Tes fɔlɔ 3 - LAYIDUKURA

¹ Tuma min na an tun tɛ se ka munyuli kɛ tugu, an y'a miiri ko ni an tora an kelen Atɛni, o ka fisa.

² O le y'a to, an ye an balimacɛ Timote ci aw fɛ, ale ye Ala ka baarakɛla ye Krista ka kibaru diman fɔli kɔsɔn, an y'a ci waasa ale ka taa aw dɛmɛ, ani k'aw ladi aw jigi koo la,

³ waasa aw la, mɔgɔ si kunna kana cɛn tɔɔrɔ kɔsɔn minw y'aw sɔrɔ sisan, bari aw yɛrɛ b'o lɔn ka ban ko wajibi lo, o ka an sɔrɔ.

⁴ An tun b'aw cɛma tuma min na, an tun b'a fɔra aw ye ko an ka kan ka tɔɔrɔ. O le kɛra, aw yɛrɛ b'o lɔn.

⁵ Ne tun tɛ se ka munyuli kɛ tugu, o la ne ye Timote ci, waasa ale ka taa aw filɛ yala n'aw jigi bɛ Ala kan tugu, janko a ka kɔsegi ka na n'o kibaruya ye. Ne tun bɛ siran ko Sutana kana aw nigɛ k'an ka baara kɛ fu ye.

Pɔli bɛ nisɔndiya Tesalonikaw koo la

⁶ Sisan, Timote bɔra aw fɛ ka na se yan an fɛ. A ye kibarunyuman fɔ aw koo la. A ko jiginyuman bɛ aw fɛ, ko aw bɛ nyɔgɔn kanu. An koo bɛ aw kɔnɔ cogo min na, a ye o fɔ, ko aw b'a fɛ k'an ye kosɛbɛ, i n'a fɔ an fana b'a fɛ ka aw ye cogo min na.

⁷ O le y'a to, n balimaw, k'an to an ka sɛgɛn n'an ka tɔɔrɔ la, an y'a ye tuma min na ko aw jigi lanin bɛ Matigi kan halibele, an ye nisɔndiya sɔrɔ.

⁸ Sisan an bɛ se ka ninakili ka nya bari aw jijanin lo ka to Matigi ka jɛnnyɔgɔnya la.

⁹ An ye nisɔndiya min sɔrɔ aw kɔsɔn, an m'a lɔn an bɛna Ala fo cogo min na.

¹⁰ N'an bɛ Ala dali tuma min na, suu fara tile kan, an b'a nyini a fɛ kosɛbɛ ko a ka sira di an ma, waasa an ka se ka taa aw filɛ ani ka aw dɛmɛ tugu ka taa aw ka jigi sabatiko faan fɛ.

¹¹ An b'a nyini ale an Faa Ala fɛ ani an Matigi Yezu fɛ, u ka sira di an ma loon dɔ waasa ka taa aw fɛ.

¹² Kanuya min bɛ aw ni nyɔgɔn cɛ, ani mɔgɔ wɛrɛw faan fɛ, Matigi k'o sabati kosɛbɛ i n'a fɔ an b'aw kanu cogo min na.

¹³ A ka barika don aw la, aw ka kɛ mɔgɔnyumanw ni jalakibaliw ye an Faa Ala nyakɔrɔ, an Matigi Yezu kɔsegituma na n'a ka mɔgɔw bɛɛ ye.