Zan fɔlɔ 1 - LAYIDUKURA

Bataki cikun

¹ Kuma min bɛ nii don mɔgɔ la, o Kuma nin tun bɛ yen ni fɛɛn si ma dan fɔlɔ. Anw y'o Kuma mɛn, an nyaa lar'a kan, k'a filɛ kosɛbɛ, ka maga a la,

² o y'a yɛrɛ yira, anw y'a ye. O kama, anw b'a seereya kɛ, k'a koo fɔ aw ye ale min tun bɛ ni Faa Ala ye n'a nan'a yɛrɛ yira an na.

³ Anw ye min ye, ka min mɛn, an b'o le fɔ aw ye, waasa aw fana ka jɛn ni anw ye. Ayiwa, anw kɔni n'an Faa Ala n'a Dencɛ Yezu Krista jɛnnin lo.

⁴ An b'o sɛbɛn k'o ci aw ma waasa an ka nisɔndiya kosɛbɛ!

Ala ye yeelen ye

⁵ Ayiwa, an ye min mɛn a fɛ, an b'o le fɔra aw ye, ko Ala ye yeelen ye, dibi t'a la fewu.

⁶ N'an ko an ni Ala jɛnnin lo k'a sɔrɔ an bɛ dibidibiko kɛ, o tuma na, an kɛra galontigɛlaw ye, an tɛ tinyɛko kɛ.

⁷ Nga n'o y'a sɔrɔ n'an ka koow bɛɛ gwɛnin lo i n'a fɔ ale yɛrɛ bɛ cogo min na, o tuma na, jɛɛn bɛ kɛ an bɛɛ ni nyɔgɔn cɛ, a Dencɛ Yezu joli b'an ka kojuguw bɛɛ bɔ an na.

⁸ N'an y'a fɔ ko an ma kojugu kɛ, an b'an yɛrɛ nigɛ, an tɛ kɛ tinyɛtigiw ye.

⁹ Nga n'an sɔnna ka lɔ an ka kojuguw la, o tuma na, an bɛ se k'an jigi la Ala kan. Bari a bɛna yafa an ma k'an ka tilenbaliyakow bɛɛ bɔ an na.

¹⁰ Nga n'an y'a fɔ ko an ma kojugu kɛ, an bɛ Ala kɛ galontigɛla ye, a ka kuma tɛ an dusu la.