रोमी 11 - जिरेलपरमेश्वरगी इस्राएलीओनला ताङा मेताते बात 1 बात दोक दोक ईन्सीनोङ परमेश्वरगी इस्राएलीओनला नोमुङ थे खोरोङ मि ईन सिरा ताङा मेत। थेकी दोक खितराङ मिक्किओ। ङालाराङ ताला विचार खिना। ङाङनी बेन्यामीन थरगी इस्राएलीराङ ईन। थेमे ङे ज्युज्यु अब्राहाम ईन। 2 परमेश्वरगी थे खोरोङ मि ईन सिन छाने खाबाते मिओनला नोमुङ ताङा मेत। परमेश्वर बातला साबाते एलिये पालोला ओङाते दि बात सम्झे खि। थेजीन इस्राएली गाङेराङ परमेश्वर बात मेङेन्कान गाल्गीन सिन्सुङ सिन परमेश्वरताङ बात खिन एलियेकी 3 “ए प्रभु परमेश्वर, लो तो, थेबेकी खुई बात खित्कान्ते मिबरी सेत्कीन सिन्सुङ। थेमे खोल्ला जेसुकै चढे खित्च्येते थानओन खराप खुरूप राम्गीन सिन्सुङ। खुई बात खित्कान्तेबे नाङ था ङाकामा बाँकी ओत। थेमे थेबेकी ङालाङ सेताला छोल्गीन दुक,” सिन साबा ओतान। 4 थोक सिरजीन परमेश्वरगीचेन थेला “मेन मेन, खोकामा मेन, ङाला माने खिता मोतोङकान्ते ज्येनोङ मेरा हजार दुईन ख्योओ मिला ङे टाल्गीन ज्याक्पा ओत। ज्येनतेबेकी च्योक खाईन थेबेकीचेन बालला खोपरोङ ल्हा ईन सिन माने खाबा मेत,” सिन साबा ओतान। 5 थोगी थेजीन च्योकराङ थरिङोलाङ परमेश्वर थे खोरोङ दयेकी छाने खाबाते थेला माने खित्कान्ते इस्राएलीओन टिक्पीस्यिक ओत्कीन ओत। 6 थेबाला थेकी खोपरोङगी खाबाते धर्म कर्मे काम ताकीन छाने खाबाते मेन। थे खोरोङ दयेकी खित्सादुकामा थेकी थेबाला दोक खाबाते ईन। मिकी खाबाते धर्म कर्मे काम ताकीन छाने खाबाते ईन्सीन थेकी थे खोरोङ दयेकी खित्सादुकामा मिओनला छाने खित्च्येते ईन सिन सिरा थुप्च्या मेतान। 7 थोगी इस्राएलीओन बात चुक ईन्दे सासीन थेबेकी परमेश्वरगी खोपरोङला दोषी मेन सिरस्यीत सिन जति दुक्पा खासीनोङ थेकी थेबाला दोषी मेन मासासुङ, खालि थे खोरोङगी छाने खाबाते मिओनलाकामा थेकी दोषी मेन सासुङ। इस्राएली ज्येनबरीचेन परमेश्वर बात सिराते झन छ्याःङ खोबाराङ मुथुप्च्या गाल्सुङ। 8 थेबा थोक डुइओ सिन परमेश्वर बातला “परमेश्वरगीराङ थेबाला छ्याःङ खोबा मुथुप्च्या जोसुङ। थोक ओङेकी मिक ओत्सीनोङ थेबेकी परमेश्वरगी खाबाते काम छ्याःङ थोङराङ मोथोङदुक। थेमे नामज्योक ओत्सीनोङ थेकी खाबाते बात छ्याःङ थोराङ मोथोदुक। थोरूमसाकोङ थेबा होथोकराङ गाल्गीन देत्ला दुक,” सिन टिबा ओतान। 9 गेल्बो दाऊदकीङ चुक साबा ओताने सासीन “भोज सेइन किम्मु खाला देत्ला खुई साबाते मेङेन्कान्ते मि गाङे गोःनामा खुई सजाय फाप्ला थेबा दोक्पोईओङ माथारा खाला स्यिरस्यीत। 