Kor fɔlɔ 10 - LAYIDUKURA

Ladili min bɛ bɔ Isirayɛli ka koo la

¹ N balimaw, ne t'a fɛ aw ka to nin koo lɔnbaliya la. An faaw bɛɛ taamana sankaba kɔrɔ, u bɛɛ sera ka tɛmɛ Kɔgɔjiwulen na.

² U bɛɛ jɛnna ni Musa ye ka tɛmɛ kɔgɔji kɔnɔ ani sankaba kɔrɔ.

³ U bɛɛ fana ye dumuni kelen sɔrɔ ka bɔ Ala fɛ k'o dumu.

⁴ U bɛɛ fana ye jii sɔrɔ ka bɔ Ala fɛ, u y'o sɔrɔ ka bɔ kabakuru la min bɔra Ala fɛ, k'o min, o min tun bɛ tugura u kɔ, ale tun ye Krista ye.

⁵ Nga u caaman ka koo ma se ka diya Ala ye, o la, u sara kongokolon kɔnɔ.

⁶ O koo nunu kɛra ka yira an na, waasa an fana kana miiri kojugu kɛli la tugu, i n'a fɔ olu.

⁷ Aw kana kɛ josɔnlaw ye i n'a fɔ u dɔw y'a kɛ cogo min na. A fɔra ten Ala ka kuma na ko: “Jama sigira waasa ka dumuni kɛ ani ka minni kɛ, o kɔ, ka wili ka nyanagwɛ.”

⁸ An kana kɛ kakalaw ye, i n'a fɔ u dɔw tun y'a kɛ cogo min na. O la, loon kelen dɔrɔn, mɔgɔ waa mugan ni saba sara u cɛma.

⁹ An kana Matigi kɔrɔbɔ, i n'a fɔ u dɔw y'a kɛ cogo min na, saaw y'u faga.

¹⁰ Aw kana ;nunu;nunu fana, i n'a fɔ u dɔw ;nunu;nununa cogo min na ni halakilikɛfɛn y'u faga.

¹¹ O koo nunu sera u ma, waasa ka koo dɔ nyaa yira, ani u sɛbɛnna waasa k'an kalan, an minw bɛ waati laban na.

¹² O cogo la, ni mɔgɔ min bɛ miiri ko ale lɔnin b'a seen kan, o tigi k'a yɛrɛ kɔlɔsi a kana ben!

¹³ Kɔrɔbɔli minw y'aw sɔrɔ, o bɛɛ nyɔgɔn delila ka adamaden sɔrɔ. Ala ye kantigi ye, ale tɛna sɔn aw ka kɔrɔbɔ fɔɔ ka taa tɛmɛ aw barika danyɔrɔ kan. Ni kɔrɔbɔli sera, a bɛna bɔyɔrɔ d'aw ma ani ka barika don aw la ka se k'o munyu.

Jɛnnyɔgɔnya tɛ anw ni Sutana cɛ

¹⁴ O le y'a to ne balimaw, aw ka faran josɔn na.

¹⁵ Ne bɛ kumana aw fɛ ten bari aw ye hakilitigiw ye. Aw k'o kuma kɔrɔ sɛgɛsɛgɛ aw yɛrɛ ma.

¹⁶ An bɛ barika la Ala ye filen dubaman min kɔsɔn, ka sɔrɔ k'a min, ale t'an jɛn ni Krista ye a joli bɔnko la wa? An bɛ buru min tilantilan, o fana t'an jɛn ni Krista farisogo ye wa?

¹⁷ Buru ye kelen ye, an minw ye mɔgɔ caaman ye, an kɛra farisogo kelen ye, bari an bɛɛ bɛ kori o buru kelen le kan.

¹⁸ Aw ka Isirayɛlidenw koo filɛ, mɔgɔ minw bɛ sarakafɛnw dumu, jɛɛn bɛ olu ni Ala cɛ, bari sarakabɔyɔrɔ ye a ta ye.

¹⁹ Ne t'a fɛ k'a fɔ ko josɔnfɛnw ni joow ye fɛɛn nyanamanw ye dɛ.

²⁰ Ayi, olu ka sɔnnifɛnw kɛra jinaw ta ye, u ma kɛ Ala ta ye, o la, ne t'a fɛ aw ka jɛnnyɔgɔnya sɔrɔ ni jinaw ye.

²¹ Aw tɛ se ka minni kɛ ni Matigi ka filen ye, ka tila ka minni kɛ ni Sutana ta ye fana. Aw fana tɛ se ka Matigi ka dumuni kɛ ka tila ka Sutana ta kɛ.

²² Walima an b'a fɛ ka Matigi darabɔ wa? See b'an ye ka tɛmɛ ale kan wa?

An ka bonya la Ala tɔgɔ kan

²³ Dɔw ko mɔgɔ bɛ se ka koo bɛɛ kɛ. Nga o bɛɛ ma nyi. Tinyɛ lo, fɛɛn bɛɛ bɛ se ka kɛ. Nga o bɛɛ tɛ se ka mɔgɔ dɛmɛ.

²⁴ Mɔgɔ si kan'a yɛrɛ nafa nyini, nga mɔgɔ kelen kelen bɛɛ k'a tɔnyɔgɔn ta le nyini.

²⁵ Fɛɛn minw bɛɛ bɛ feere lɔgɔ la, aw k'o bɛɛ dumu, aw kana sigasiga ka nyiningali caaman kɛ.

²⁶ Bari a fɔra Ala ka kuma na ko: “Dugukolo ye Matigi ta ye ani fɛɛn minw bɛɛ b'a kan.”

²⁷ Mɔgɔ min ma la Ala la, n'a y'i wele dumuni na a fɛ, n'i taara, n'o ye dumuni fɛɛn o fɛɛn sigi i kɔrɔ, i k'a dumu, i kana sigasiga ka nyiningali caaman kɛ,

²⁸ nga ni mɔgɔ dɔ y'a fɔ i ye ko josɔnfɛn lo, i kan'a dumu o tigi kɔsɔn, n'a ka miiriya kɔsɔn.

²⁹ Ne tɛ kumana e yɛrɛ koo la dɛ, nga ne bɛ kumana mɔgɔ dɔ nin ta koo le la. Mɔgɔw le b'a fɔ ko: “Mun na mɔgɔ wɛrɛ bɛna ne jalaki ne ka hɔrɔnya kɔsɔn?

³⁰ Ni ne bɛ barika la Ala ye ka sɔrɔ ka dumuni kɛ, mun na mɔgɔ dɔ bɛna ne tɔgɔ cɛn o fɛɛn nunu kɔsɔn?”

³¹ Ayiwa, aw bɛ dumuni kɛra wo, aw bɛ minni kɛra wo, aw bɛ fɛɛn o fɛɛn min kɛ, aw k'o bɛɛ kɛ ka bonya la Ala kan.

³² Aw kana kɛ sababu ye ka mɔgɔ si kunnacɛn, a kɛra siya wɛrɛ ye wo, walima Zuwifu ye wo, walima Ala ka jama wo, aw kana kɛ sababu ye u si ma.

³³ O cogo la fana, ne bɛ jija koo bɛɛ la waasa ne ka se ka mɔgɔ bɛɛ ladiya. Ne tɛ n yɛrɛ nafa nyini, nga mɔgɔ caaman ta, waasa olu ka se ka kisi.