Kor fɔlɔ 2 - LAYIDUKURA

Pɔli ka waajuli Korɛnti

¹ N balimaw, ne tun taara aw fɛ tuma min na, ne ma taa Ala ka tinyɛ dogonin koo fɔ aw ye ni kuma faamubali ye, walima ni lɔnniya kuma damatɛmɛnin ye.

² Ka ne to aw cɛma, n tun t'a fɛ aw ka fɛɛn wɛrɛ lɔn, fɔɔ Yezu Krista dama, n'a gwengwenko lɔgɔ kan.

³ Ne sera aw fɛ tuma min na, ne tun ye mɔgɔ barikatan ye, n tun siranna, ka yɛrɛyɛrɛ kosɛbɛ.

⁴ Ne ka kuma ni ne ka waajuli tun ma kɛ i n'a fɔ lɔnnikɛla ka kuma, nga Ala ka Nii Senuman le y'a ka sebagaya yira,

⁵ janko aw jigi kana la adamaden ka lɔnniya kan, fɔɔ Ala ka sebagaya.

Lɔnniya min bɛ bɔ Ala la

⁶ Mɔgɔ minw taara nya Krista ka koo la, an kɔni bɛ olu kalan ni lɔnniya ye. O lɔnniya nin tɛ dinyɛ ta ye, walima nin dinyɛ kuntigiw ta, o minw ye halakita ye.

⁷ Lɔnniya min bɔra Ala fɛ, an bɛ mɔgɔw kalan o le koo la, o min tun dogonin bɛ fɔɔ ka na se bii ma. Ala tun y'o min latigɛ an bonya kama kabini dinyɛ tun ma dan fɔlɔ.

⁸ Dinyɛ kuntigiw si m'o lɔn, n'u tun y'o lɔn, u tun tɛna sɔn ka Nɔɔrɔtigi gwengwen lɔgɔ kan.

⁹ Nga, a fɔra o cogo la Ala ka kuma na ko: “Mɔgɔ nyaa ma fɛɛn min ye ka ye, n'a tulo ma fɛɛn min koo mɛn ka ye, ni fɛɛn min miiriya ma don ka ye mɔgɔ kɔnɔ, Ala y'o le labɛn a kanubagaw ye.”

¹⁰ Ala y'o koo dogoninw yira an na Nii Senuman barika la, bari Nii Senuman bɛ koo bɛɛ sɛgɛsɛgɛ kosɛbɛ fɔɔ ka taa se Ala ka koo dogoninw ma.

¹¹ Mɔgɔ jumɛn le b'a tɔnyɔgɔn kɔnɔnakow lɔn, n'a ma kɛ o tigi yɛrɛ ye? O cogo la fana, mɔgɔ tɛ se ka Ala ka koo lɔn, ni Ala ka Nii Senuman tɛ.

¹² An kɔni, an ye nii min sɔrɔ, o ma kɛ dinyɛ ta ye, nga Ala ta lo, waasa Ala ye koo minw kɛ an ye, an ka se k'o lɔn.

¹³ An tɛ kuma ka kɛnyɛ ni adamaden ka lɔnniya ye, an bɛ fɛɛn min fɔra, o ye Ala koo ye Nii Senuman y'o min yira. An b'o fɔ mɔgɔw ye Nii Senuman bɛ min fɛ.

¹⁴ Ka adamaden to a kelen, a tɛ se ka sɔn Nii Senuman ta ma, o ye fatɔyako ye a nyana, a tɛ se k'o faamu, bari mɔgɔ bɛ se k'olu danfara bɔ Nii Senuman barika le la.

¹⁵ Ala ka Nii bɛ mɔgɔ min fɛ, ale bɛ se ka koo bɛɛ faranfasi, mɔgɔ si tɛ se k'ale ta faamu,

¹⁶ bari: “Mɔgɔ jumɛn le bɛ Matigi ka miiriya lɔn, n'a bɛ se ka hakili d'a ma?” An kɔni, Krista ka miiriya bɛ an kɔnɔ.