Tes fɔlɔ 2 - LAYIDUKURA

Pɔli ka baara Tesaloniki

¹ Ne balimaw, aw yɛrɛ y'a lɔn ko an ka taali aw fɛ, o ma kɛ gwansan ye.

² Yan ni an ka se aw fɛ Tesaloniki, u y'an tɔɔrɔ k'an nɛni kosɛbɛ Filipi, aw yɛrɛ y'o lɔn. An ye jagwɛlɛya sɔrɔ Ala fɛ, k'an ka Ala ka kibaru diman fɔ aw ye gwɛlɛya caaman cɛma.

³ An bɛ kuma min fɔra mɔgɔw ye, o ma kɛ galon ye walima nanbaran koow ye, an fana tɛ mɔgɔ si lafili.

⁴ Nga Ala yɛrɛ y'a ye ko an bɛ se, o la, a y'o kibaru diman fɔko kalifa an ma, an fana b'a fɔ a fɔcogo la. An tɛ mɔgɔ diyana koo nyinina, nga Ala min b'an kɔnɔnakow lɔn, an bɛ ale ta le kɛ.

⁵ O cogo la, aw b'a lɔn ko an ka kuma ma kɛ nanbaran kuma ye fewu. An fana m'o fɔ aw ye an yɛrɛ ka tɔnɔ kɔsɔn. Ala yɛrɛ b'o lɔn.

⁶ An ma bonya nyini mɔgɔ si fɛ, an m'a nyini aw fɛ, walima mɔgɔ wɛrɛw fɛ.

⁷ An tun bɛ se ka kuntigiya kɛ aw kan, bari an ye Krista ka cidenw ye. Nga an ka koo tun ka di k'an to aw cɛma yen, i n'a fɔ muso b'a deen mara cogo min na.

⁸ Aw ka koo tun ka gwɛlɛ an ma kosɛbɛ, o le y'a to, an tun labɛnnin lo ka Ala ka kibaru diman fɔ aw ye, hali k'an yɛrɛ nii di aw kɔsɔn. Bari aw koo tun b'an dusu la kosɛbɛ.

⁹ N balimaw, an ye baara min kɛ k'o sɛgɛn munyu, aw hakili b'o la. K'an to aw cɛma n'an bɛ Ala ka kibaru diman fɔ aw ye, an ye baara kɛ suu fara tile kan waasa an ka doni kana la aw dɔ kan.

¹⁰ Aw yɛrɛ b'a lɔn ni Ala fana, ko aw minw lara Krista la, an ka taamacogo tun ka nyi aw cɛma, a tilennin tun lo, jalakiyɔrɔ tun tɛ an na.

¹¹ Aw b'a lɔn fana ko an y'aw kelen kelen bɛɛ minɛ i n'a fɔ faa b'a ka deenw minɛ cogo min na.

¹² An y'aw ladi, k'aw jaa gwɛlɛya, ani an y'a nyini aw fɛ kosɛbɛ ko aw k'aw ka taamacogo bɛn ni Ala sago ye, ale min b'aw wele janko aw ka don a ka mara kɔnɔ, ani k'a ka nɔɔrɔ sɔrɔ.

Halibele Pɔli bɛ barika la Ala ye Tesalonikaw koo la

¹³ O kama, an bɛ barika la Ala ye tuma bɛɛ, bari, an ye Ala ka kuma min fɔ aw ye, aw m'o minɛ i n'a fɔ mɔgɔ dalakuma, nga i n'a fɔ Ala ka kuma yɛrɛyɛrɛ, a do ye o yɛrɛ le ye jaati, min bɛ baara kɛ aw kɔnɔ, aw minw lara Krista la.

¹⁴ N balimaw, Ala ka jama minw bɛ Zude mara la minw fana ye Yezu Krista ta ye, aw ni olu tɛmɛna sira kelen kan, bari aw ye tɔɔrɔ sɔrɔ kosɛbɛ aw balimaw bolo, i n'a fɔ olu fana tɔɔrɔla Zuwifuw bolo cogo min na.

¹⁵ O Zuwifu nunu le ye Matigi Yezu ani kiraw faga, ani olu le y'an tɔɔrɔ fana, o koo man di Ala ye, mɔgɔ bɛɛ le ye olu jugu ye.

¹⁶ Olu le b'an bali janko an kana kibaru diman fɔ siya wɛrɛw ye, min bɛ se ka kɛ u bɛ kisili sɔrɔ. O cogo la, u bɛ dɔ farala u ka kojugu kan. Nga a laban na, Ala dimina u kɔrɔ kosɛbɛ.

Pɔli bɛ Timote ci Tesaloniki

¹⁷ An kɔni fɛ balimaw, kabini an faranna nyɔgɔn na waati dɔɔni nin kɔnɔ, an kɔni t'aw cɛma, nga an bɛ miiri aw koo la. An ye cogo bɛɛ nyini, janko ka segi ka taa aw fɛ, bari an b'a fɛ ka aw ye.

¹⁸ O le y'a to an b'a fɛ ka taa aw fɛ. Ne Pɔli yɛrɛ y'o ;naniya ta sinyɛ damani, nga Sutana ma sɔn.

¹⁹ N'an Matigi Yezu segira ka na tuma min na, an jigi bɛ jon le kan, an bɛna nisɔndiya jon le kɔsɔn, jon le bɛna kɛ an ka sesɔrɔjala ye an bɛna an yɛrɛ bonya o min kɔsɔn an Matigi Yezu nyakɔrɔ, ni aw tɛ?

²⁰ Ɔnhɔn, an b'an yɛrɛ bonya ani ka nisɔndiya aw le kɔsɔn.