Kor fɔlɔ 5 - LAYIDUKURA

Kojugu min kɛra Ala ka jama cɛma

¹ A bɛ fɔra yɔrɔ bɛɛ ko mɔgɔkolonya dɔ kɛra aw cɛma, o min nyɔgɔn tɛ sɔrɔ Alalɔnbaliw fɛ yɛrɛ. Mɔgɔ dɔ b'aw cɛma min y'a facɛ ka muso bɔsi.

² Aw do b'aw yɛrɛ bonya! Aw dusu ma kasi o koo la, ka se k'o koo kɛbaga nin gwɛn ka bɔ aw cɛma wa?

³ Ne kɔni fɛ, ne t'aw cɛma yen, nga ne bɛ n'aw ye miiriya la, ne y'o kojugukɛla nin jalaki ka ban i n'a fɔ n b'o yɔrɔ la.

⁴ N'an ka miiriya nana kɛ kelen ye n'aw mana nyɔgɔn lajɛn an Matigi Yezu Krista tɔgɔ kɔsɔn, n'a ka sebagaya barika la,

⁵ o mɔgɔ sugu nin ka kan ka bila gɛrɛfɛ Sutana ye, waasa a ka adamadenya miiri ka bɔ a la, a nii ka se ka kisi Matigi kɔsegilon na.

⁶ Aw ka yɛrɛbonyako ma kɛ a nyanaman ye! Aw m'a lɔn ko burufununan fitini bɛ se ka farinimugu caaman funu wa?

⁷ Aw kɛra mɔgɔnyumanw ye minkɛ, aw k'o kojugu nin bɔ aw cɛma, waasa aw ka kɛ mɔgɔnyumanw yɛrɛyɛrɛ ye, bari Krista min kɛra saraka ye k'an hɔrɔnya, ale fagara o kɔsɔn.

⁸ O tuma na, an k'an ka nyanagwɛ kɛ ni buru ye, fununan tɛ min na, o kɔrɔ, juguya ni mɔgɔkolonya kana kɛ aw cɛma, nga aw k'o kɛ ni kɔnɔgwɛ ani tilenninya ye.

⁹ Ne y'a fɔ aw ye n ka bataki kɔnɔ ko aw kana jɛn ni kakalaw ye.

¹⁰ Ne kaan tɛ dinyɛ kakalaw ma, walima sɔnjuguw, walima soonw, walima josɔnlaw ma dɛ, bari o tɛ se ka kɛ n'aw ma bɔ dinyɛ na.

¹¹ Ne ye min fɔ aw ye bataki nin kɔnɔ, o ye nin ye, ko: ni mɔgɔ min b'a yɛrɛ kɛ aw dɔ ye, k'a sɔrɔ o tigi ye kakala ye, walima sɔnjugu ye, walima josɔnla ye, walima mɔgɔ tɔgɔcɛnbaga, walima dɔrɔtɔ, walima soon ye, aw kana jɛn n'o tigi ye fewu, hali ka dumuni yɛrɛ kɛ n'a ye.

¹² Aw nyana, ne ka kan ka mɔgɔ wɛrɛw le jalaki wa? Aw m'a lɔn ko aw ka kan k'an ka mɔgɔw le jalaki wa?

¹³ Ala yɛrɛ le bɛna mɔgɔ wɛrɛw kiti. “Aw ka mɔgɔjuguw bɔ aw cɛma,” i n'a fɔ a fɔra Ala ka kuma na cogo min na.