Kor fɔlɔ 12 - LAYIDUKURA

Nii Senuman bɛ seko min di

¹ N balimaw, Nii Senuman ye seko minw di mɔgɔw ma, ne t'a fɛ aw ka kɛ kolɔnbaliw ye olu faan fɛ.

² Aw y'a lɔn ko aw tun tɛ Ala lɔn tuma min na, aw tun bɛ tugura joow kɔ dɔrɔn minw tɛ se ka kuma yɛrɛ.

³ O le y'a to ne b'a fɔ aw ye ko mɔgɔ si tɛ se k'a fɔ Ala ka Nii Senuman barika la ko: “Yezu danganin lo,” ani mɔgɔ si tɛ se k'a fɔ fana ko: “Yezu ye Matigi ye” n'o ma kɛ Nii Senuman barika la.

⁴ Seko sifa caaman bɛ yen, nga Nii Senuman kelen le b'o di.

⁵ Baara sifa caaman fana bɛ yen, nga Kuntigi kelen le b'o la.

⁶ Koo kɛcogo caaman bɛ yen, nga ale Ala kelen lo b'o bɛɛ kɛcogo di bɛɛ ma.

⁷ Nii Senuman bɛ seko di mɔgɔ kelen kelen bɛɛ ma, mɔgɔ bɛɛ ka makonya kama.

⁸ Nii Senuman ye see di dɔ ma ka kuma ni hakilitigiya ye, ka see di dɔ wɛrɛ ma ka koo fɔ ni lɔnniya ye.

⁹ O Nii Senuman nin ye jigi di dɔ ma, ka banabagatɔw kɛnɛyali see di dɔ wɛrɛ ma.

¹⁰ A ye kabako kɛ see di dɔ ma, ka dɔ wɛrɛ kɛ kira ye, ani ka see di dɔ ma a ka se ka Nii Senuman ka kɛwali faranfasi ka bɔ jinaw ta la. A ye see di dɔ ma ka kaan wɛrɛw fɔ, ka see di dɔ wɛrɛ ma k'o kɔrɔ fɔ.

¹¹ Nga Nii Senuman kelen le b'o koo bɛɛ kɛ see di mɔgɔ kelen kelen bɛɛ ma ka kɛnyɛ n'a yɛrɛ sago ye.

Farikolo ye kelen ye nga yɔrɔ caaman b'a la

¹² Yɔrɔ caaman bɛ mɔgɔ farikolo la, o bɛɛ n'a ta, u bɛɛ lajɛnnin le ye farikolo kelen ye, hali u n'u ka caya bɛɛ. Krista bɛ o cogo la fana,

¹³ bari an bɛɛ le batizera Nii Senuman kelen le barika la, an ka se ka kɛ farikolo kelen ye, k'a ta Zuwifu ma wo, walima siya wɛrɛ wo, jɔɔn, walima hɔrɔn wo, o Nii Senuman kelen lo bɛ an bɛɛ fɛ.

¹⁴ Farikolo yɔrɔw ka ca, yɔrɔ kelen dama tɛ.

¹⁵ Ni seen tun y'a fɔ ko ale ma kɛ bolo ye, o la, ko ale tɛ farikolo yɔrɔ dɔ ye, o bɛ se k'a niin bɔ farikoloya la wa?

¹⁶ Ni tulo tun y'a fɔ ko ale ma kɛ nyaa ye, o la, k'ale tɛ farikolo yɔrɔ dɔ ye, o bɛ se k'a niin bɔ farikoloya la wa?

¹⁷ Ni farikolo bɛɛ tun ye nyaa ye, a tun bɛna to ka mɛnni kɛ cogo di? Walima n'a bɛɛ tun ye tulo ye, a tun bɛna kasa mɛn cogo di?

¹⁸ Nga Ala ye farikolo yɔrɔ kelen kelen bɛɛ sigi a la, ka kɛnyɛ n'a yɛrɛ sago ye.

¹⁹ Ni mɔgɔ farikolo tun kɛra yɔrɔ kelen ye, a tun tɛ kɛ fɛɛn dafanin ye.

²⁰ Yɔrɔ caaman bɛ farikolo la, nga farikolo kelen lo.

²¹ Nyaa tɛ se k'a fɔ bolo ye k'ale mako tɛ bolo la, ani kungolo fana tɛ se k'a fɔ seenw ye k'ale mako tɛ olu la.

²² Nga farikolo yɔrɔ minw bɛ jati k'u ka dɔgɔ, olu le koo ka gwɛlɛ fana.

²³ Farikolo yɔrɔ minw tɛ foyi ye, an bɛ olu le jati kosɛbɛ. Minw koo yɛrɛ tɛ se ka fɔ, an bɛ olu minɛ ni cogonyuman ye kosɛbɛ,

²⁴ k'a sɔrɔ bonya ka kan ka la minw kan, olu t'a sɔrɔ. Ala ye farikolo dilan ka bonya di a yɔrɔw ma minw man kan n'a ye,

²⁵ waasa farali kana sɔrɔ farikolo la, nga farikolo yɔrɔ kelen kelen bɛɛ ka janto nyɔgɔn na.

²⁶ Ni farikolo yɔrɔ dɔ bɛ tɔɔrɔla, tɔ nunu fana bɛ tɔɔrɔ n'a ye. Ni kelen ye bonya sɔrɔ, tɔw fana bɛ jɛn n'a ye ka nisɔndiya.

²⁷ Aw kɛra Krista farikolo ye, aw y'a farikolo yɔrɔw ye, kelen kelen bɛɛ n'a ta.

²⁸ Ala ye mɔgɔ minw sigi a ka jama cɛma, o ye nunu ye: a fɔlɔ, cidenw, a filanan kiraw, a sabanan karamɔgɔw, o kɔ, kabako kɛli see dira minw ma, ani banabagatɔw kɛnɛyali, ni mɔgɔ dɛmɛli, ni nyamɔgɔya, ani see dira minw ma ka kaan wɛrɛw fɔ.

²⁹ Mɔgɔ bɛɛ le kɛra cidenw ye wa? U bɛɛ le ye kiraw ye wa? U bɛɛ le ye karamɔgɔw ye wa? Walima u bɛɛ le bɛ se ka kabakow kɛ wa?

³⁰ U bɛɛ le bɛ se ka banabagatɔw kɛnɛya wa? U bɛɛ le bɛ se ka kuma kaan wɛrɛw la wa? Walima u bɛɛ le bɛ se k'o kaan wɛrɛw kɔrɔ fɔ wa?

³¹ Ala ka seko minw ka fisa, aw k'o nyini. Sisan, ne bɛna sira dɔ yira aw la min ka fisa.