Kor fɔlɔ 15 - LAYIDUKURA

Pɔli ye kibaru diman min fɔ

¹ N balimaw, sisan ne b'a fɛ k'aw hakili jigi kibaru diman koo la, ne y'o min fɔ aw ye, aw sɔnna o min ma k'aw jigi bɛɛ la a kan.

² Aw bɛna kisi ale barika la, n'aw y'a minɛ i n'a fɔ ne y'a fɔ aw ye cogo min na. N'o tɛ, aw y'aw jigi la a kan fu.

³ Ne kɔnna k'a fɔ aw ye i n'a fɔ ne fana tun y'a sɔrɔ cogo min na, ko Krista sara an ka kojugu kɔsɔn, ka kɛnyɛ ni Ala ka kuma ye.

⁴ U y'a suu don, a tile sabanan loon, a kununna, ka kɛnyɛ ni Ala ka kuma ye.

⁵ A y'a yɛrɛ yira Sefasi la, o kɔ, a y'a yɛrɛ yira a ka ciden tan ni fila la fana.

⁶ O kɔ, a y'a yɛrɛ yira an balimaw na yɔrɔnin kelen minw tun bɛ tɛmɛ mɔgɔ kɛmɛ duuru kan. Olu dɔw sara, nga a caaman bɛ sii la halibi.

⁷ O kɔ fana, a y'a yɛrɛ yira Zaki la, ani cidenw bɛɛ la.

⁸ O bɛɛ kɔfɛ, a y'a yɛrɛ yira ne la, ne min kɛra u bɛɛ kɔmɔgɔ ye, i n'a fɔ deen min ma wolo a waati la.

⁹ Bari ne ye cidenw bɛɛ la fitini ye, ne man kan ka wele ko ciden yɛrɛ, bari ne ye Ala ka jama tɔɔrɔ.

¹⁰ Nga ne bɛ yɔrɔ min na sisan, o ye Ala ka nɛɛma nɔɔ ye. O nɛɛma nin ma kɛ gwansan ye ne faan fɛ. Ne ye baara kɛ ka tɛmɛ olu bɛɛ kan. O ma kɛ ne yɛrɛ ka seko ye, o ye Ala ka nɛɛma nɔɔ ye.

¹¹ A kɛra ne ye wo, walima olu wo, an bɛ min fɔra, o lo, ani aw sɔnna o le ma fana.

Suu kununko

¹² Ni Krista ka kununko waajuli bɛ kɛ, mun na mɔgɔ dɔw b'a fɔ aw cɛma ko suu tɛna kunun?

¹³ Ni suuw tɛna kunun, o kɔrɔ ko Krista fana ma kunun kɛ.

¹⁴ Ni Krista do ma kunun, an ka waajuli ye fu ye ani aw jigi bɛ min kan, o bɛ kɛ fu ye fana.

¹⁵ Ka fara o kan, ni suuw ka kununbaliya ye tinyɛ ye, o kɔrɔ ko an bɛ galon tigɛra k'a la Ala kan, bari an b'a fɔra ko Ala ye Krista kunun a sanin kɔ k'a sɔrɔ o ma kɛ.

¹⁶ Ni suuw tɛna kunun, Krista fana ma kunun.

¹⁷ Ni Krista do ma kunun, aw jigi lanin bɛ min kan, o ye fu ye, aw ka kojugu ma yafa.

¹⁸ O la, mɔgɔ minw sara k'u jigi lanin to Krista kan, olu ta cɛnna.

¹⁹ N'a kɛra ko an jigi bɛ Krista kan an ka dinyɛlatigɛ dama kɔsɔn, an kɛra makaritɔw ye ka tɛmɛ mɔgɔ tɔw kan.

²⁰ Nga tinyɛ na, Krista kununna. O cogo la a y'a yira k'a gwɛya ko mɔgɔ minw sara, olu bɛna kunun.

²¹ Saya sera an ma mɔgɔ kelen barika la minkɛ, o cogo la fana, mɔgɔ kelen barika la, suu kununni bɛna kɛ.

