Kor fɔlɔ 16 - LAYIDUKURA

Bolomafara min kɛra Zeruzalɛmu Ala ka jama ye

¹ Min kɛra bolomafara koo ye, o min bɛ kɛ ka ci Ala ka jama ma min bɛ Zeruzalɛmu, ne ye min fɔ Ala ka jama ye Galati mara la, aw k'o kɛ fana.

² Lɔgɔkun loon fɔlɔ o loon fɔlɔ, mɔgɔ kelen kelen bɛɛ ka fɛɛn dɔ bɔ a ka sɔrɔta la k'o mara gɛrɛfɛ. Aw kana ne kɔnɔ ni ne nana tuma min na, an ka sɔrɔ k'o bolomafara minɛ.

³ Ni ne sera aw fɛ yen, ne bɛna bataki sɛbɛn k'o di aw ka jigilamɔgɔw ma aw y'o minw woloma, k'u ci ka taa ni bolomafara nin ye Zeruzalɛmu.

⁴ N'a kɛra fɛɛn ye min bɛ ne taakun bɔ fana, ne bɛna taa n'u ye.

Pɔli b'a ka koo kɛtaw latigɛra

⁵ Ne bɛna tɛmɛ Maseduwani mara la ka sɔrɔ ka na aw fɛ yen. Bari ne ka kan ka tɛmɛ o yɔrɔ la.

⁶ N'a sɔrɔ ne bɛna waati dɔɔni kɛ aw fɛ, walima n bɛna saminya bɛɛ kɛ n'aw ye, janko aw ka se ka ne dɛmɛ, ne ka se ka n ka taama bɛɛ kɛ.

⁷ Ne t'a fɛ ka kɛ tɛmɛbaga dama ye aw fɛ sisan. Ne jigi b'a kan ka to aw fɛ waati dɔɔni, ni Matigi sɔnna.

⁸ Nga ne bɛna to Efɛzi fɔɔ Pantekɔti ka se,

⁹ bari n kɔni y'a ye ko n bɛ se ka baara caaman kɛ, n juguw fana ka ca.

¹⁰ Ni Timote nana se aw fɛ tuma min na, aw ka koo bɛɛ kɛ k'a jaa gwɛlɛya aw cɛma, bari ale fana ye Matigi ka baarakɛla dɔ ye i n'a fɔ ne.

¹¹ Mɔgɔ si kan'a dɔgɔya. Aw k'a dɛmɛ a ka se ka segi ka na ne fɛ yan hɛrɛ la. Ne n'an balima tɔw b'a kɔnɔna.

¹² Min ye an balima Apolɔsi koo ye, ne y'a nyini a fɛ kosɛbɛ ko a ka taa aw fɛ n'an balimaw ye. A ma sɔn taali ma fewu sisan, nga n'a nana waati sɔrɔ tuma min na, a bɛna taa aw fɛ yen.

Pɔli bɛ koo laban nyini Korɛntikaw fɛ

¹³ Aw labɛnnin ka to, aw ye jija aw jigi ka to Ala kan kosɛbɛ, aw ka kɛ mɔgɔ jagwɛlɛnw ye, ani ka barika don aw yɛrɛ la.

¹⁴ N'aw bɛ fɛɛn o fɛɛn kɛ, aw k'o kɛ ni kanuya ye.

¹⁵ Aw b'a lɔn ko Sitefana n'a ka somɔgɔw le kɔnna ka sɔn Krista ma Akayi mara la, ko u y'u yɛrɛ di ka Ala ka mɔgɔw dɛmɛ.

¹⁶ Ne b'a nyini aw fɛ ko aw ka mɛnni kɛ o mɔgɔ suguw fɛ, ani mɔgɔ minw bɛɛ bɛ baara kɛ ka sɛgɛn n'u ye.

¹⁷ Ne nisɔn diyanin bɛ Sitefana ni Fɔritunatusi ani Akayikusi nunu ka nako la ne fɛ, olu ye ne dɛmɛ aw nɔɔ na.

¹⁸ Bari u ye ne jigi tugu k'aw fana jigi tugu. O la, aw k'o mɔgɔ sifa nunu tɔgɔnyuman fɔcogo lɔn.

Foli laban

¹⁹ Ala ka jamakulu minw bɛ Azi mara la, olu b'aw fo. Akilasi ni Pirisika ani Ala ka jama min bɛ lajɛnni kɛ u fɛ, u bɛɛ b'aw fo kosɛbɛ Matigi tɔgɔ kɔsɔn.

²⁰ N balimaw bɛɛ b'aw fo, aw ka nyɔgɔn fo kosɛbɛ k'aw bolow meleke nyɔgɔn kaan na.

²¹ Ne Pɔli yɛrɛ le bɛ foli kuma nin sɛbɛnna aw ye.

²² Ni Matigi ka koo man di mɔgɔ dɔ ye, o tigi danganin lo. Maranata.

²³ An Matigi Yezu ka nɛɛma ka kɛ n'aw ye.

²⁴ Yezu Krista barika la, aw bɛɛ koo ka di ne ye.