रोमी 13 - जिरेलराज्य खित्कान्तेबे अधीनला देत्च्येते बात 1 थोरूमोङ च्यि सासीन लुङबाला राज्य खित्कान्ते मि गाङेला परमेश्वरगीराङ थोक खित्च्येते अधिकार बिन्दाते ईन्देकी ख्योकोन गाङेराङ थेबे अधीनला देता फाप्क्यो। परमेश्वरगी थेबाला थोक खित्च्येते अधिकार माबिन्दा ईन्सीन थेबा सुङ ज्येनला राज्य खित्कान्ते मि ओङा थुप्च्या मेतान। 2 परमेश्वरगीराङ थेबाला राज्य खित्च्येते अधिकार बिन्दा ओतेकी थेबे विरोध खित्कान्ते मिओनगीचेन थेबाला थे काम खित ज्युत्कान्ते परमेश्वर विरोध खाबाते ईन। जो जसकी दोक खिदुक थेबेकी सजाय भोगे खिता फाप्क्यो। 3 लुङबे नियम ङेन्ला लेमु काम खित्कान्ते मिओनगीचेन सजाय ङेत्कीता सिन छ्याःङ ज्यीबा खिता माफाबो। मेलेबा काम खित्कान्तेबेकीचेन ज्यीबा खिता फाप्क्यो। थोगी ख्योकोनला राज्य खित्कान्तेबाताङ ज्यीबा मिक्किता खाला देता सेम ओत्सीन लुङबे नियम ङेन्ला लेमु काम खि। दोक खासीन थेबा सुङगीङ ख्योकोनला मेलेबा काम खासुङ सिन मिसिरो। 4 खेराङला सुङगीङ मेलेबा मिक्किस्यीत सिन ताप्ला थेमे मेलेबा खित्कानला सजाय तेराला परमेश्वरगी थेबाला खटे खाबाते ईन। ख्योकोनगी लेमु काम माक्यासीनचेन ख्योकोनला सजाय तेरच्येते अधिकार थेबे लाःक्तुराङ ओत सिन च्याङबो खाला देत। परमेश्वरगी थे खोरोङ साटोला सजाय तेरच्येते अधिकार थेबाला बिन्दा ओतेकी थेबेकी सजाय तेरच्येते ईन। 5 बात दोक ईन्देकी ख्योकोनगी खालि सजाय ङेत्कीता सिरच्ये ज्यीबेकीकामा मेन, लुङबे नियम ङेन्च्येते लेमुराङ ईन सिन साला लुङबाला राज्य खित्कान्ते मिओन अधीनला देत। 6 थेबे अधीनला देतेकीराङ ख्योकोनगी तिरोङ ज्येल्च्येते ईन। तिरो ज्येल्च्येते ठीकराङ ईन। च्यिला सासीन थेबे कामचेन जहिलेङ जनताला लेमु मेलेबा चुक दुका तेइन परमेश्वरगी खोपरोङला जिम्मा बिन्दाते काम खिन देत्च्येते ईन। 7 थोगी खेराङगी सुला चुक खिता फाप्कीका थेमे च्यि च्यि तेरा फाप्कीका थे काम लेमु खाला खि। च्यि सासीन तिरो दुत्कान्तेबाला तिरो छ्योल, कर ज्येला फाप्सीन थेङ छ्योल थेमे लुङबाला राज्य खित्कान्ते मिओनला मान खिता लेमु ईन सिन थेबाला मान खि। ङुरूङगी ज्येनला चुक खिता फाप्कीते 8 खेराङगी ज्येला फाप्च्येते साबा साबे बेलाला गाङे छ्योल। सुङगीतेङ छ्याःङ बाँकी माज्यो। थे लाक्तुङ ख्योकोनगी खिनराङ देता फाप्च्येते कामज्यीक ओत। थेचेन ज्येनतेबाला ङिङज्ये खित्च्येते ईन। ज्येनतेबाला ङिङज्ये खित्कान्ते मिकीचेन परमेश्वरगी बिन्दाते नियम गाङे ङेन्दाते ईन। 9 परमेश्वर नियमला “रन्डीबाजी खिता मेङगो, मि सेता मेङगो, क्वा मेङगो, ज्येनगीते सिराते छ्याःङगीतेङ लोभ माकेत,” सिन साबा ओत। थेमे दोक्ते नियम ज्येनोङ ओत। दोक्ते नियम जति ओत्सीनोङ “दाक्पोन ज्यानला माया खिता च्योकराङ खाला ज्येनलाङ ङिङज्ये खि,” सिन साबाते नियमज्यीक नाङराङ होदि नियम गाङे फाप्क्यो। 10 दोक खाला ज्येनतेबाला ङिङज्ये खित्कान्ते मिकीचेन ज्येनला छ्याःङ मेलेबा मिक्किओ। थोगी ज्येनतेबाला ङिङज्ये खित्कान्ते मिओनगीचेन परमेश्वर नियम गाङे लेमु खाईन ङेन्दाते ईन। ङुरूङ दाक्पोन दाक्पोनगी चुक खिता फाप्कीते 11 थेमे ज्येनोङ बात च्यि सासीन था गोमा च्योकराङ मेन सिन ख्योकोनगी विचार खि। काम खिता फाप्च्या ओत सिन ङिक गाल्सादुकी ङिक छेत्ला लाङाच्योक खाला था ख्योकोनगी झन लेमु खाला काम खि। च्यिला सासीन ङुरूङगी गोमा येशू ख्रीष्टला विश्वास खिताला स्यूक्पे बेलाला परमेश्वरगी ङुरूङला पूरो खाला पापदुकी टाल्ला स्वर्गने देताला खेरच्येते समय आदोराङ बाँकी ओतान। थेकी थोक खित्च्येते समय था काल्बा बाँकी मेत। 12 था नुप गाल्गीन नाम लाङा खाबा ओत। थोगी ङुरूङगी ज्येनगी थाहा मेछ्येत्स्यीत सिन मुन्दाकला खित्च्येते च्योक्ते मेलेबाते काम खित्च्येते गाङे तोङा फाप्क्यो। बरू गाङे ङोन्दु ङीमे कार्बोलाराङ खिता ओङच्येते च्योक्ते काम खिताला परमेश्वरगी तेरच्येते हात हतियार चले खिता फाप्क्यो। दोकचेन ङुरूङगी परमेश्वर शक्ति छ्य्वापेकी लेमुते कामकामा खिता फाप्क्यो साबाते ईन। 13 चुक सासीन ङुरूङगी गाङे ङोन्दु खिता ओङच्येते कामताङ बातकामा खिता फाप्क्यो। ज्येनताङ रूला भक्कुचूर सोला थुला मोज मज्जा खित्च्येते, छ्याङ रक्सीकी जिला ख्याम्च्येते थेमे रन्डीबाजीताङ होदि च्योक्ते खिता मेङच्येते ङोचा लाङच्येते काम खिता मेङगो। ज्येनताङ थोम्मु जीङगा खित्च्येते थेमे मिला डार खित्च्येतेङ खिता मेङगो। 14 खेराङला जे जे खिता सेम लाङगीदुक थे थेराङ माकेत। दाक्पोन खुशीला ख्याम्बा लेमु मेन साला बरू ख्योकोनगी जे खासीनोङ प्रभु येशू ख्रीष्टकी खित ज्युता चाला च्योक्तेकामा खि। |
© 1992 Wycliffe Bible Translators Inc. All rights reserved.
Wycliffe Bible Translators, Inc.