तीतस 1 - जिरेल1 दि चिट्ठी टिक्कान्ते ङा पावल ईन। ङा परमेश्वर काम खित्कान्ते मि ईन। थेमे ङा येशू ख्रीष्टकी खटे खाबाते मिङ ईन। परमेश्वरगी थे खोरोङ मि सिन छाने खाबाते मिओनगी झन लेमु खाला थेला विश्वास खिता थुप्स्यीत थेमे सत्यते बात लेमु खाला छ्या स्येला झन थेला लेमु खाला माने खिता थुप्स्यीत सिन थेबाला लाप्ला कोत्ला तेरच्येते जिम्मा ङाला बिन्दा ओत। 2 ङे थेबे नाङ दि काम खित्जीन थेबेकी नोमुङ मिसिन्च्येते जुनी ङेत्क्यो सिरच्येते बात पक्काराङ ईन सिन आश खाला गुला देता थुप्क्यो। दोक खाला मिओनला नोमुङ मिसिन्च्येते जुनी तेरग्यो सिन परमेश्वरगी थाङबो जुगलाराङ साबा ओतान। थेकी नोमुङ ढाँर मिक्किओ। 3 थाङबोका साबाते बात परमेश्वरगी थे खोरोङगी तोके खाबे बेलाला लोप च्युत्कीन मिओनला छ्या स्ये च्युत्सुङ। ङुरूङला पापदुकी डेल्कान्ते परमेश्वरगीराङ दि बात च्यि ईन्दे सिन ज्येन मिओनला लोप सिन ङाला दि कामगी जिम्मा बिन्दा ओत। 4 दि चिट्ठीचेन ङा तीतस खोल्ला टिगीन ओत। खोङ ङे च्योकराङ खाला प्रभु येशू ख्रीष्टला विश्वास खित्कान्ते ईन्देकी ङाला खो ङाराङ फुज्युङ च्योकराङ लाङगीदुक। आबा परमेश्वरगी थेमे ङुरूङला पापदुकी डेल्कान्ते येशू ख्रीष्टकी खोल्ला दया खाला लेमु खिनराङ देत्स्यीत। तीतसला क्रेटदु च्यि च्यि खिता फाप्कीते सिन साबाते 5 बात च्यि सासीन ङा क्रेट लुङबादुई ख्याम्जीन थेरू थोरूमोङ खिता फाप्च्येते कामओन खिताला थेमे सार सारला गाल्ला येशू ख्रीष्ट मिओनला ताकान्तेबाला ङे साबा च्योकराङ खाला छाने खाला ज्य्वाबालाराङ ङे खोल्ला थेरू देत साबा ओतान। 6 येशू ख्रीष्ट मिओनला ताकान्ते मिचेन सुङगीङ दिकी दि दि गल्ती खाबा ओत सिन साबा मेताज्यीक ओङा फाप्क्यो। थेते फेम्मेज्यीककामा ओङा फाप्क्यो। थे फुज्युङ फुमुतेबाङ येशूला विश्वास खित्कान ओङा फाप्क्यो। थे फिजाओन बानी बिवारा थोङला सुङगीङ थेबाला मनपरी खिन ख्याम्कान्ते थेमे आबा आमेकी लाःपा कोताते मेङेन्कान्ते ईन सिन सिरा मुथुप्च्येतेन्दे ओङा फाप्क्यो। 7 दोक खाला येशू ख्रीष्ट मिओनला ताकान्ते छ्येते मिकीचेन परमेश्वरगी खि साबाते काम खित्च्येते ईन्देकी सुङगीङ दिकी दि दि गल्ती खाबा ओत सिन साबा मेताज्यीक ओङा फाप्क्यो। थोक्ते मि दाक्पोन बातलाकामा जिद्धी मिक्किकानज्यीक, होत्ता स्येदाङ मिक्किकानज्यीक, छ्याङ रक्सी काल्बा मुथुङकानज्यीक, मिला लाःक मोतोङकानज्यीक थेमे सम्पत्ति ज्वाप सिन पैसे लोभला मुस्यूक्कानज्यीक ओङा फाप्क्यो। 8 बरू थोक्ते मिचेन डोम्बोताङ फार छुर ख्याम्कान मिओनला लेमु खित्कानज्यीक, लेमु कामकामा खिता सेम खित्कानज्यीक, दाक्पोन सेम काबूला ज्य्वाबा थुप्कानज्यीक, खिता मेङच्येते काम सिराते छ्याःङ मिक्किकानज्यीक, परमेश्वरला मन परे खित्च्येते कामकामा खित्कानज्यीक थेमे दाक्पोन सेमला लाबा लाबा मिक्किकानज्यीक ओङा फाप्क्यो। 