Piy fɔlɔ 1 - LAYIDUKURA

Foli fɔlɔ

¹ Ne Piyɛri, Yezu Krista ka ciden, bɛ bataki nin ci aw ma, Ala ye aw minw woloma n'aw bɛ lonanya la Pɔn mara la, ni Galati, ani Kapadɔsi, ni Azi ani Bitini mara la.

² Faa Ala y'aw woloma kabini fɔlɔ, k'aw kɛ a taw ye Nii Senuman barika la, waasa ka mɛnni kɛ Yezu Krista fɛ ani ka saniya a ka joli bɔnnin na. Ala ka nɛɛma ni hɛrɛ kɛ aw ye tuma bɛɛ.

Jigi nyanaman koo

³ An ka barika la Ala ye, o min ye an Matigi Yezu Krista Faa ye! A makarila an na kosɛbɛ k'an kɛ danfɛnkura ye ka jigi nyanaman di an ma Yezu Krista ka kununni barika la ka bɔ kaburu la,

⁴ ani ka niyɔrɔ d'an ma, o min tɛ cɛn, a tɛ nagasi, nɔgɔ tɛ se a ma ka ye. A maranin b'aw ye arijana na,

⁵ Setigi Ala bɛ aw minw mara aw jigi kɔsɔn fɔɔ ka taa se kisili loon yɛrɛ yɛrɛ ma. Ala y'o min latigɛ n'o bɛna kɛ dinyɛ laban tuma na.

⁶ O la, hali k'aw to dusukasi la waati dɔɔni nin yɛrɛ kɔnɔ tɔɔrɔ sifa caaman na, aw ka nisɔndiya kosɛbɛ.

⁷ Sanu min ye banta ye, ale bɛ sɛgɛsɛgɛ tasuma na cogo min na, o cogo kelen na aw bɛ sɛgɛsɛgɛ aw jigi koo la tɔɔrɔ nunu bolo, ale min ka fisa ni sanu ye sinyɛ tan, janko aw ka tandoli ni bonya ani karama sɔrɔ Yezu Krista kɔsegilon.

⁸ Aw nyaa ma la a kan, nga a koo do diyara aw ye. Aw y'aw jigi la a kan, k'a sɔrɔ aw m'a ye fɔlɔ, ka nisɔndiya kosɛbɛ o nisɔndiya min tɛ se ka lakali.

⁹ Bari aw kisira aw ka jigi kɔsɔn.

Kiraw tun ye kisili min koo fɔ

¹⁰ Aw tun ka kan ka kisili min sɔrɔ, kiraw kumana o koo la, ani u ka miiriya bɛɛ tun bɛ sinna o le ma.

¹¹ Krista tun bɛna tɔɔrɔ ni bonya min sɔrɔ, a ka Nii Senuman min tun bɛ u fɛ, ale tun b'o koo yira u la, lu tun b'a fɛ k'o waati n'a kɛcogo lɔn.

¹² Ala y'a yira u la k'u ka koo tɛ o ye, nga u tun b'o kuma fɔra ka bila aw le ye. Aw y'o kira nunu ka kumaw mɛn sisan Kibaru Diman fɔbagaw fɛ, Nii Senuman barika la, o min cira ka bɔ sankolo la ka jigi u kan. O diyara mɛlɛkɛw ye fɔɔ u tun b'a fɛ ka koo nin ye.

An taamacogo ka bɛn Ala sago ma

¹³ Ayiwa, aw labɛnnin ka to baara kama, k'aw yɛrɛ minɛ. Yezu Krista bɛna makari aw la a kɔsegilon cogo min na, aw k'aw jigi la o kan kosɛbɛ.

¹⁴ Aw ka mɛnni kɛ Ala fɛ i n'a fɔ dennyumanw. Aw kana taama nigɛlafɛnw kɔ i n'a fɔ aw tun b'a kɛ cogo min na k'aw to kolɔnbaliya la.

¹⁵ Nga aw ka kɛ mɔgɔnyumanw ye aw ka koo kɛtaw bɛɛ la i n'a fɔ aw Welebaga.

¹⁶ Bari a fɔra Ala ka kuma yɔrɔ dɔ la ko: “Aw ka kɛ mɔgɔnyumanw ye i n'a fɔ ne bɛ cogo min na.”

¹⁷ Ɔnhɔn, aw ka dalili la, aw bɛ Ala wele ko aw Faa. A tɛ wolomani kɛ, a bɛ mɔgɔ bɛɛ kiti kelen kelen u ka kɛwaliw kɔsɔn. O tuma na sa, aw ka taama Alanyasiran na, k'aw to dinyɛ na.

¹⁸ Aw b'a lɔn ko aw kuun ma bɔ aw faaw ka koo fufafuw la ni wari ye, walima ni sanu ye o min ye banta ye.

¹⁹ Nga aw kunmabɔra ni joli nyanaman le ye, Krista joli, o min kɛra i n'a fɔ sagaden, finyɛ tɛ min na,

²⁰ o min tun labɛnna o kama kabini dinyɛ ma dan fɔlɔ. Nga o koo kɛra sisan laban tuma nin na aw le kama.

²¹ Ala min ye Krista kunun a sanin kɔ, ka nɔɔrɔ d'a ma, aw lara ale la Krista yɛrɛ sababu la. Aw bɛ la Krista la cogo min na, aw jigi bɛ Ala kan ten.

Adamaden bɛ i n'a fɔ biin

²² Aw sɔnna Ala ka tinyɛkuma ma minkɛ, o le y'aw dusu saniya, waasa aw ka se ka nyɔgɔn kanu badenya la ni kɔnɔgwɛ ye. Aw ka nyɔgɔn kanu kosɛbɛ n'aw dusu bɛɛ ye.

²³ Bari aw kɛra danfɛnkuraw ye min ma bɔ fɛɛn tolita la, fɔɔ fɛɛn tolibali. O kɛra Ala ka kuma barika la, o kuma nyanaman lo tuma bɛɛ,

²⁴ bari “Adamadenw bɛɛ bɛ i n'a fɔ biin. U ka dawula bɛɛ bɛ i n'a fɔ binfeeren. Biin bɛ ja, a feeren bɛ ben.

²⁵ Nga Matigi ka kuma bɛna to n'a ka barika ye waati bɛɛ.” O kuma nin le nana fɔ aw ye.