10 मिकला छ्यु स्यूबाते च्योक गाल्ला थेबेकी खुई खाबाते काम छ्याःङ मोथोङस्यीत। थेमे योक्पो योङमु ओङला जुनी खाङराङ दुक्पा ङेत्कीन देत्ला थेबेकी नोमुङ छिबा ठाङ खिता मेङेत्स्यीत,” सिन साबा ओतान। ज्येन ज्येन जातकी मिकी छ्ये खिता मेङगो 11 इस्राएलीओन दोक खाईन परमेश्वरगी साबाते मेङेन्कान गाल्सीनोङ था थेबेकी नोमुङ परमेश्वर छ्य्वापा लै खित्च्येते मौका माङेत्ला पापकी सजाय भोगे खिता फाप्क्यो सिनचेन ङे साबाते मेन। बरू बात चुक ईन्दे सासीन थेबेकी थोक खाईन परमेश्वरगी साबाते माङेन्देकी खित्सादु ज्येन ज्येन जातकी मिकीका परमेश्वरगी खोपरोङला पापकी सजायदुकी डेल्ग्यो सिरच्येते बात छ्या स्येच्येते मौका ङेत्सुङ। थेकी थेबाला दि मौका बिन्दा थोङनामेई इस्राएलीओनला स्येदाङ लाला थेबा थे खोरोङ छ्य्वापा लै खाला आशी ङेत्स्यीत सिनराङ परमेश्वरगी दोक खाबाते ईन। 12 थोक खाईन थेबेकी परमेश्वरगी साबाते माङेन्देकी खित्सादु सा लुङबा खाङगी मि गाङेला परमेश्वरगी आउदी लेमु खाबाते ईन। थेमे परमेश्वरगी खोपरोङला तेरग्यो साबाते आशी मोगोओ साबाच्योक खाबेकी ज्येन ज्येन जातकी मिलाका परमेश्वरगी आशी बिन्दाते ईन। इस्राएलीओनगी थोक खाबेकी खित्सादु परमेश्वरगी ज्येन ज्येन जातकी मिला दोक लेमु खासुङ सासीन थेबा गाङेकी परमेश्वरगी साबाते ङेन्सुङ सासीन परमेश्वरगी दि सा लुङबे मि गाङेला आशी बिन्ला झन थोई लेमु खाओङा। 13 था ङा ख्योकोन ज्येन ज्येन जातकी मिला दि बात सिओ। च्यि सासीन ङाचेन ज्येन ज्येन जातकी मिला गा लाङच्येते बात लोपाला येशू ख्रीष्टकी खटे खाबाते मि ईन। ङाराङला जिम्मा बिन्दाते काम खिताला ङा आउदी खुशीङ ओत। 14 च्यिला सासीन ङे ज्येन ज्येन जातकी मि नाङ दि काम खित्जीन परमेश्वरगी थेबालाका लेमु खाबा थोङला ङेराङ जातकी मिओनला स्येदाङ लाङस्यीत। थोक ओङला थेबा दोक्पोई ङिकीकामा ईन्सीनोङ गा लाङच्येते बात ङेन्ला परमेश्वरगी तेरच्येते पापकी सजायदुकी थारस्यीत सिरच्येते ङेते सेम ओत। 15 परमेश्वरगी थेबाला थे खोरोङ मि ईन सिरा ताङनामेई सा लुङबा खाङगी मिला थे खोरोङताङ डिक्पा खिता थुप्सुङ सासीन थेकी याङराङ थेबाला थे खोरोङ मि ईन सिरजीन च्यि झन छ्येज्यीक काम मेङगोतरो? थेकी थेबाला दोक खित्जीन थेबा स्यिसादुकी सोम्बो लोक्पा छेतराङ ईन। 16 इस्राएलीओन बात खित्जीन दि बातओनोङ विचार खि। च्यि सासीन स्योबेन स्येक्जीन गोमा स्येबाते स्योबेन परमेश्वरला चढे खानामेई थे ज्येन्ताक गाङे थेला चढे खाबा छेतराङ ईन। थोकराङ खाला दोङबो चाप्रेन लेमु ओत्नामेईराङ हाँगाओनोङ लेमु ओङच्येते ईन। 17 तर परमेश्वरगी लेमुते जैतुन दोङबो हाँगे नाङ जैतुन मोगोन्च्येते हाँगाओनचेन दुम्गीन क्युरसुङ। थेमे दुम्गीन क्युराते ठाउँदुचेन छ्याङमे नाङला थाराङ केबाते जैतुन दोङबो हाँगा खुलाकीन जोरे खासुङ। थे खोरोङगी साबाते मेङेन्कान्ते इस्राएलीओनला ताङगीन थेबे साटोला परमेश्वरगी ख्योकोन ज्येन ज्येन जातकी मिला थे खोरोङ मि ईन साबाते ईन सिराला ङे दि दोङबो बात खाबाते ईन। थोक खाईन जोरे खाबाते हाँगाओनगी गोच्येते जेसुकै चाप्रेनमेकी ङेता च्योकराङ खाईन परमेश्वरगी थेबे ज्युज्यु पुर्खाला बिन्दाते आशी ख्योकोनलाङ तेरगीन ओत। 