Tim fɔlɔ 2 - LAYIDUKURA

Ala daliko

¹ Ne fɛ, ne bɛ fɛɛn fɔlɔ min nyini mɔgɔw fɛ, o ye nin ye: ko u ka Ala dali ni dalili sifa bɛɛ ye, ani ka barika la Ala ye mɔgɔ bɛɛ kɔsɔn,

² ka dalili kɛ masaw ni fangatigiw ye, waasa an ka se ka to nyasuma na ani hɛrɛ la, ka se ka kɛ mɔgɔsɛbɛw ye Ala ni mɔgɔw nyana.

³ O le ka nyi, an'a ka di an Kisibaga Ala ye,

⁴ ale min b'a fɛ mɔgɔ bɛɛ ka kisi ani ka se ka tinyɛ lɔn.

⁵ Bari Ala kelen le bɛ yen, ani soronakɛla kelen dama le bɛ yen Ala ni mɔgɔw cɛ. O ye Yezu Krista ye, o min ye mɔgɔ ye i n'a fɔ anw.

⁶ A y'a yɛrɛ saraka mɔgɔ bɛɛ ka kunmabɔli kɔsɔn. O cogo la, a y'a yira waatilatigɛnin na ko Ala b'a fɛ mɔgɔ bɛɛ ka kisi.

⁷ O le kɔsɔn ne welela ka kɛ ciden ani waajulikɛla ye, ka siya wɛrɛw kalan u ka la Yezu la, ani ka tinyɛ lɔn. Ne bɛ tinyɛ le fɔra, ne tɛ galon tigɛra.

Pɔli bɛ cɛɛ ni musow ladi

⁸ O la, ne b'a fɛ cɛɛw ka Ala dali yɔrɔ bɛɛ, k'u bolo kɔrɔ ta sanfɛ ka Ala dali ni dusugwɛ ye, dimi ni sɔsɔli kana sɔrɔ u kɔnɔ.

⁹ O cogo la fana, ne b'a nyini musow fɛ ko u k'u yɛrɛ masiri cogo bɛnnin na, ka fani don minw b'u sutura. O nyaji kana caya u ka masirifɛnw koo la, i n'a fɔ u kunsigi labɛncogo, walima ka sanu don, walima ka kɔnɔkisɛ don, walima fani sɔngɔgwɛlɛn.

¹⁰ Nga u ka masirifɛnw ka kɛ konyuman kɛli ye, i n'a fɔ a bɛnnin bɛ musow fɛ cogo min na olu minw ko u bɛ siran Ala nya.

¹¹ Musow ka kan k'u yɛrɛ majigi ka je ka mɛnni kɛ kalan na.

¹² Ne tɛ sira di muso ma ka mɔgɔw kalan walima ka kuntigiya kɛ cɛɛ kan, a ka kan ka je,

¹³ bari Adama le kɔnna ka dan fɔlɔ, o kɔfɛ, Awa sɔrɔla ka dan.

¹⁴ Adama fana ma kɔn ka sɔn Sutana ka nigɛli ma, nga muso le kɔnna ka sɔn a ma ka ban Ala ka fɔta ma.

¹⁵ O bɛɛ n'a ta, muso bɛna kisi a ka deen wolo kɔsɔn, n'a jigi tora Ala kan, ka to kanuya la, ani k'a ka taamacogo bɛn Ala sago ma.