Kor fɔlɔ 11 - LAYIDUKURA

¹ Aw ka kɛ ne ladegebagaw ye, i n'a fɔ ne fana kɛra Krista ladegebaga ye cogo min na.

Musow ka yɛrɛ minɛcogo Ala ka jama cɛma

² Ne bɛ barika la aw ye bari aw hakili bɛ to ne la waati bɛɛ, ne ye koo minw bɛɛ fɔ aw ye, aw y'o labato ka nya.

³ Ne b'a fɛ aw ka nin faamu kosɛbɛ: cɛɛ kelen kelen bɛɛ kuntigi, o ye Krista ye, muso fana kuntigi y'a cɛɛ ye, Krista kuntigi ye Ala ye fana.

⁴ Cɛɛ o cɛɛ min bɛ Ala dali walima n'a bɛ kiraya kɛra, ni fugulan b'a kuun na, a b'a ka kuntigi le dɔgɔya.

⁵ Nga muso o muso min bɛ Ala dali walima n'a bɛ kiraya kɛra, n'a ma fani biri a kuun na, o muso nin b'a kuntigi le dɔgɔya. A kɛra i n'a fɔ a y'a kunsigi le li.

⁶ Ni muso min tɛ fani biri a kuun na, ale ka kan k'a kunsigi tigɛ. Ni k'i kunsigi tigɛ walima k'a li, n'o kɛra maloyako ye muso ma, a ka fani biri a kuun na.

⁷ Cɛɛ man kan ka fugulan biri a kuun na, bari ale ye Ala jaa, n'a bonyafɛn ye, nga muso, ale y'a cɛɛ ka bonyafɛn ye.

⁸ Bari mɔgɔ dantuma na, cɛɛ ma bɔ muso la, nga muso le bɔra cɛɛ la.

⁹ Cɛɛ ma dan muso kama, muso le danna cɛɛ kama.

¹⁰ Mɛlɛkɛw kɔsɔn, muso ka kan ka fani biri a kuun na min b'a yira ko a kɛra mɔgɔ dɔ ta ye.

¹¹ O bɛɛ n'a ta, muso tɛ se ka faran ka bɔ cɛɛ la, ani cɛɛ fana tɛ se ka faran ka bɔ muso la, Matigi nyakɔrɔ.

¹² Muso bɔra cɛɛ la cogo min na, o cogo kelen na fana muso bɛ cɛɛ wolo. O bɛɛ bɛ bɔ Ala la.

¹³ Aw yɛrɛ ka nin koo sɛgɛsɛgɛ aw yɛrɛ ma, a daganin lo muso ka Ala dali n'a m'a kuun datugu wa?

¹⁴ Adamaden ka kɛcogo yɛrɛ t'a yira ko cɛɛ min b'a kunsigi to a bɛ janya, o tigi b'a yɛrɛ maloya wa?

¹⁵ Nga muso fɛ, a kɛra bonyafɛn ye, bari kunsigi dir'a ma ka kɛ a kuun datugufɛn ye.

¹⁶ Ni mɔgɔ dɔ b'a fɛ ka sɔsɔli kɛ o koo la, anw, ni Ala ka jama ma deli o la.

Dumuni min bɛ kɛ k'i hakili to Matigi koo la

¹⁷ Ni ne bɛ n daa don koo tɔw la, n tɛ se k'aw tando, bari aw ka nyɔgɔnlajɛn t'aw nafa, fɔɔ k'aw cɛn.

¹⁸ A fɔlɔ, ne b'a mɛnna ko n'aw ye nyɔgɔn lajɛn tuma min na, aw bɛ faranfaran ka kɛ danna danna. N bɛ miiri ko a bɛ se ka kɛ tinyɛ ye, ko aw tilannin lo jɛnkulu jɛnkulu ye.

¹⁹ Tilannin yɛrɛ ka kan ka kɛ aw cɛma, janko mɔgɔsɛbɛw ka se ka lɔn.

²⁰ N'aw bɛ nyɔgɔn lajɛn dumuni senuman kɛtuma na, aw t'a kɛ a kɛcogo la.

²¹ N'aw b'a dumu tuma min na, mɔgɔ kelen kelen bɛɛ b'a ta ta k'a dumu fɔlɔ, dɔ bɛ minni kɛ ka fa, k'a sɔrɔ a tɔnyɔgɔn bɛ kɔngɔ la.

²² O tuma na, soo t'aw fɛ n'aw bɛ se ka dumuni, ani minni kɛ yen wa? Walima aw b'a fɛ ka Ala ka jama ni faantanw dɔgɔya wa? Ne ka kan ka mun fɔ aw ye tugu? K'aw tando wa? Ayi, ne tɛ se k'aw tando nin koo nyɔgɔn na.

²³ Ne ye min sɔrɔ Matigi fɛ, k'aw kalan o la, o filɛ: suu min na u ye Matigi Yezu don mɔgɔjuguw bolo, a ye buru ta,

²⁴ ka barika la Ala ye k'a tilantilan. O kɔ, a y'a fɔ ko: “Nin ye ne farisogo ye, o min dira aw kɔsɔn, aw k'o dumu k'aw hakili jigi ne koo la.”

²⁵ U ye dumuni kɛ ka ban tuma min na, a ye duvɛn ta fana ka barika la Ala ye, o kɔ, a ko: “Nin ye ne joli ye, Ala ka layidukura tara ni min ye. Tuma o tuma n'aw b'o min, aw k'aw hakili jigi ne koo la.”

²⁶ Bari tuma o tuma n'aw y'o buru nin dumu k'o duvɛn nin min, aw bɛ Matigi ka saya le koo fɔ, fɔɔ a ka kɔsegi ka na.

²⁷ O le y'a to ni mɔgɔ dɔ ye Matigi ka buru dumu walima k'a ka duvɛn min cogo bɛnbali la, o tigi bɛ kojugu kɛ Matigi farisogo n'a joli la.

²⁸ O la, mɔgɔ kelen kelen bɛɛ k'a yɛrɛ sɛgɛsɛgɛ, ka sɔrɔ ka buru nin dumu ani ka duvɛn nin min,

²⁹ bari mɔgɔ min b'o dumuni nin kɛ k'o minni nin kɛ, n'o tigi m'a jati ko Matigi farisogo lo, a b'a yɛrɛ jalakiko le kɛra ten.

³⁰ O le y'a to mɔgɔ caaman farikolo cɛnnin bɛ aw cɛma, ni banabagatɔ caaman, ani mɔgɔ dɔw sara fana.

³¹ N'anw b'anw ka koow sɛgɛsɛgɛ an yɛrɛ ma, anw tɛna kiti tugu.

³² Nga Matigi b'anw ladi, waasa anw ni dinyɛ kana kori ka jalaki nyɔgɔn fɛ.

³³ O cogo la ne balimaw, n'aw bɛ nyɔgɔn lajɛn k'o dumuni kɛ tuma min na, aw k'aw tɔnyɔgɔnw kɔnɔ.

³⁴ Ni kɔngɔ bɛ mɔgɔ dɔ la, o tigi ka dumuni kɛ a fɛ soo, waasa aw kana nyɔgɔn lajɛn k'aw yɛrɛ jalakiko kɛ. Ka taa koo tɔw faan fɛ, ni n nana na yen, n bɛna olu nyanabɔ.