Zan fɔlɔ 3 - LAYIDUKURA

¹ Aw m'a ye an koo diyara Faa Ala ye cogo min na wa, fɔɔ an bɛ wele yɛrɛ ko Ala deenw. An ye Ala deenw ye tinyɛ na! O kama Ala juguw t'an lɔn, bari u ma Ala lɔn.

² Ne terisɛbɛw, k'a ta sisan ma, an ye Ala deenw ye. Nga an bɛna kɛ cogo min na tigitigi, o le ma gwɛ fɔlɔ. An bɛ min lɔn, ni Krista segira ka na tuma min na, ale bɛ cogo min na, an fana bɛna kɛ ten. Bari an bɛn'a ye ten.

³ Mɔgɔ o mɔgɔ jigi b'a kan, o tigi b'a yɛrɛ saniya i n'a fɔ Yezu Krista yɛrɛ bɛ cogo min na.

⁴ Mɔgɔ o mɔgɔ bɛ kojugu kɛ, o tigi tɛ Ala ka sariya labato, bari sariya labatobaliya, o le ye kojugu ye.

⁵ Aw b'a lɔn ko Yezu nana janko ka mɔgɔw ka kojuguw yafa, a ma kojugu si kɛ.

⁶ Ayiwa, ni mɔgɔ o mɔgɔ nɔrɔnin bɛ Krista la, o tigi tɛ kojugu kɛ tugu, nga ni min bɛ to ka kojugu kɛ, o tigi ma Krista ye, a t'a lɔn fana.

⁷ Ne deenw, aw kan'a to mɔgɔ si b'aw lafili. Mɔgɔ o mɔgɔ bɛ tilenninya sira taama, o tigi ye mɔgɔtilennin ye i n'a fɔ ale Yezu Krista.

⁸ Min bɛ to ka kojugu kɛ, o tigi ye Sutana ka mɔgɔ ye, bari Sutana ye kojugukɛla ye kabini fɔlɔfɔlɔ. Ala Dencɛ nana, waasa ka Sutana ka kɛwaliw cɛn.

⁹ Mɔgɔ o mɔgɔ kɛra Ala deen ye, o tigi tɛ to ka kojugu kɛ tugu. Bari Ala y'a Faa ye. A tɛ se ka to kojugukɛ la tugu bari Ala deen lo.

¹⁰ Ala deenw ni Sutana ka mɔgɔw bɛ lɔn ka bɔ nyɔgɔn na kɛwali nunu le fɛ. Mɔgɔ o mɔgɔ tɛ tilenninya sira taama, ani n'a t'a mɔgɔnyɔgɔn kanu, o tigi tɛ Ala ta ye.

Nyɔgɔnkanuya

¹¹ An ka kan ka nyɔgɔn kanu. Aw y'o le mɛn kabini koow daminɛ tuma na.

¹² An man kan ka Kayɛn ladege, ale min kɛra Sutana ka mɔgɔ ye k'a dɔgɔnin faga. Mun na a y'a faga? A y'a faga bari ale Kayɛn tun kɛra baarajugukɛla ye, k'a sɔrɔ a dɔgɔnin tun ye mɔgɔnyuman ye.

¹³ N badenw, ni mɔgɔw b'aw kɔniya, o kana aw dabari ban.

¹⁴ An b'a lɔn ko an kɛra mɔgɔ nyanamanw ye Ala faan fɛ, bari an b'an mɔgɔnyɔgɔn kanu. Mɔgɔ min tɛ a mɔgɔnyɔgɔn kanu, o tigi bɛ i n'a fɔ suu.

¹⁵ Mɔgɔ o mɔgɔ b'a mɔgɔnyɔgɔn kɔniya, o tigi ye mɔgɔfagala le ye. Aw b'a lɔn ko mɔgɔfagala si tɛ se ka hɛrɛ banbali sɔrɔ.

¹⁶ Yezu Krista y'a nii saraka anw kɔsɔn. An bɛ kanuya lɔn o le fɛ. An fana ka kan k'an nii saraka an mɔgɔnyɔgɔn kɔsɔn.

¹⁷ Fɛɛn bɛ mɔgɔ min bolo n'a tɛ dɛsɛbagatɔ dɛmɛ, o tigi bɛ se k'a fɔ cogo di ko ale bɛ Ala kanu?

¹⁸ Ne deenw, an kan'a fɔ an daa la dɔrɔn ko an tɔnyɔgɔn koo ka di an ye. Nga an k'a yira tinyɛ na n'an ka kɛwaliw ye.

Daliliko

¹⁹ N'an mɔgɔnyɔgɔnw koo ka d'an ye, an b'a lɔn o le fɛ ko an bɛ tinyɛ kan. Ani an hakili bɛ sigi Ala nyakɔrɔ.

²⁰ N'an kɔnɔnako b'an jalaki, Ala ka bon n'an kɔnɔnako ye. Ale bɛ koo bɛɛ lɔn.

²¹ Ne terisɛbɛw, n'an kɔnɔnako t'an jalaki, an bɛ se ka Ala dali ni hakilisigi ye.

²² An mana fɛɛn o fɛɛn dali a fɛ, an b'o sɔrɔ bari an b'a ka sariya labato k'a sago kɛ.

²³ A ka sariya filɛ nin ye, ko an ka la a Deen Yezu Krista la, ani ka nyɔgɔn kanu. Ale yɛrɛ le y'o cii nin don an bolo ten.

²⁴ Ni mɔgɔ min b'a ka sariya nin labato, Ala b'o tigi fɛ, o tigi ye Ala ta ye. An b'a lɔn o fɛ ko Ala b'an fɛ, a ka Nii Senuman barika la a y'o min d'an ma.