रोमी 12 - जिरेलपरमेश्वरला माने खित्च्येते चुक खाला ईन्दे 1 थेमे था आज्यो न्वावे, परमेश्वरगी ङुरूङला थोक आउदी खाईन ङिङज्ये खाबा ओतेकी ङा ख्योकोनला दोक खि सिन सिओ। ओर्च्ये ख्योकोनगी खेराङ जीउ परमेश्वरतेराङ ईन सिन साला थेकी साबा साबा च्योकराङ खिओ सिन थेलाराङ सोम्पे खि। थेला मन परे खित्च्येते भोग बिन्दाच्योक ओङस्यीत सिन ख्योकोनगी होदोक खाला खेराङ जीउ थेला सोम्पे खि। थे खोरोङगी साबाच्योक खाला थेला माने खित्च्येतेङ होदोकराङ खाला ईन। 2 था ख्योकोनगी परमेश्वरला माने मिक्किकान्ते दि सा लुङबे मिओनते च्योक्ते चालचलनताङ बानी बिवारा गाङे थोङ। खेराङ सेम परमेश्वरला खुदुक जोला नाङ साला ख्योकोन सेम लेमु ओताते मि ओङा फाप्क्यो। दोक ओङनामेई परमेश्वरगी खेराङला च्यि च्यि खि सिरच्या ईन्दाका सिन ख्योकोनगी लेमु खाला छ्या स्येबा थुप्क्यो। दोक खाला ख्योकोनगी परमेश्वरला मन परे खित्च्येतेताङ लेमुते काम च्यि ईन्दाका सिन डेला थुप्क्यो। परमेश्वरगी बिन्दाते सीपताङ शक्ति चुक खाला चले खिता फाप्कीते 3 परमेश्वरगी ङाला दया खाईन थे खोरोङ काम खि साबा ओतेकी ङा ख्योकोन गाङेला दि बातओनोङ सिओ। च्यि सासीन खेराङगी च्यि खिता थुप्कीते सिन लेमु खाला विचार मिक्किता खाला ख्योकोन सुङगीङ ङा जेङ खिता थुप्क्यो सिराच्योक खाला छ्ये माकेत। परमेश्वरगी खेराङला च्यि खित्च्येते सीप कि शक्ति बिन्ला दुका ङाला परमेश्वरगी दोस्यिकराङ खि साबाते ईन सिन विश्वास खाला ख्योकोनगी थेकी खि साबा भन्दाङ ल्हाक्पा खिता थुप्क्यो सिराच्योक माकेत। 4 ख्योकोनगी मि जीउकी बातराङ विचार खाला तो। मि जीउलाचेन लाक्पा, काम्बा, मिक, नामज्योक जेसुकै ओङगो। मिक तापकी लाईदु ईन सासीन नामज्योकचेन थोबे लाईदु ईन। होदोकराङ खाला लाक्पा काम्बेतेङ दाक्पोन दाक्पोन काम ओत। ईन्सीनोङ दिबा गाङे जीउज्यीक्तेराङ ईन। 5 ङुरूङ फारगी नाङ बादोङ होदि मि जीउकी बात च्योकराङ ईन। ख्रीष्टताङ जीउज्यीकराङ ओङा ओतेकी ङुरूङोङ गाङेराङ जीउज्यीगी लाक्पा काम्बा च्योकराङ ईन। लाक्पाताङ काम्बेते खुदुक खुदुक काम ओता च्योकराङ दोक्पोईकी ज्येनज्यीकला लेमु खिताला ङुरूङतेङ दाक्पोन दाक्पोनते खुदुक खुदुक काम ओत। 6 परमेश्वरगी दया खाईन ङुरूङला दाक्पोन दाक्पोनला खुदुक खुदुक काम खित्च्येते सीपताङ शक्ति बिन्दा ओत। दाक्पोनताङ च्यि खित्च्येते सीप कि शक्ति ओते ङुरूङगी थे काम लेमु खाला खिता फाप्क्यो। च्यि सासीन परमेश्वरगी ङुरूङ सुइँदाला थे खोरोङगी सिर च्युताते बात खित्च्येते शक्ति बिन्ला दुक सासीन थे मिकी थे कामराङ खिता फाप्क्यो। तर थेकी थे खोरोङगी परमेश्वरला खजो विश्वास खिका थे ताला परमेश्वरगी सिर च्युता च्युता बातकामा सिरा फाप्क्यो, ज्येन बात खिता मेङगो। 7 थेमे सुइँदाला परमेश्वर सन्तान खोपरोङ नाङ काम खित्च्येते सीप बिन्दा ओत्सीन थेकीङ थे कामराङ खिता फाप्क्यो। ज्येनतेबाला परमेश्वर बात लोप्च्येते सीप ङेता ओताते मिकी थे बात लोपा फाप्क्यो। 