9 दोस्यिककामा मेन, थोक्ते मिचेन सत्यते बात दाक्पोनला जस्तो खाईन लाप्कीन बिन्ला दुक थोकराङ खाला ङेन्गीन देत्कानज्यीक ओङा फाप्क्यो। थोक खानामेकी थेकी ज्येनतेबेकी खाङ बात ङेन्दा फाप्च्येते ईन्दे साला लाप्ला बिन्ला थेबाला थोकराङ खि सिन लोपा थुप्क्यो। थेमे थे बातताङ डिकराङ मिडिक्च्येते बात खित्कान्ते मिओनला ख्योकोनगी मेन्दे बात लोप्कीन दुक साला हगे हगे ज्य्वाबा थुप्क्यो। 10 थरिङोला थेपा थोक खाला ङेन्दा फाप्च्येते बातताङ मिडिक्च्येते बात लोप्कान्ते मि काल्बेई दुक। थेबेकी सुङगीङ बात मेङेन्दा खाला खालि छ्याःङ काम लै मिक्किच्येते बातओन लाप्ला येशूला विश्वास खित्कान्ते मिओनला छक्के खिओ। दोक खित्कान्तेबा काल्बा च्योक्ते जीउला खतकी चिनु जोकान्ते यहूदीराङ ईन। 11 होथोक्ते मिओनला दोक्ते बात मालोप साला थेबे खा टाले खिता फाप्क्यो। च्यिला सासीन थेबेकी मिओनला लोपा मेङच्येते बात लापेकी होथेबे बात ङेन्गीन येशू ख्रीष्ट मिओन नाङ खाम्बा थोई थोई मिकी ङेन्दा फाप्च्येते बात ङेन्दा ताङला दुक। थेबेकीचेन छ्याःङ ङोचा मिक्किता खाला खालि पैसा ज्वाप्की लाईदु होथोक्ते बात लोप्च्येते ईन। 12 तिरी ओङच्येते बात खित्कान्ते मिज्यीगी थे खोरोङ लुङबे मिओन बात खिन च्यि साबा ओताने सासीन “क्रेटीओनचेन जहिलेङ ढाँर खित्कान्ते ईन। थेबाताङ जहिलेङ च्येन थोमताङ च्योकराङ खाला ज्यीबा खिता फाप्क्यो। थेबाचेन सिन्काई च्याक्ला ङि मेताते खालि सापकामा छोल्कान्ते ईन,” सिन साबा ओतान। 13 थे मिकी साबाते दि बात पक्काराङ ईन। थोगी होथोक्ते ङेन्दा मेङच्येते बात ङेन्कान्ते मिओनगी येशूला विश्वास खिन ङेन्दा फाप्च्येते बात लेमु खाला ङेन्स्यीत सिन छ्याःङ ज्यीबा मिक्किता खाला थेबाला होथोक्ते बात ङेन्दा थोङ, थोक माक्यासीन लेमु मेङगो सिन सि। 14 थोक खाला थेबेकी थे यहूदीओनगी जोला लोप्च्येते छ्याःङ काम लै मिक्किच्येते बातताङ कथाओनला नामज्योक मेसेत्स्यीत थेमे सत्यते बात मेङेन्कान्ते मिओनगी ङेन्दा फाप्क्यो सिन साबाते रीतिथिति माने खिता तोङस्यीत सिन होथोक खि। 15 सेमला मेलेबा मेताते मिओन लाईदु दि सा मेङगो, दि खिता मेङगो सिरच्येते रीतिथिति छ्याःङ मेन। थोक्ते मिओनगी होदोक्ते रीतिथिति माने माक्यासीनोङ पा मोफोगो। येशूला विश्वास मिक्किकान, सेमला पाप ओताते मिओनगीचेन दि सोसीन, दोक खासीन पा फोइओ सिरच्येते ईन्देकी थोक्ते मिओन लाईदु जेसुकै मेलेबाराङ ओङगो। खोपरोङ सेम लेमु मेतेकी खिता मेङच्येते काम खासीनोङ थेबाला छ्याःङ मेलेबा खाबाच्योक मालाङो। 16 खोपरोङ होथोक्ते मि ईन्सीनोङ थेबेकीचेन परमेश्वर सु ईन्दे, चुक्ते ईन्दे सिन ङ्योकोनला लेमु खाला छ्या ओत सिन सिओ। थेबे काम ताला थेबा परमेश्वरला माने खित्कान्ते मि मेन सिन दाक छ्या स्येक्यो। थेबाला थोङजीन परमेश्वरला गा मालाङो, थेबेकी परमेश्वरगी साबाते ङेनराङ मेङेनो थेमे लेमु काम सिराते छ्याःङ खिताराङ मुथुबो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.