²² Mɔgɔ bɛɛ bɛ sa Adama barika la cogo min na, o cogo kelen na, mɔgɔ bɛɛ fana bɛna kunun Krista barika la.

²³ Nga o bɛna kɛ bɛɛ n'a ka lɔyɔrɔ: Krista le kɛra fɔlɔ ye, o kɔ, mɔgɔ minw kɛra a ta ye. A bɛ kɛ ten a natuma na.

²⁴ O kɔ, koo bɛɛ laban bɛna se. Krista bɛna kuntigi yebaliw bɛɛ ka kuntigiya cɛn, ni fangatigiw ta, ani setigiw ta, ka sɔrɔ ka masaya di Faa Ala ma.

²⁵ Bari a ka kan ka kuntigiya kɛ fɔɔ a juguw bɛɛ ka majigi a kɔrɔ.

²⁶ A jugu laban min bɛna cɛn, o ye saya ye.

²⁷ Bari “Ala ye fɛɛn bɛɛ majigi a ye.” N'a fɔra ko fɛɛn bɛɛ majigira a kɔrɔ, o ma kɛ ko Ala min ye fɛɛn bɛɛ majigi a kɔrɔ, niin b'o fɛɛn nunu la dɛ.

²⁸ Ni fɛɛn bɛɛ majigira Krista kɔrɔ ka ban, o tuma na ale min ye Dencɛ ye, a bɛn'a yɛrɛ majigi Ala ye ale min ye fɛɛn bɛɛ majigi a ye. O cogo la, Ala bɛna kuntigiya kɛ fɛɛn bɛɛ kunna.

²⁹ N'a tun tɛ ten, mɔgɔ minw b'u yɛrɛ di n'u b'o batize suuw tɔgɔ la, olu bɛ mun le nyinina? Ni suuw tɛna kunun fewu, mun na olu b'u yɛrɛ di u k'u batize suuw tɔgɔ la?

³⁰ Mun na anw bɛ kojugu nyakɔrɔ tuma bɛɛ la?

³¹ Loon bɛɛ ne bɛ saya sira kan, o ye tinyɛ ye n balimaw, aw kɛra ne ka yɛrɛbonya sababu ye an Matigi Yezu Krista barika la.

³² Ne ye tɔɔrɔ min sɔrɔ mɔgɔjuguw bolo Efɛzi dugu kɔnɔ, n'o tun kɛra adamaden sago ye, o bɛna mun nya ne ye sa? Ni suuw tɛna kunun, o tuma na, “an ka dumuni kɛ ka minni kɛ, bari sini an bɛɛ bɛna sa,” i n'a fɔ u b'a fɔ cogo min na.

³³ Aw kana aw yɛrɛ nigɛ. Taamanyɔgɔnjugu b'a taamanyɔgɔnnyuman cogo cɛn.

³⁴ Aw k'aw nyaa yɛlɛ ka taama tilenninya la. Aw kana to ka kojugu kɛ tugu. Aw dɔw tɛ Ala lɔn tinyɛ na, ne y'o fɔ waasa aw ka maloya.

Suuw bɛna kunun ni farisogo min ye

³⁵ Mɔgɔ dɔ bɛna nyiningali kɛ ko suuw bɛna kɛ cogo di ka kunun? U bɛna kunun ni farisogo sifa jumɛn ye?

³⁶ Naloman, e bɛ sumansi min dan, n'a ma don dugukolo kɔrɔ ka nyigi, a bɛ falen wa?

³⁷ I tɛ kala dan, nga kisɛ lo, nyɔkisɛ walima kisɛ dɔ wɛrɛ.

³⁸ Ala le b'a kɛ kisɛ bɛ falen ka kala sɔrɔ ka kɛnyɛ n'a yɛrɛ sago ye, ale le bɛ kɛ suman sifa bɛɛ bɛ falen ka kala sɔrɔ ka kɛnyɛ n'u cogo ye.

³⁹ Fɛɛn nyanaman bɛɛ cogo ma kɛ kelen ye. Adamaden farisogo bɛ yen, sennaanifɛnw ta fana bɛ yen, ni kɔnɔw ta fana, ani jigɛ taw.

