रोमी 6 - जिरेलयेशू ख्रीष्टकी खित्सादु पापदुकी ठाल्च्येते बात 1 परमेश्वरगी मिओनला दया खित्च्येते बात दोकराङ ईन्सीनका थोरूमोङ ङुरूङगी पाप खिनराङ देता लेमु ईन्दासीन। च्यिला सासीन दोक खित्जीनका ङुरूङगी खाबाते पाप माफ खिताला परमेश्वरगी झन दया खित्च्येते मौका ङेत्च्याक्वा सिन ङुरूङगी सिरा मेङगो। 2 ङुरूङगी पाप खिन देता मेङगो। था पापकी लाईदु ङुरूङ स्याप छेतराङ गाल्गीन सिन्दा ओत। दोक ईन्देकी ङुरूङगी चुक खाला थोरूमोङ पाप खिनराङ देता थुप्कीते? दोकनी खिताराङ मुथुबो। 3 दि बादोङ ख्योकोनगी छ्या मास्येबाते मेन। च्यि सासीन ङुरूङला छ्युला लुक्ला बप्तिस्मा तेरजीन ङुरूङ गाङेराङ येशू ख्रीष्टताङ जीउज्यीकराङ ओङगीन थेत्ताङराङ स्याप्ते ईन। 4 थोक खाला बप्तिस्मा तेरजीन ङुरूङ थेत्ताङराङ स्यिइन दिबाते ईन। आबा परमेश्वरगी थे खोरोङ छ्येज्यीक शक्तिकी ख्रीष्टला स्यिसादुकी सोम्बो लोक्पा ओत। था ङुरूङगी गोमाबा खाबाच्योक पाप मिक्किता खाला थे खोरोङगी खि साबा च्योकराङ खिता थुप्स्यीत सिन परमेश्वरगी ख्रीष्टला बिन्दा च्योक्ते साम्बाते जुनी ङुरूङलाङ बिन्दा ओत। 5 थोक खाईन ख्रीष्ट स्यिजीन ङुरूङोङ थेत्ताङ जीउज्यीकराङ ओङगीन स्याप्ते ईन्देकी परमेश्वरगी थेला स्यिसादुकी सोम्बो लोक्पा ओतेकी थेकी ङुरूङलाङ दाक थेला च्योकराङ खाला सोम्बो लोइओ। 6 लोक्ला दि बादोङ ङुरूङला छ्या ओत। च्यि सासीन ख्रीष्टला स्यिङगी थामला टाँए खाला सेत्जीन ङुरूङते मेलेबा कामताङ बात खित्च्येते बानी खुदुक गाल्ला पाप खिता तोङस्यीत सिन ङुरूङलाङ थेत्ताङराङ टाँए खाईन सेताते ईन। ङुरूङलाङ थेत्ताङराङ सेताते साबातेचेन ङुरूङ गोमा च्योकराङ सेम मेलेबा ओताते मि मेन साबाते ईन। दोक खाईन था ङुरूङ सेम लेमु गाला ओतेकी ङुरूङगी गोमा खिन ओताच्योक खाला पाप खिन देताराङ माफाबो। 7 च्यिला सासीन स्याप्ते मिकी छ्याःङ पाप खिता मुथुबो। स्याप्ते मिला दोक खि, थोक माकेत सिन सिराराङ मुथुबो। 8 दोक खाईन ङुरूङ येशू ख्रीष्टताङराङ स्याप्ते ईन्देकी था ङुरूङगीङ दाक थेकी ङेता च्योक्ते जुनी ङेत्ला थे च्योकराङ खाला देता ङेत्क्यो। 9 चुक खाला सासीन परमेश्वरगी ख्रीष्टला स्यिसादुकी सोम्बो लोक्पा ओत। थे याङराङ नोमुङ मिस्यिओ। था थेला कालगी छ्याःङ खिता मुथुबो। 10 येशू ख्रीष्टचेन मिओनगी ङेत्च्येते पापकी सजाय भोगे खाईन स्यिसुङ। पालोई थे थोक खाईन स्यिइन सिन्दा ओतेकी था थेकी दि काम याङराङ खिता माफाबो। स्यिसादुकी सोम्बो लोगीन थेनी परमेश्वरताङ नोमुङ ठाला माफाप्च्या खाईन देता ओत। 11 होदि बातओन सम्झे खाला था ख्योकोनगी पापकी लाईदु खेराङ स्याप छेतराङ ईन्देकी गोमाबा च्योक पाप खिन देता माफाबो। बरू येशू ख्रीष्टताङ जीउज्यीकराङ ओङगीन था ख्योकोन परमेश्वरगी खि साबा साबा च्योकराङ खिता थुप्क्यो सिरच्येते बात छ्या स्येबा खि। 12 थोगी दाक्पोन खुशी खाला मेलेबा कामताङ बात खिन देता माफाप्स्यीत सिन था पालोई स्यिला दि जीउ रूल्ला डुइओ सिन सम्झे खाला पाप खिता थोङ। 13 च्यि सासीन गोमाबा ख्योकोनगी खेराङ लाक्पाताङ खेकी खित्सादु, मिगी तासादु, खेराङ सेमगी खित्सादु मेलेबाते कामताङ बात खिन ओतान। थोक खाला ख्योकोनगी परमेश्वरगी साबाते मेङेन्गीन ओतान। था थोक खिता थोङ। बरू खेराङ स्यिसादुकी सोम्बो लोगीन साम्बाते जुनी ङेताते मिओन ईन्देकी परमेश्वरगी खि साबाते ङेन्ग्यो सिन खेराङ जुनी थे लाःक्तुराङ सोम्पे खि। थोक खासीन खेराङ लाक्पाताङ खेकी खित्सादु, मिगी तासादु पाप खिता माफाबो। परमेश्वरगी खि साबा च्योकराङ लेमु काम खिता थुप्क्यो। 