Kor fɔlɔ 14 - LAYIDUKURA

Ala bɛ seko minw di mɔgɔ ma, Pɔli bɛ kuma o koo la

¹ Aw ka jija ka nyɔgɔn kanu, Ala bɛ seko minw di, aw k'olu nyini fana, sanko kirayako,

² bari mɔgɔ min bɛ kuma kaan wɛrɛ la, o tigi tɛ kumana adamaden fɛ, nga a bɛ kuma Ala le fɛ. Tinyɛ na, mɔgɔ si t'o kaan nin mɛnna, a bɛ kodogonin le fɔ Nii Senuman barika la.

³ Nga mɔgɔ min bɛ kirayako kɛ, o tigi bɛ kumana mɔgɔw fɛ, a bɛ olu dɛmɛ k'u ladi ani k'u jaa gwɛlɛya.

⁴ Mɔgɔ min bɛ kaan wɛrɛ fɔ, o tigi b'a yɛrɛ le dɛmɛna, nga min bɛ kiraya kɛ, o tigi bɛ Ala ka jama le dɛmɛna.

⁵ A ka di ne ye aw bɛɛ ka kaan wɛrɛw fɔ, nga mɔgɔ min bɛ kiraya kɛ, o le ka di ne ye ka tɛmɛ. Min bɛ kiraya kɛ, o tigi ka fisa ni kaan wɛrɛ fɔla ye, fɔɔ n'o tigi ye kuma nin kɔrɔ fɔ, waasa Ala ka jama ka se ka dɛmɛ sɔrɔ.

⁶ N balimaw, n'a kɛra ko ne tun nana aw fɛ ka kuma aw fɛ kaan wɛrɛ la, min tɛ koo dɔ yira, n'a tɛ lɔnniya d'aw ma, ni kirayakuma t'o la, n'a t'aw kalan fana, o bɛna mun le nya aw ma?

⁷ An ka fɔlikɛminanw koo filɛ, i n'a fɔ filen ani kolonjo. Ni olu mankan tɛ danna danna, mɔgɔ bɛna se k'a faamu cogo di ko filen bɛ nin le fɔra, walima kolonjo bɛ nin le fɔra?

⁸ Ni buru fiyɛta ma kangwɛnin fɔ, mɔgɔ jumɛn le bɛn'a yɛrɛ labɛn kɛlɛ kama?

⁹ Aw fana, n'aw ka kuma ma kɛ kumagwɛnin ye, mɔgɔw bɛn'a kɛ cogo di k'aw ka kuma mɛn? Aw ka kuma bɛ kɛ gwansan ye.

¹⁰ Ne y'a lɔn ko kaan caaman bɛ dinyɛ kɔnɔ, o bɛɛ bɛ n'u kɔrɔ ye.

¹¹ Ni mɔgɔ min bɛ kumana ne fɛ ni ne t'ale ka kaan mɛnna, o tigi bɛ kɛ siya wɛrɛ ye ne fɛ, ne fana bɛ kɛ siya wɛrɛ ye o tigi fɛ.

¹² Aw kɔni, Nii Senuman bɛ seko minw di, olu nigɛ b'aw la kosɛbɛ, o ka kɛ Ala ka jama ka nyataga kɔsɔn.

¹³ O le kɔsɔn, mɔgɔ min bɛ kaan wɛrɛ fɔ, o tigi ka Ala dali waasa a k'o kuma nin kɔrɔ fɔli see d'a ma.

¹⁴ Ni ne bɛ Ala dali kaan wɛrɛ la, ne nii lo bɛ dalili kɛ nga ne hakili tɛ foyi kala ma.

¹⁵ Ne ka kan ka mun le kɛ sa? Ne bɛna to ka dalili kɛ ni n nii ye, ka dalili kɛ ni n hakili ye fana. N bɛna to ka dɔnkili la ni n nii ye, ka dɔnkili la ni n hakili ye fana.

¹⁶ N'i bɛ Ala dalila n'i nii dama ye, mɔgɔ minw siginin bɛ k'i lamɛn, olu bɛn'a kɛ cogo di ka amiina fɔ i ka dalili bannin kɔ, bari e bɛ min fɔra, ale t'o mɛnna.

¹⁷ Tinyɛ lo, e bɛ barika la Ala ye sɛbɛsɛbɛ la, nga i tɔnyɔgɔn ma foyi sɔrɔ.

¹⁸ Ne bɛ barika la Ala ye, ne bɛ kaan wɛrɛ fɔ ka tɛmɛ aw bɛɛ kan.

¹⁹ Nga lajɛnni yɔrɔ la, a ka di ne ye ka dakuru nyaa duuru dama fɔ minw kɔrɔ lɔnnin lo mɔgɔ fɛ, sanni ne ka dakuru nyaa waa tan fɔ kaan wɛrɛ la.

²⁰ N balimaw, aw ka miiricogo faan fɛ, aw kana kɛ denmisɛnw ye tugu. Kojugu faan fɛ, ɔnhɔn, aw ka kɛ i n'a fɔ denmisɛnw, nga aw ka miiriya la, aw ka kɛ mɔgɔkɔrɔbaw ye.