⁴⁰ Sankolo la fɛɛnw bɛ yen, dugukolo kan fɛɛnw fana bɛ yen. Sankolo la fɛɛnw nɔɔrɔ bɛ danna ni dugukolo kan ta ye.

⁴¹ Tile ka yeelen bɛ danna ni kalo ta ye. Lolo ta fana bɛ danna. Lolo dɔ ka yeelen bɛ tɛmɛ dɔ ta kan.

⁴² O cogo la fana, suuw ka kununko bɛna kɛ ten. Farisogo tolita bɛ don, a nyanaman bɛ kunun.

⁴³ A cɛjuguman bɛ sutara, a nyumaman bɛ kunun. A bɛ sutara barikatanya la, ka kunun ni fangaba ye.

⁴⁴ A bɛ sutara ni farisogo gwansan ye ka kunun ni nii ka farisogo ye. Ni farisogo gwansan bɛ yen kɔni, nii ka farisogo fana bɛ yen.

⁴⁵ A fɔra Ala ka kuma na ten ko Adama min kɛra mɔgɔ fɔlɔ ye, Ala le y'a kɛ a kɛra mɔgɔ nyanaman ye, Adama laban bɛ nii don mɔgɔw la.

⁴⁶ Min kɛra fɔlɔ ye, o ye farisogo ye, o kɔ nii ka sɔrɔ ka tugu.

⁴⁷ Mɔgɔ min kɔnna ka dan, ale bɔra dugukolo la. Mɔgɔ filanan, ale bɔra sankolo la.

⁴⁸ Mɔgɔ min bɔra dugukolo la, a kɔmɔgɔw kɛra i n'a fɔ ale, mɔgɔ min bɔra sankolo la, ale fana kɔmɔgɔw bɛna kɛ i n'a fɔ ale.

⁴⁹ Mɔgɔ min bɔra dugukolo la, an ye ale cogo ta cogo min na, o cogo kelen na fana, mɔgɔ min bɔra sankolo la, an bɛna ale fana cogo ta.

⁵⁰ Ne bɛ min fɔ n balimaw, o ye nin ye, ko adamaden gwansan tɛ se ka don Ala ka mara kɔnɔ, fɛɛn min ye tolita ye, o fana tɛ se ka tolibaliya sɔrɔ fewu.

⁵¹ Ne bɛ kodogonin dɔ fɔ aw ye ko an bɛɛ tɛna sa, nga an bɛɛ cogo bɛna yɛlɛma le,

⁵² yɔrɔnin kelen dɔrɔn, nyatugu n'a yɛlɛ cɛ, buru laban fiyɛtuma. Ni buru fiyɛra, suuw bɛna kunun ni farisogonyuman ye, an bɛɛ cogo bɛna yɛlɛma.

⁵³ Bari farisogo min bɛ toli, ale ka kan ka kɛ fɛɛn tolibali ye, min bɛ sa ale ka to sabaliya la.

⁵⁴ Farisogo min bɛ toli, n'o sera ka kɛ fɛɛn tolibali ye tuma min na, min bɛ sa n'o sera ka sabaliya sɔrɔ, o waati la min fɔra Ala ka kuma na, o bɛna kɛ. A ko: “See sɔrɔla saya kan.

⁵⁵ Saya, e le ka see bɛ min? Saya, e ka fariyayɔrɔ bɛ min?”

⁵⁶ Saya ka fariyayɔrɔ ye kojugu ye, kojugu ka fanga sɔrɔyɔrɔ ye sariya ye fana.

⁵⁷ An ka barika la Ala ye, ale min bɛ kɛ an bɛ see sɔrɔ an Matigi Yezu Krista barika la.

⁵⁸ O kɔsɔn, ne balima kanuninw, aw ye jija kosɛbɛ, aw kana siran, aw ye taa nya Matigi ka baara la tuma bɛɛ, ka la a la ko aw bɛ baara min kɛra Matigi ye, k'o tɛna kɛ gwansan ye.