Zan fɔlɔ 4 - LAYIDUKURA

Ala ta ni Sutana ta

¹ Ne terisɛbɛw, mɔgɔ minw ko Nii Senuman b'u fɛ, aw kana la olu bɛɛ la dɛ. Nga aw k'u sɛgɛsɛgɛ fɔlɔ k'a filɛ ni Ala ta lo. Bari kirakolon caaman bɛ dinyɛ na sisan.

² Ni kira o kira b'a fɔ ko Yezu Krista nana dinyɛ na ka farisogo ta, aw k'a lɔn k'ale ye Ala ta ye.

³ Nga ni min bɛ ban o ma, o tigi ma kɛ Ala ta ye, Krista jugu lo, aw ye o min nako mɛn ka kɔrɔ. Ayiwa, kabini sisan, a bɛ dinyɛ kɔnɔ ka ban.

⁴ Ne deenw, aw kɔni ye Ala taw ye. Aw sera kira nunu kɔrɔ bari Nii Senuman bɛ ni aw ye. Ale fanga ka bon ni Sutana ta ye, o min bɛ dinyɛ kɔnɔ.

⁵ Olu kɔni ye dinyɛ nin taw ye. O la, u ka kuma kɛra dinyɛ ta ye, dinyɛ mɔgɔw le bɛ mɛnni kɛ u fɛ fana.

⁶ Anw kɔni, anw ye Ala taw ye. Mɔgɔ o mɔgɔ min bɛ Ala lɔn, o tigi bɛ mɛnni kɛ anw fɛ. Nga ni min tɛ Ala ta ye, o tɛ mɛnni kɛ an fɛ. An b'a lɔn o cogo la minw ta ye Nii Senuman yɛrɛyɛrɛ ta ye ka bɔ galontigɛla ta la.

Kanuya bɛ bɔ Ala fɛ

⁷ Ne terisɛbɛw, aw ye nyɔgɔn kanu bari n'i ko Ala, i ko nyɔgɔn kanuya. Mɔgɔ o mɔgɔ b'a mɔgɔnyɔgɔn kanu, o tigi ye Ala deen ye, a bɛ Ala lɔn.

⁸ Nga ni min t'a mɔgɔnyɔgɔn kanu, o tigi tɛ Ala lɔn. Bari n'i ko Ala, i ko kanuya le.

⁹ Dencɛ kelenpe min bɛ Ala fɛ, a y'o ci dinyɛ na waasa an ka hɛrɛ banbali sɔrɔ ale barika la. Ala y'a ka kanuya yira an na o cogo le la.

¹⁰ Kanuya filɛ nin ye. A ma kɛ i n'a fɔ anw ye Ala kanu! Ale le y'an kanu k'a Dencɛ ci an ma. An ka kojuguw yafara ale ka yɛrɛ saraka barika la.

¹¹ Ne terisɛbɛw, ni Ala y'an kanu ten, an fana ka kan ka nyɔgɔn kanu dɛ!

¹² Mɔgɔ si nyaa ma deli ka la Ala kan ka ye. Nga n'an bɛ nyɔgɔn kanu, o b'a yira ko Ala b'an fɛ. Ni Ala b'an fɛ, a ye kanuya min don an dusu la, o bɛ kɛ kodafanin ye.

¹³ An b'a lɔn ko Ala b'an fɛ, ani ko anw kɛra a taw ye, bari a y'a yɛrɛ Nii le di an ma.

¹⁴ Faa Ala y'a Dencɛ ci dinyɛ na, waasa ka mɔgɔw kisi. Anw nyaa lara o kan, anw b'o seereya kɛ.

¹⁵ Ni mɔgɔ o mɔgɔ y'a fɔ ko Yezu ye Ala deen ye, o tigi ye Ala ta ye, ani Ala b'o tigi fɛ.

¹⁶ Ala b'an kanu cogo min na, anw kɔni b'o lɔn, ani anw lara o la. N'i ko Ala, i ko kanuya. Ni mɔgɔ min b'a mɔgɔnyɔgɔn kanu, o tigi nɔrɔnin bɛ Ala la, Ala fana bɛ n'o tigi ye.

¹⁷ Ni kanuyadafanin bɛ an dusu la, an hakili bɛna sigi Ala ka kiti tigɛlon na. Bari Yezu Krista n'a Faa bɛ nyɔgɔn fɛ cogo min na, k'anw to dinyɛ nin kɔnɔ, an fana bɛ ten.

¹⁸ Kanuya bɛ yɔrɔ min na, siranya tɛ yen. Kanuyasɛbɛ bɛ siranya ban. Bari ni siranya koo bɛ fɔ yɔrɔ min na, o bɛ jalakiko yira. Mɔgɔ min bɛ siran, kanuyasɛbɛ tɛ o tigi dusu la.

¹⁹ Ayiwa, anw kɔni, kanuya b'an dusu la, bari Ala le kɔnna k'an kanu.

²⁰ Ni mɔgɔ min y'a fɔ ko Ala koo ka di a ye k'a sɔrɔ a b'a mɔgɔnyɔgɔn kɔniya, o tigi ye galontigɛla ye. A nyaa bɛ a mɔgɔnyɔgɔn min na, n'a t'o kanu, a tɛ se ka Ala kanu, a nyaa tɛ o min na.

²¹ Ayiwa, Krista ye cii min d'an ma, o filɛ nin ye, a ko: Ni Ala koo ka di mɔgɔ min ye, o tigi ka kan k'a mɔgɔnyɔgɔn fana kanu.