Kor fɔlɔ 1 - LAYIDUKURA

Pɔli ka foli Korɛntikaw ma

¹ Ne Pɔli min welela ka kɛ Yezu Krista ka ciden ye Ala sago la, ani an balimacɛ Sɔsitɛnɛ,

² bɛ bataki nin ci Ala ka jama ma min bɛ Korɛnti dugu kɔnɔ, Yezu Krista ye minw wele k'u saniya ka kɛ Ala ta ye. A fana cira mɔgɔ bɛɛ ma, olu minw bɛ yɔrɔ bɛɛ la n'u bɛ an Matigi Yezu Krista bato, olu ka Matigi lo, ani an fana ta lo.

³ An Faa Ala n'an Matigi Yezu Krista ka nɛɛma ni hɛrɛ kɛ aw ye.

Pɔli bɛ barika la Ala ye

⁴ Ne bɛ barika la Ala ye tuma bɛɛ aw kɔsɔn, bari a ye nɛɛma kɛ aw ye Yezu Krista barika la.

⁵ Ale barika la aw kɛra fɛɛn bɛɛ tigiw ye, aw bɛ kuma lɔn kosɛbɛ, lɔnniya fana b'aw fɛ.

⁶ Bari Krista koo min fɔra aw ye, o ye sigiyɔrɔ sɔrɔ aw kɔnɔ.

⁷ K'aw to an Matigi Yezu Krista nalon makɔnɔni na, Ala bɛ seko minw di, aw ma dɛsɛ o si la.

⁸ Ala kelen le bɛ barika don aw la fɔɔ ka taa se an Matigi Yezu Krista nalon ma, jalakiyɔrɔ kana sɔrɔ aw la o loon na.

⁹ Ala ye kantigi ye. A y'aw wele ka kɛ a Dencɛ an Matigi Yezu Krista ka jɛnnyɔgɔnw ye.

Nyɔgɔntilantilan min bɛ sɔrɔ Ala ka jama cɛma

¹⁰ Ne b'aw dali n balimaw, an Matigi Yezu Krista tɔgɔ kɔsɔn ko aw k'aw daa kɛ kelen ye, farali kana sɔrɔ aw cɛma. Aw ka miiri ka kɛ kelen ye aw ka kolatigɛnin bɛɛ la.

¹¹ Bari n balimaw, ne y'a mɛn Kulowe ka somɔgɔw fɛ, ko bɛnbaliya bɛ aw ni nyɔgɔn cɛ.

¹² O kɔrɔ ko aw dɔw b'a fɔ k'olu ye Pɔli ka kalandenw ye, dɔ wɛrɛw k'olu ye Apolɔsi ta ye, dɔw fana k'olu ye Sefasi taw ye, dɔ wɛrɛw fana k'olu ye Krista taw ye.

¹³ O tuma na, Krista tilannin lo wa? Yala Pɔli gwengwenna lɔgɔ kan aw kɔsɔn wa? Aw batizera Pɔli tɔgɔ la wa?

¹⁴ Ne bɛ Ala tando bari ne ma mɔgɔ si batize aw cɛma, fɔɔ Kirisipusi ani Gayusi.

¹⁵ O cogo la, mɔgɔ si tɛ se k'a fɔ ko aw batizera ne tɔgɔ la.

¹⁶ Aa! Ne ye Sitefana ka somɔgɔw batize fana, o kɔfɛ sa, ne hakili t'a la ni ne ye mɔgɔ wɛrɛ batize tugu.

¹⁷ Bari Krista ma ne ci ka mɔgɔ batize, a ye ne ci ka kibaru diman le fɔ, ne kana o kɛ ni ne yɛrɛ ka hakilitigiya kuma ye, janko Krista ka saya gwengwenlɔgɔ kan kana kɛ gwansan ye.

Ala ka koo ma kɛ dinyɛ koo ye

¹⁸ N'u bɛ kuma Krista ka saya koo la gwengwenlɔgɔ kan, o ye fatɔyakuma ye mɔgɔ dɔw fɛ o minw bɛ halaki sira kan. An minw bɛ kisili sira kan, an fɛ kɔni, Ala ka sebagayako lo.

¹⁹ Bari a fɔra Ala ka kuma na ko: “Ne bɛna lɔnnikɛlaw ka lɔnniya cɛn, ka hakilitigiw hakili nyagami.”

²⁰ Lɔnnikɛla bɛ min? Kalanfa bɛ min? Mɔgɔ minw bɛ koo bɛɛ lɔnniya nyinina bii dinyɛ na, olu bɛ min? Ala ma dinyɛ nin ka lɔnniya yɛlɛma k'o kɛ nalomanya ye wa?

²¹ Tinyɛ lo, dinyɛ n'a ka lɔnniya bɛɛ, a ma se ka Ala lɔn a ka lɔnniya baara la. O la, minw lara Ala la, a diyara a ye ka olu kisi, waajuli barika la, o min kɛra nalomanyako ye dinyɛ mɔgɔw fɛ.

²² Zuwifuw, olu mako bɛ kabako kɛli la, girɛkiw, olu bɛ lɔnniya le nyinina.

²³ An bɛ Krista gwengwenko fɔra. O kɛra kunnacɛnko ye Zuwifuw fɛ, ka kɛ nalomanyako ye siya wɛrɛw fɛ.

²⁴ Nga Ala ye mɔgɔ minw wele, a kɛra Zuwifu ye wo, girɛki lo wo, olu fɛ kɔni, Krista ye Ala ka sebagaya n'a ka lɔnniya le ye.

²⁵ Bari Ala ka nalomanyako ka fisa ni mɔgɔ ka hakilitigiyako ye, Ala ka barikatanya fanga ka bon ni adamaden ka barikatigiya ye.

Ala ye mɔgɔ minw woloma

²⁶ Aw k'aw yɛrɛ filɛ kɛ n balimaw, aw minw ye Ala ka weleli mɛn ka sɔn a ma, adamaden ka miiriya la, lɔnnikɛla caaman tɛ aw cɛma, ni fangatigiw, ani mɔgɔbaw.

²⁷ Nga koo min kɛra nalomanyako ye dinyɛ mɔgɔw fɛ, Ala y'o le ta ka hakilitigiw malo n'a ye. Barika tɛ fɛɛn minw na dinyɛ na, Ala ye olu le woloma ka fangatigi dabari ban n'o ye.

²⁸ Adamadenw tɛ fɛɛn minw jati, ani u bɛ minw dɔgɔya, o minw tɛ foyi ye u nyana, Ala ye olu le woloma ka fɛɛn jatitaw kɛ fɛɛn gwansan ye,

²⁹ waasa adamaden si kana se k'a yɛrɛ bonya Ala nyakɔrɔ.

³⁰ Nga ale le barika la aw kɛra Yezu Krista jɛnnyɔgɔnw ye, an ye lɔnniya sɔrɔ ale barika la ka bɔ Ala fɛ, ale fana sababu la an kɛra mɔgɔtilenninw ye Ala nyakɔrɔ ka kɛ a ta ye, ani mɔgɔhɔrɔnyaninw.

³¹ O cogo la, “mɔgɔ min b'a fɛ k'a yɛrɛ bonya, o tigi k'a yɛrɛ bonya Matigi barika la,” i n'a fɔ a fɔra Ala ka kuma na cogo min na.