14 ख्योकोनगी था पाप खिन देता माफाबो। च्यिला सासीन था ख्योकोन परमेश्वर नियम अधीनला मेत। परमेश्वरगी दया खाबेकी थानी ख्योकोन थे अधीनलाका ओत। ङुरूङगी था पाप खिन देता मेङगो 15 परमेश्वर नियम अधीनला मेन, परमेश्वरगी दया खाबेकी थे अधीनलाका ओतेकी था ङुरूङगी थे नियम मेङेन्दा खाला जे खासीनोङ ओङगीतासीन सिनोङ ङुरूङगी सिरा मेङगो। पाप सिराते ङुरूङगी खिताराङ मेङगो। 16 दाक्पोन खुशीकीराङ ज्येन मि काम खित गाल्नामेई थे मिकी मालिकतेकी कोताते मिक्किओ सिरा मेङेदो। जे खि सासीनोङ थेकी ङेन्दाराङ फाप्क्यो सिन ख्योकोनला छ्याराङ ओत। होदि बात च्योकराङ ख्योकोनगी पाप खासीन ख्योकोन पापकी योक्पो च्योकराङ ओङला पाप खिन देता फाप्क्यो। दोक खिन देत्नामेई ख्योकोन पापकी सजाय ङेत्ला स्यिइओ। परमेश्वरला दाक्पोन मालिक सिन थेकी साबाते ङेन्सीनचेन थेकी ख्योकोनला सजाय मेतेरा खाला दोषी मेन सिओ। 17 गोमा ख्योकोन पापकी योक्पो च्योकराङ ओता ईन्सीनोङ थाचेन ख्योकोनगी खेराङला लापाते परमेश्वर बात सत्यते दुका सिन लेमु खाईन ङेन्गीन थेरू खि साबा च्योकराङ खिताला स्यूसुङ। ख्योकोन दोक खुदुक गालाते बातकी लाईदु परमेश्वरला धन्यवाद तेरगी। 18 थोक खाईन परमेश्वरगी ख्योकोनला पाप खित्च्येते बानीदुकी टाल्गीन बिन्दा ओतेकी था ख्योकोनगी थेकी साबा साबा ङेन्दा फाप्क्यो। 19 ख्योकोनगी लेमु खाला खोबा थुप्स्यीत सिन ङे दुरू मालिकताङ योक्पो बात खाबाते ईन। गोमा पापकी योक्पो च्योकराङ ओत्जीन ख्योकोनगी खिता ओङच्या मेङच्या जेसुकै ङोचा लाङच्येते काम थेमे परमेश्वरगी माकेत साबाते ज्येनोङ मेलेबा काम खिन ओतान। थेजीन ख्योकोन बोली, काम, बानी जेङ मेलेबा ओतान। गोमाबा होथोक्ते मेलेबा मेलेबा काम खाबा च्योकराङ थाचेन ख्योकोनगी परमेश्वरगी खि साबा साबा ङेन्ला थेकी खि साबाते खित्च्ये छ्य्वापाकामा स्येत खि। थोक खानामेई ख्योकोनते बोली, काम, बानी गाङे लेमु गाल्ला ख्योकोनगी परमेश्वरला मन परे खित्च्येते कामताङ बात खिओ। 20 गोमा ख्योकोन पापकी योक्पो च्योकराङ ओते बेलाला ख्योकोनगी परमेश्वरगी खि साबाते काम छ्याःङ खिता थुपा मेतान। 21 थेजीन खेराङगी चुक चुक खाबा ओताने सिन सम्झे खाला थरिङोला खेराङराङ ङोचा खिदुक। थोक खाला परमेश्वरगी माकेत साबाते काम खित्जीन ख्योकोनगी च्यि ङेता ओताने? थेजीन ख्योकोनगी खाबाते कामगी खित्सादुचेन ख्योकोन पापकी सजाय ङेत्ला स्या फाप्च्या ओङा ओतान। 22 तर परमेश्वरगी ख्योकोनला पाप खित्च्येते बानीदुकी टाल्गीन बिन्दा ओतेकी था ख्योकोनगी थेकी साबाते ङेन्ला थेला मन परे खित्च्येते कामताङ बात खिता थुप्क्यो। दोक खाईन परमेश्वरगी खि साबाच्योक खिन गाल्नामेई ख्योकोनगी नोमुङ मिसिन्च्येते जुनी ङेत्क्यो। 23 बातचेन दिराङ ईन। च्यि सासीन पाप खाबेकी खित्सादु मिकी पापकी सजाय ङेत्ला स्या फाप्क्यो। ङुरूङ प्रभु येशू ख्रीष्टताङ जीउज्यीकराङ ओङाते मिओनलाचेन परमेश्वरगी दया खाला नोमुङ मिसिन्च्येते जुनी तेरग्यो। |
© 1992 Wycliffe Bible Translators Inc. All rights reserved.
Wycliffe Bible Translators, Inc.