma ni an Matigi Yezu Krista ka kuma nyanaman ma kɛ kelen ye, ani n'o tɛ bɛn Ala sira taamacogo ma, ani kalan min bɛ bɛn ni Alanyasiran ye,

⁴ o tigi ye yɛrɛbonyala dama ye. A tɛ foyi lɔn. Sɔsɔli ka d'a ye kosɛbɛ ani a bɛ kuma samasama, o min bɛ na ni nyagoya ni kɛlɛ ye, ani tɔgɔ cɛnni, ni bisigijugu.

⁵ A fana bɛ na ni sɔsɔli caaman ye, min bɛ wili mɔgɔw cɛ minw kɛra nalomanw ye. O mɔgɔ nunu tɛ tinyɛ lɔn tugu. U bɛ miiri ko u bɛna nafolo sɔrɔ Alasira taama barika la, ka kɛ fɛntigiw ye.

⁶ Mɔgɔ min ka sɔrɔ b'a wasa, tinyɛ na, Alasira taamako kɛra dɛmɛyɔrɔ ye ale fɛ.

⁷ An ma na ni foyi ye dinyɛ na, an tɛna taa ni foyi ye fana.

⁸ O la, n'an bɛ an daladumuni sɔrɔ ani ka fani sɔrɔ fana, olu ka kan ka an wasa.

⁹ Nga mɔgɔ minw b'a fɛ ka kɛ fɛntigiw ye, olu nigɛra ka sɔrɔ miirijugu fɛ, o minw bɛ mɔgɔw cɛn ani k'u bila halakili la,

¹⁰ bari wari nigɛ ye kojugu sifa bɛɛ bɔyɔrɔ ye. Mɔgɔ dɔw tugura a nɔɔ fɛ k'o jigi bɔ Krista kan, ka tɔɔrɔ la u yɛrɛ kan.

Ladili min dira Timote ma a yɛrɛ koo la

¹¹ Nga e kɔni, Ala ka mɔgɔ, i k'i yɛrɛ tanga o fɛɛnw bɛɛ ma, ka to ka tilenninyakow kɛ, ka siran Ala nya, k'i jigi la a kan, k'a kanu, ka munyuli kɛ, ani ka to ka nyumanya kɛ mɔgɔw ye.

¹² I ka jija k'i jigi to Krista kan, ka sini hɛrɛ banbali sɔrɔ, bari Ala y'i wele o le kama, i n'a fɔ i tun ye seereyanyuman kɛ cogo min na, seere caaman nyana.

¹³ Ala min bɛ nii don fɛɛn bɛɛ la ani Yezu Krista min lɔra Pɔnsi Pilati nyakɔrɔ ka seereyanyuman kɛ, n b'a fɔ i ye olu nyana

¹⁴ ko baara min dira i ma, i ka jija k'o kɛ, jalakiyɔrɔ kana sɔrɔ i la, fɔɔ ka taa se an Matigi Yezu Krista ka nalon ma.

¹⁵ Ala kelenpe min ye setigi ye, ni dubatigi, masaw ka masa, matigiw ka Matigi, bɛna o kɛ n'a ka waati latigɛnin sera tuma min na.

¹⁶ Ale kelen le tɛ sa, a bɛ kɛnɛ na mɔgɔ si tɛ se ka gwɛrɛ o min na. Mɔgɔ ma Ala ye, mɔgɔ tɛ se k'a ye fana. Bonya ni sebagaya ye ale ta ye tuma bɛɛ. Amiina.

Nafolotigiw koo

¹⁷ I k'a fɔ bii fɛntigiw ye k'u kana u yɛrɛ bonya, ani u kana u jigi la o fɛɛn tɛmɛta nunu kan, nga u k'u jigi la Ala kan, ale min bɛ fɛɛnw bɛɛ di an ma caaman, waasa an ka nisɔndiya.

¹⁸ I k'a fɔ u ye ko u ka konyuman kɛ, kɛwalinyuman kɛli ka kɛ u ka nafolo ye. U k'u tigɛw dayɛlɛ ka mɔgɔ wɛrɛw dɛmɛ.

¹⁹ O cogo la, u bɛna nafolo sɔrɔ sini, ani u fana bɛna hɛrɛsɛbɛ sɔrɔ.

Ladili laban

²⁰ Timote, koo minw kalifara i ma, i ka olu mara kosɛbɛ. I k'i yɛrɛ tanga kuma fufafu ma olu minw ni Ala sira tɛ bɛn, o min bɛ jati lɔnniya ye, k'a sɔrɔ lɔnniyasɛbɛ tɛ.

²¹ Mɔgɔ dɔw y'o lɔnniya nin nyɔgɔn sɔrɔ, o le y'a to u ye Ala sira bila. Ala ka nɛɛma ka kɛ aw ye.