18 दोक ईन्सीनोङ ख्योकोन छ्ये खिन थे दुम्गीन क्युराते हाँगाओन साबाते इस्राएलीओनला हेला माकेत। ख्योकोन छ्येराङ खिओ सासीन दि बात टोक माज्येत। च्यि सासीन ख्योकोननी हाँगा च्योक्तेकामा ईन। हाँगेकी खित्सादु चाप्रेन रोम्बो ओङच्येते मेन, चाप्रेनगी खित्सादुका हाँगाओन रोम्बो ओङच्येते ईन। 19 लोक्ला ख्योकोनगी ङ्योकोनला थे खोरोङ मि ईन सिन सिरालाका परमेश्वरगी ज्येन हाँगा जोरे खिताला जैतुन मोगोन्च्येते हाँगाओन दुम्गीन क्युराच्योक खाईन काल्बा च्योक्ते इस्राएलीओनला ताङाते ईन सिन सारोङ। 20 ईन्दानी ईन। तर दि बात टोक माज्येत। च्यि सासीन परमेश्वरगी खोपरोङला येशू ख्रीष्ट छ्य्वापेकी लेमु खिओ सिन पत्ते माक्याबेकी थेकी थेबाला थोक खाईन ताङाते ईन। थेमे ख्योकोनगीचेन थे बात पत्ते खाईन थेला विश्वास खिन देतेकी खित्सादुकामा थेबे साटोला थेकी ख्योकोनला थे खोरोङ मि ईन सिरच्येते ईन। थोगी छ्ये मिक्किता खाला बरू ख्योकोन ज्यीबाका खाला देत। 21 च्यिला सासीन लेमुते जैतुन दोङबो हाँगा च्योकराङ ईन्दाते इस्राएलीओनलानी थेकी थोक खाईन थे खोरोङ मि ईन सिरा ताङसुङ सासीन ख्योकोनगी छ्ये खासीन झन च्यि ख्योकोनलाचेन बाँकी ज्यागोङरो? 22 थोगी दि बात ताला परमेश्वरगी मिओनला कडा खित्च्येतेताङ ङिङज्ये खित्च्येते चुक खाला खित्च्या ईन्दाका सिन ख्योकोनगी लेमु खाला छ्या स्येबा खि। थेला विश्वास मिक्किकान्ते मिओनला थेकी सजाय बिन्सुङ। ख्योकोनलाचेन थेकी ङिङज्ये खिन ओत। थेला विश्वास खिन देत्सीनकामा थेकी ख्योकोनला दोक खिन देत्क्यो। थोक खिता ताङसीन थेकी ख्योकोनलाङ थे खोरोङ मि ईन सिरा तोङगो। 23 लोक्ला परमेश्वरगी येशू ख्रीष्ट छ्य्वापेई लेमु खिओ सिरच्येते बात इस्राएलीओनगी पत्ते खिताला स्यूसीन दुम्गीन क्युराते हाँगा गोमे ठाउँदुराङ खुलाला जोरे खिता च्योकराङ खाला थेकी याङराङ थेबाला थे खोरोङ मि ईन सिओ। परमेश्वरताङ छ्येज्यीक शक्ति ओतेकी दि काम थेकी सजिलो खाला खिता थुप्क्यो। 24 छ्याङमे नाङला थाराङ केबाते जैतुन दोङबो हाँगा खुलाकीन लेमुते जैतुन दोङबोताङ जोरे खिताच्योक खाईन परमेश्वरगी ख्योकोन ज्येन ज्येन जातकी मिला थे खोरोङ मि ईन सिन साबाते ईन। थोक्ते हाँगाओनलानी थेकी खुलाकीन लेमुते दोङबोताङ जोरे खासुङ सासीन गोमा दुम्गीन क्युराते थे दोङबो हाँगाओन याङराङ थेरूराङ खुलाला जोरे खित्च्येतेनी झन आउदी सोई खित्च्येते बातराङ ईन। परमेश्वरगी इस्राएली गाङेला तिरी चुक खिते 25 थेमे याङराङ आज्यो न्वावे, परमेश्वरगी इस्राएलीओनला चुक चुक खिते सिरच्येते बात ख्योकोनगी छ्या स्येस्यीत सिन ङा दि बातज्यीक सिरामीन। दि बात ख्योकोनगी खेराङ बुद्धि खिये खाला छ्या स्येबा मुथुबो। थेकी गोमा सुङलाङ छ्या स्ये च्युता मेताते बात च्यि ईन्दे सासीन काल्बा च्योक इस्राएलीकी परमेश्वरगी साबाते पटक्क ङेन्च्ये सेम माक्यासीनोङ थेबा तिरीसाक दोकराङ खिन मेदेदो। परमेश्वरगी ज्येन ज्येन जातकी मि नाङदुकी थे खोरोङला विश्वास खिओ साबाते मि जति थे खोरोङ छ्य्वापा लै खाईन मासिनथुपकामा थेबा दोक खिन देत्क्यो। 