तीतस 3 - जिरेलयेशू ख्रीष्ट मिओनगी च्यिला लेमु काम खिता फाप्कीते 1 थेमे ज्येनोङ बात थेरू येशू ख्रीष्ट मिओनला च्यि सिन लोबे सासीन लुङबादु राज्य खित्कानताङ ज्येन छ्ये छ्ये मि अधीनला देत्ला नियम कानून ङेन्दा फाप्क्यो थेमे लेमु काम खित्च्ये छ्य्वापाकामा सेम खिता फाप्क्यो सिरच्येते बात टोक माज्येत सिन सि। 2 थेबेकी मेन्दे बातला सुङलाङ दोष लै खिता मेङगो, गाङेताङ डिक्ला थुन्ला देता फाप्क्यो, सुङताङ स्येदाङ मिक्किता खाला गाङेताङ खा छ्येत लेमु खिता फाप्क्यो सिन सि। 3 गोमाबा ङुरूङोङ सो साकान पशु च्योकराङ ओतान। ङुरूङगी परमेश्वरगी साबाते खाङोङ बात माङेन, ङुरूङ ङ्येकीन गाला ओतान। थेजीन ङुरूङ दोक माक्याबाला ओङराङ मेङगो सिराच्योक खाला दाक्पोन सेमला लाबा लाबा खिता ओङच्या मेङच्या कामओन खिन ओतान। ङुरूङ जहिलेङ मेलेबाकामा खिन थेमे ज्येनला डार खिन ओतान। दोक खाला ङुरूङ गाङे नाङ दोक्पोईकी ज्येनज्यीकला मिगी थोङसार्मु खित्च्येतेकामा खिन ओतान। 4 ङुरूङ थोक मेलेबा खिन ओता ईन्सीनोङ ङुरूङला पापदुकी डेल्कान्ते परमेश्वरगी ङिङज्ये खाईन थे खोरोङ दयेकी येशू ख्रीष्टला ताङगीन 5 ङुरूङला पापकी सजायदुकी टाल्सुङ। थेकी थोक खाबाते ङुरूङगी थेकी खि साबा साबाच्योक खाबेकी खित्सादु मेन। ङुरूङला आउदी खाला ङिङज्ये खितेकी खित्सादुकामा थेकी थोक खाबाते ईन। थेकी ङुरूङला ठु खाईन चोके खाबाच्योक खाईन परमेश्वर आत्मे छ्य्वापेकी लोईन केर च्युताच्योक खाईन साम्बाते जुनी बिन्गीन खुदुक जोसुङ। 6 ङुरूङला पापदुकी डेल्कान्ते येशू ख्रीष्टकी खाबाते कामगी खित्सादु परमेश्वरगी ङुरूङला दोस्यिक थोस्यिक सिरा मुथुप्च्या खाईन तेरासम्म परमेश्वर आत्मा बिन्दा ओत। 7 दोक खाईन थेकी ङुरूङला दया खाईन दोषी मेन सिन साबा ओतेकी ङुरूङगी आश खाईन गुकीन देताते थेकी तेरग्यो साबाते नोमुङ मिसिन्च्येते जुनी ङेत्च्या ओङा ओत। 8 दि बात साँच्चीराङ ईन्दाते बात ईन। थोगी ङा खोल्ला च्यि सिते सासीन परमेश्वरला विश्वास खित्कान्ते थेरू मिओनगी लेमुते काम खित्च्ये छ्य्वापाकामा सेम लै खाला थोकराङ खित्स्यीत सिन थेबाला दि बात दोरे खाला खाला लाप्ला बिन। दि बात लेमु ईन्देकी मिओनगी ङेन्सुङ सासीन गाङेला लेमु ओङगो। 9 तर बात खाला नोमुङ डिक्पा मुथुप्च्येते छ्याःङ काम लै मिक्किच्येते थाङबो थाङबोमे वंशावली बातओन खित्च्येते थेमे परमेश्वर नियम बात खाला टेकाटेउरी खिन थोम्मु खित्च्येतेचेन नोमुङ माकेत। थोक्ते बात खाला डिक्च्येतेताङ सुइँदाला लेमु ओङच्येते सिराते नोमुङ छ्याःङ मेङगो। 10 सत्यते बातताङ डिकराङ मिडिक्च्येते होथोक्ते बात खाला परमेश्वरला विश्वास खित्कान्तेबे नाङ फाटो स्योर ज्युत्कान्ते मिला थोक्ते बात मालोप सिन सि। थेकी थोकराङ खिन देत्सीन थोक माकेत सिन खुई याङराङ पालोई सि। थोक खित्जीनोङ नामज्योक मासेत्सीन थोक्ते मित्ताङ साङराङ माकेत। 11 दाक्पोनगी मेलेबा काम खिन ओत सिन छ्या ओत्कीन ओत्कीनोङ सत्यते बात ङेन्दा ताङगीन थे पापला नुप्कीन सिन्दाते मि ईन सिन खोल्ला छ्या मेताते मेन। थेकी थोक खाबेकी खित्सादु थे गोःनामा परमेश्वर सजाय फाप्क्यो। पावलगी चिट्ठी टिला सिन्दे खाला साबाते बात 12 थेमे ज्येन बात च्यि सासीन था ङा दुरूकी अर्तिमासताङ टाइकिकस नाङ दोक्पोईला थेपा तोङगो। थेबे नाङ दोक्पोई जो वासीनोङ थेपा ख्योल्नामेई जस्तो खालाङ खोचेन निकोपोलिस सारनापा स्योक। च्यिला सासीन था गुनगी बेलाला ङे थेपा देत्च्येते टुङ्गो खाबा ओत। 13 थेमे नियम बात लेमु खाला स्येकान्ते जेनास थेमे अपोल्लोसला थेपेई ख्याम्जीन लामला छ्याःङ दुक्पा मेङस्यीत सिन थेबाला गोच्येते जेसुकै दाङच्या दुकाना मिन्दुका सिन लेमु खाला ताला थोङ। 14 दोक खाला सुङगीङ दाक्पोनला छ्याःङ काम लै मिक्किच्येते मि मिसिरस्यीत सिन येशू ख्रीष्ट मिओनगीचेन सुइँदाला खाँचो परे खाबे बेलाला खइँदा तेरा फाप्सीन थोक खिता फाप्च्याक्वा सिन गाङेकी लोप्स्यीत। 15 दुरू ङात्ताङ ओताते गाङेकी खोल्ला नमस्ते ओत्लो। येशूला विश्वास खिन ङ्योकोनला ङिङज्ये खित्कान्ते थेरू ओतातेबा गाङेला ङ्योकोनते नमस्ते ओत्लो सि। प्रभु येशू ख्रीष्टकी ख्योकोन गाङेला दया खिनराङ देत्स्यीत। |
© 1992 Wycliffe Bible Translators Inc. All rights reserved.
Wycliffe Bible Translators, Inc.