8 ज्येनला सल्लाह बिन्ला आँट तेरा थुप्कान्ते मिकी ज्येनतेबे नाङ दोक खिता फाप्क्यो। थेमे दुक्पा ङेता ओताते मिओनताङ गोला साच्येते सीप बिन्दा ओताते मिकीङ कुच्यीरी मिक्किता खाला तेरा थुपासम्म तेरा फाप्क्यो। थोकराङ खाला सुइँदाला परमेश्वरगी थे खोरोङ सन्तानओनला ताकान्ते छ्येते मि जोला दुक सासीन थोक्ते मिकीङ अल्छी मिक्किता खाला लेमु खाला थे काम खिता फाप्क्यो। नाबाते थेमे सुङ मेताते गरीब दुःखीला ताच्येते सीप ङेता ओताते मिकीङ सुइँदे करला फाप्कीन खाबाच्योक मिक्किता खाला सोचित्तेकीराङ थे काम खिता फाप्क्यो। दोक्पोईकी ज्येनज्यीकला ङिङज्ये खित्च्येते बात 9 थेमे ख्योकोनगी ज्येनला खेकीकामा मेन, पक्काराङ ङिङज्ये खि। दोकचेन खिताराङ मेङगो सिन मेलेबाते कामताङ बात सिराते छ्याःङ माकेत। खालि लेमुते कामताङ बात खित्च्ये छ्य्वापाकामा स्येत खि। 10 खेराङ गाङेराङ आज्यो न्वा आज्यी नुमु ईन सिन सम्झे खाला दोक्पोईकी ज्येनज्यीकला ङिङज्ये खितरीङ खि, ङा ङाराङ ईन सिराच्योक मिक्किता खाला बरू दोक्पोईकी ज्येनज्यीकला मान खि। 11 प्रभु येशू ख्रीष्टकी खि साबाते काम खिताला नोमुङ अल्छी माकेत। ङा दोक माक्याबाला तोङराङ मोतोङो सिराच्योक खाला थेकी खेराङला खि साबाते काम खिनराङ देत। 12 थेमे परमेश्वरगी ख्योकोनगी आश खाईन देता च्योकराङ खित्च्येते ईन्देकी ख्योकोन गा खिन गुला देत। ज्येनगी दुक्पा तेरजीन थेमे आपत् विपत् आइ परे खित्जीन सेम मेसेता खाला देत। परमेश्वरताङ प्रार्थना खिन देता नोमुङ मातोङ। 13 परमेश्वर सन्तान नाङ दुक्पा ङेतातेबाताङ गोला सो। खाम्बादु वाबाते मि गाङेला लेमु खि। 14 थेमे ज्येनगी खेराङला खेदापानी खित्जीन थोक खित्कान्ते मिओनला मोता सराप माकेत। बरू थेबाला लेमु ओङस्यीत सिन आशी बिन। 15 लोक्ला खोपरोङला साबा च्योक ओङगीन सुइँदा गा खाबा थोङसीन ओहो खोल्ला थोई लेमु ओङका सिन ख्योकोनोङ गा खि। थोकराङ खाला सुइँदाला खइँदा दुक्पा पीर फाप्सीन थोक्ते मिओनला पीर माकेत सिन सम्झे खाला बिन। 16 थेमे ख्योकोन गाङेराङ सेमज्यीकराङ खाला डिक्ला थुन्ला देत। छ्ये मिक्किता खाला दिबाङ सु ईन्देरो सिराच्योक ठाने खाबाते मिओनताङोङ साङ खि। ङा छेतते सुङ मेन सिराच्योक माकेत। 17 दोस्यिककामा मेन, सुइँदेकी ख्योकोनला मेलेबा खासुङ सासीन थेबालाङ थोकराङ खाला किम्बा ज्येल्च्येते माकेत। खेराङला ज्येनगी छ्याःङ दोष लै खिता मेङेत्स्यीत सिन खालि लेमुते कामकामा खि। 18 ज्येनगी जस्तो खासीनोङ थुपासम्म ख्योकोनचेन थेबाताङ डिक्ला थुन्लाराङ देत। 19 ङिङज्येते आज्यो न्वावे, ख्योकोनगी खेराङला मेलेबा खित्कानला नोमुङ स्येदाङ मासेत। थोक्ते मिओनला परमेश्वरगीराङ छ्येन विचार खिओ सिरच्येते बात टोक माज्येत। “ज्येनला मेलेबा खित्कान्तेबाला स्येदाङ सेत्च्येते काम ङेते ईन। ङा सु सुला चुक चुक खिता फाप्कीते थोकराङ खाला किम्बा ज्येल्ग्यो,” सिन प्रभु परमेश्वर थे खोरोङगीराङ साबाते बात परमेश्वर बातला टिबा ओत। 20 लोक्ला परमेश्वर बातलाराङ “खेराङला मेलेबा खित्कान्ते मि त्वाबा तुक्पाराङ देता थोङसीन थेबाला साप थुङा बिन। थेबा कोम्बा खाबा थोङसीन छ्यु थुङा बिन। दोक खासुङ सासीन बैगुनीलाई गुनले मार्नु पर्छ सिराच्योक खाला ख्योकोनगी थोक्ते मिला खर्के देक ज्युत्क्यो,” सिनोङ साबा ओत। बरू ख्योकोनगीचेन परमेश्वर बातला साबाच्योक होदोकराङ खि। 21 खेराङला मेलेबा खित्कान्तेबाला मेलेबा खिता सेम लासीनोङ थोक माकेत। बरू जहिलेङ थेबाला लेमुराङ खि। |
© 1992 Wycliffe Bible Translators Inc. All rights reserved.
Wycliffe Bible Translators, Inc.