26 थोक ओङगीन सिन्नामेईचेन परमेश्वरगी इस्राएली गाङेला पापदुकी डेल्ग्यो। थोक खिओ सिन परमेश्वर बातला चुक सिन टिबा ओते सासीन “मिओनला पापताङ दुक्पादुकी डेल्कान्तेचेन सियोन सारदुकी ओङगो। थेमे थेकीराङ याकूब सन्तानओनला परमेश्वरला मन परे मिक्किच्येते कामगी छ्य्वापेई डेल्ग्यो,” सिन टिबा ओत। 27 परमेश्वर थे खोरोङगीराङ “ङा ङाराङगी थेबाताङ जमान खाबा च्योकराङ खाला थेबेकी खाबाते पाप माफ तेरग्यो,” सिन साबाते बादोङ परमेश्वर बातला टिबा ओत। 28 गा लाङच्येते बात माङेन्देकी इस्राएलीओन परमेश्वरताङ मिडिक्कान्ते मि ईन। थेबा थोक खाईन थेत्ताङ माडिक्पेकी खित्सादु ख्योकोन ज्येन ज्येन जातकी मिकी गा लाङच्येते बात ङेन्दा ङेताते ईन। थोक ईन्सीनोङ थेबे ज्युज्यु पुर्खा परमेश्वरगी छाने खाबाते मि ईन्देकी थेकी थेबाला ङिङज्ये खिता ताङा मेत। 29 च्यिला सासीन परमेश्वरगी सुइँदाला आशी बिन्ला लेमु खिओ सिन छाने खानामेई खासुङ खासुङ थेकी थे बात नोमुङ खुदुक मोजोओ। 30 गोमाबा ख्योकोनगीङ परमेश्वरगी साबाते ङेन्गीन मेतान। इस्राएलीओनगी थे खोरोङगी साबाते माङेन्नामेकीचेन थेकी ख्योकोनला ङिङज्ये खाबाते ईन। 31 दोक खाईन थरिङोला परमेश्वरगी ख्योकोनला ङिङज्ये खिन ओतेकी इस्राएलीओनचेन थेकी साबाते मेङेन्दा खाईन देत्ला दुक। ईन्सीनोङ ख्योकोनला खाबा च्योकराङ खाला था थेकी थेबालाङ ङिङज्ये खिओ। 32 ईन्दालाचेन इस्राएली ईन्सीनोङ ज्येन ज्येन जातकी मि ईन्सीनोङ मि गाङेकी थे खोरोङगी साबाते माङेन्नामेकी थेकी थेबा थोकराङ खित्स्यीत सिन ताङसुङ। थेबा गाङेला ङिङज्ये खाला लेमु खिताप सिनराङ थेकी थेबाला थोक खाईन ताङा ओतान। परमेश्वर चुक छ्ये ईन्दे सिन साबाते 33 परमेश्वरगी खित्च्येते काम थोई बुद्धि पुरे खाईन खाला दुका। थे च्योकराङ जे बादोङ छ्या स्येकान्ते ज्येन सुङ मेत। थेमे थेकी मिओनला सजाय तेरच्येतेताङ ङिङज्ये खित्च्येते चुक खाला खित्च्या ईन्दाका सिन खोबा चाल्सीनोङ सुङगीङ खोबाराङ मुथुबो। 34 प्रभु परमेश्वर सेमगी बात सुङगीङ छ्या स्येबा मुथुबो। थेमे दि दोक खि, थे थोक खि सिन सुङगीङ थेला सल्लाह तेरा माफाबो। 35 लोक्ला च्यि मिओनगी गोमा थेला खइँदा बिन्लाका परमेश्वरगी किम्बा ज्येलाच्योक खाला मिओनला लेमु खिता फाप्च्येते ईनरो? अहँ, परमेश्वरलानी दोक खिता फाप्च्येते छ्याःङ खाँचो मेत। 36 ओताते जति गाङे थेकीराङ जोबाते ईन थेमे जोबातेबरी जेसुकैला ताकान्तेङ थेराङ ईन, दिबा जेसुकै गाङे थेतेराङ ईन। दोक छ्येते परमेश्वरते सधैँभरि जय जय ओङस्यीत। आमेन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.