Kor fɔlɔ 4 - LAYIDUKURA

Matigi le ye kititigɛla ye

¹ O la, mɔgɔw ka kan k'anw jati Krista ka baaradenw ye, ani mɔgɔ minw bɛ Ala ka baara kunna.

² N'u ye baara dɔ kalifa mɔgɔ ma, u bɛ min nyini a fɛ, o ye tilenninya ye.

³ Ne kɔni fɛ, hali n'aw ye ne jalaki, walima kititigɛla dɔw, o tɛ foyi ye ne nyana. Ne tɛ n yɛrɛ jalaki fana.

⁴ Hali ni ne dusukun tɛ ne jalaki, a ma kɛ k'o le kɔsɔn ne ye jalakibali ye, nga ne jalakibaga ye Matigi ye.

⁵ O le kɔsɔn aw kana kɔn ka mɔgɔ jalaki waati latigɛnin nya, aw k'a to, Matigi bɛ na ka koo dogonin bɛɛ bɔ kɛnɛma, ani ka mɔgɔw bɛɛ kɔnɔnakow yira. O waati la, mɔgɔ kelen kelen bɛɛ ka kan ni bonya min ye, a bɛna o sɔrɔ Ala fɛ.

Ciden ye mɔgɔ sugu min ye

⁶ Ne balimaw, aw le kɔsɔn, ne ye kuma nin yɛlɛma k'a fɔ aw ye cogoya wɛrɛ la, k'o kɛnyɛ ne ni Apolɔsi taamacogo ye, waasa n'aw ye anw cogo filɛ, aw kana se k'aw yɛrɛ bonya, ka nɔrɔ mɔgɔ kelen na ka tɔ kelen kɔniya.

⁷ Jon le y'a kɛ i fisayara ni tɔw ye? Mun le b'i fɛ ni Ala m'o d'i ma? N'i do y'o sɔrɔ Ala fɛ, mun na i b'i yɛrɛ bonya i n'a fɔ i yɛrɛ seko lo?

⁸ Aw wasara ka ban, aw kɛra fɛntigiw ye, aw ye faamaw ye k'a sɔrɔ anw tɛ o ye! Ne b'a fɛ aw ka banba ka kɛ faamaw ye janko anw fana ka kɛ faamaw ye n'aw ye.

⁹ Bari ne bɛ miiri ko Ala y'an cidenw kɔni bila mɔgɔ bɛɛ kɔfɛ, i n'a fɔ mɔgɔ minw ka kan ka faga. O la, an kɛra dinyɛ bɛɛ ka tolonkɛfɛn ye, k'a ta mɛlɛkɛw ma fɔɔ ka ta'a bila adamadenw ma.

¹⁰ An kɛra fatɔw ye Krista kɔsɔn, nga aw kɛra hakilitigiw ye Krista barika la! An kɛra barikatanw ye, aw kɛra fangatigiw ye! Aw bɛ bonya sɔrɔ, an ta ye dɔgɔya ye!

¹¹ Waati nin yɛrɛ la halibele, kɔngɔ b'an na, minnɔgɔ b'an na, fani yɛrɛ t'an fɛ, u b'an tɔɔrɔla, an bɛ taamataamana yɔrɔ bɛɛ la.

¹² An yɛrɛ le bɛ baara kɛ ka sɛgɛn ka sɔrɔ k'an ka balo sɔrɔ. U b'an nɛni, an bɛ duba kɛ an nɛnibagaw ye, u b'an tɔɔrɔ, an b'o munyu.

¹³ N'u b'an tɔgɔ cɛn, an b'u ladi ni kumanyuman ye. Halibele u b'an jati nyamanyama ye dinyɛ na, ani fɛɛn kasagoman.

Pɔli b'a ka deenw ladi

¹⁴ Ne ma nin fɔ aw ye waasa k'aw maloya, nga ne b'a fɛ k'aw lasɔmi i n'a fɔ n ka deenw.

¹⁵ Hali ni kalanfa waa tan le bɛ aw fɛ, k'aw to Krista ka sira la, aw faa ma kɛ mɔgɔ caaman ye. Ne lo ye kibaru diman fɔ aw ye, aw ka sɔrɔ ka la Yezu Krista la.

¹⁶ Ne b'aw dali ko aw ka kɛ ne ladegebagaw ye.

¹⁷ O le kɔsɔn, n deen min koo ka di ne ye n'o ye Timote ye, n y'o ci aw fɛ. Mɔgɔsɛbɛ lo Matigi ka sira la. Ale bɛna aw hakili jigi ne ka taamacogo la Krista ka sira la, i n'a fɔ ne bɛ Ala ka jama kalan yɔrɔ bɛɛ cogo min na.

¹⁸ Mɔgɔ dɔw b'aw cɛma minw b'a miiri ko ne tɛna na aw fɛ tugu, o le y'a to u b'u yɛrɛ bonya.

¹⁹ Nga ne bɛna taa aw fɛ yan ni dɔɔni, ni Matigi sɔnna. O cogo la, ne bɛna se ka yɛrɛbonyala nunu ka kɛwali yɛrɛ ye, a kana dan u ka kuma ma,

²⁰ bari Ala ka faamaya ma kɛ kuma dama ye, nga a b'a yira kɛwali la fana.

²¹ Mun le ka di aw ye? Ne ka taa aw fɛ ni bere ye wa, walima ni kanuya, ni dususuma ye?