²¹ A fɔra Ala ka kuma na ko: “N bɛna tɛmɛ siya wɛrɛw fɛ ka kuma mɔgɔ nunu fɛ. N bɛna kuma u fɛ lonanw barika la. O bɛɛ n'a ta, u tɛna ne lamɛn.” Matigi ko ten.

²² O cogo la, kaan wɛrɛ fɔko kɛra taamasinyɛ ye Alalɔnbaliw fɛ, nga a ma kɛ taamasinyɛ ye Krista ka mɔgɔw fɛ. Kiraya fana kɛra taamasinyɛ ye Krista ka mɔgɔw fɛ, nga a ma kɛ taamasinyɛ ye Alalɔnbaliw fɛ.

²³ N'a kɛra ko Ala ka jama bɛɛ ye nyɔgɔn lajɛn, ni bɛɛ tora ka kaan wɛrɛ fɔ, ni mɔgɔ gwansan walima Alalɔnbali dɔ nana don aw cɛma, ale tɛn'a fɔ ko aw kɛra fatɔw ye wa?

²⁴ Nga n'a kɛra ko bɛɛ bɛ kiraya le kɛra, o Alalɔnbali nin, walima mɔgɔ gwansan nin bɛn'a yɛrɛ cogoya lɔn, ko ale ye kojugukɛla ye.

²⁵ O tigi ka koo dogonin bɛna ye, fɔɔ a bɛn'a kunbiri gwan ka Ala bato ani k'a fɔ ko: “Tinyɛ na, Ala bɛ n'aw ye!”

Ala batocogo

²⁶ Ne ka mun le fɔ sa n balimaw? N'aw bɛ lajɛnni na, ni mɔgɔ dɔ b'a fɛ ka dɔnkili la, o k'o la. Ni kalan bɛ dɔ wɛrɛ fɛ, ale ka mɔgɔw kalan. Ni koo yirata bɛ dɔ wɛrɛ fɛ ka bɔ Ala fɛ, o k'o fɔ. Dɔ b'a fɛ ka kuma kaan wɛrɛ la wa? O tigi k'o kɛ. Ni mɔgɔ dɔ bɛ se k'o kɔrɔ fɔ, o tigi k'o fɔ. O koo bɛɛ ka kan ka kɛ waasa mɔgɔ bɛɛ ka taa nya.

²⁷ Ni mɔgɔ dɔw bɛ kaan wɛrɛ fɔra, mɔgɔ fila k'o fɔ, walima mɔgɔ saba, o ka fisa, nga u ka kuma kelen kelen, mɔgɔ dɔ k'o kɔrɔ fɔ.

²⁸ N'o kuma kɔrɔfɔbaga tɛ yen, o tigi ka je. A ka to ka kuma a yɛrɛ kɔnɔ Ala fɛ.

²⁹ Min kɛra kirayako ye, mɔgɔ fila walima saba ka kirayakuma fɔ, tɔw k'o kɔrɔ sɛgɛsɛgɛ.

³⁰ Ni Ala ye fɛɛn dɔ yira mɔgɔ dɔ la, mɔgɔ min bɛ kumana, o tigi ka je.

³¹ Aw bɛɛ bɛ se ka kirayakuma fɔ kelen kelen ten, waasa mɔgɔ bɛɛ ka faamuli sɔrɔ ani ka jagwɛlɛya sɔrɔ.

³² Ka kira to a ka kiraya la, a bɛ se k'a yɛrɛ minɛ.

³³ Bari Ala ma kɛ koferekenin tigi ye, nga hɛrɛtigi lo.

³⁴ Muso ka kan ka je lajɛnni yɔrɔw la i n'a fɔ a bɛ kɛ Ala ka jama cɛma yɔrɔ bɛɛ la. Sira ma d'u ma ka kuma, olu ka kan ka to yɛrɛmajigiliya la, i n'a fɔ a fɔra Ala ka sariya la cogo min na.

³⁵ N'u b'a fɛ ka koo dɔ faamu, u ka kan k'u cɛɛw nyininga soo kɔnɔ. N'o tɛ, a daganin tɛ muso ka kuma Ala ka jama cɛma.

³⁶ O tuma na, Ala ka kuma sɔrɔla aw fɛ le wa? Walima aw dama le y'a sɔrɔ k'a mɛn?

³⁷ Ni mɔgɔ dɔ b'a miiri ko ale ye kira ye, walima a ye see dɔ sɔrɔ Nii Senuman barika la, ne bɛ koo minw fɔra aw ye, o tigi ka sɔn o ma ko Matigi ka sariya lo.

³⁸ Ni mɔgɔ min banna o ma, Ala banna o tigi ma.

³⁹ O cogo la ne balimaw, aw ka kiraya le nyini, aw fana kana kaan wɛrɛ fɔko bali.

⁴⁰ Nga koo bɛɛ ka kan ka kɛ ka nya ani ka kɛnyɛ n'o kɛcogo ye.