रोमी 1 - जिरेल1 दि चिट्ठी येशू ख्रीष्ट काम खित्कान्ते ङा पावल टिगीन ओत। ङा येशू ख्रीष्टकी खटे खाबाते मि ईन। मिओनला थे खोरोङ गा लाङच्येते बात लोपाला ङाला परमेश्वरगी छाने खाबाते ईन। 2 दि गा लाङच्येते बात तिरी लेमु खाला छ्या स्ये ज्युत्क्यो सिन परमेश्वरगी गोमाका थे खोरोङ बात खित्कान्ते मिओनला परमेश्वर बातला टिक च्युता ओतान। 3 परमेश्वरगी छ्या स्ये ज्युत्क्यो साबाते दि गा लाङच्येते बातचेन थे खोरोङ फुज्युङ बातराङ ईन। परमेश्वर फुज्युङ मि जुनी लाला दुरू ओङजीन गेल्बो दाऊद सन्तान नाङ केबा ओतान। 4 थेमे स्यिसादुकी सोम्बो लोक्पा ओतेकी थे पक्काराङ परमेश्वर फुज्युङ ईन, थेत्ताङ छ्येज्यीक शक्ति ओत सिन परमेश्वर आत्मेकी गाङेला छ्या स्ये च्युता ओत। ङुरूङगी प्रभु सिरच्येते येशू ख्रीष्ट होथेराङ ईन। 5 जात जातकी मि गाङेकी थे खोरोङला विश्वास खाला थे खोरोङगी साबाते ङेन्स्यीत थेमे थे खोरोङ चुक छ्ये ईन्दे सिन छ्या स्येस्यीत सिन थेबाला गा लाङच्येते बात लोपाला परमेश्वरगीराङ दया खाईन ङ्योकोनला खटे खाबाते ईन। 6 थोक खाला गा लाङच्येते बात थोला येशू ख्रीष्ट मि ओङाला परमेश्वरगी थे खोरोङ दोन्दु स्योक सिन काताङाते मिओन ख्योकोनोङ ईन। 7 दोक खाईन परमेश्वरगी ङिङज्ये खाईन थे खोरोङ सन्तान ईन सिन छाने खाबाते रोम सारदु ओताते ख्योकोन गाङेला ङुरूङ आबा परमेश्वरताङ प्रभु येशू ख्रीष्टकी दया खाला लेमु खिनराङ देत्स्यीत। पावल रोमनापा ड्वा चालाते 8 गोमाचेन ङा येशू ख्रीष्ट छ्य्वापेकी ख्योकोन गाङे लाईदु परमेश्वरला धन्यवाद सिओ। च्यिला सासीन ख्योकोन येशूला विश्वास खित्कान्ते मि ईन सिन गाङेपे मिला छ्या दुक। 9 ङे ख्योकोनला थोई सम्झे खाला जहिलेङ ख्योकोन लाईदु प्रार्थना खिका सिरच्येते बात परमेश्वरलाराङ छ्या ओत। थे फुज्युङते गा लाङच्येते बात ङाराङ स्येतकी थुपासम्म ज्येनला लाप्ला ङा परमेश्वरला माने खिओ। 10 प्रार्थना खित्जीन ङा थोरूमसाक ख्योकोनला ठेता माङेत्सीनोङ थाचेन परमेश्वरगी ङाला ख्योकोन ओत्सापा गाल्ला ठेता खित्च्येते मौका तेरस्यीत सिनोङ सिओ। 11 ङाला ख्योकोनला ठेता आउदी सेम ओत। दोक खाईन ङुरूङ ठेता ङेत्सीन परमेश्वर आत्मेकी तेरच्येते सीपताङ शक्ति ख्योकोनगीङ ङेत्स्यीत सिन लाप्ला तेरा थुप्च्या ओतान। दोक खाईन ख्योकोनगीङ थोक्ते सीपताङ शक्ति ङेत्नामेई प्रभु येशूला झन लेमु खाला विश्वास खिता थुप्च्या ओतान। 12 ईन्दानी ङुरूङ ठेत्जीन ङे ख्योकोनलाकामा मद्धत तेरच्येते मेन। ङुरूङ ङ्योम्बुराङ देत्ला येशू ख्रीष्टला विश्वास खित्च्येते बात खित्जीन ङे ख्योकोनला थेमे ख्योकोनगी ङाला आँट तेरा थुप्च्या ओतान। 13 आज्यो न्वावे, पालोताङ पालो ङा ख्योकोन ओत्सापा ओङा चालाप। ङे ढाँर खाबाते मेन। तर जति खासीनोङ थोरूमसाक ङा थेपा ओङा माथुप्सुङ। ज्येन ठाउँकी ज्येन ज्येन जातकी मि नाङ च्योकराङ खाला थेपाङ गा लाङच्येते बात लोपा ङेत्सीन मिओनगी येशूला विश्वास खित्च्या ओतान सिन ङा ख्योकोन ओत्सापा ओङा चालाते ईन। 14 ग्रीक ईन्स्यीत, थेबा छेत काल्बा बात छ्या मेस्येकान्ते मि ईन्स्यीत, पढे खाबाते मि ईन्स्यीत, पढे माक्याबाते ईन्स्यीत छ्ये टेक्टे गाङेला ङे गा लाङच्येते बात लोपाराङ फाप्क्यो। 15 दोक ईन्देकीराङ थुप थुपला थेपा रोम सारदु ओताते ख्योकोन नाङदुङ दि बात लोप ओङाला ङाला आउदी सेम लाबाते ईन। 16 गा लाङच्येते बात लोपाला ङाला सुङताङ छ्याःङ ङोचा मालाङदुक। च्यिला सासीन दि बातला परमेश्वरताङ चुक छ्येज्यीक शक्ति ओते सिरच्येते बात ओत। दि बात ङेन्ला येशूला विश्वास खित्कान्ते मिबरी गाङेला परमेश्वरगी पापदुकी डेल्ग्यो। दि पापदुकी डेल्च्येते काम परमेश्वरगी गोमा यहूदीओनला खासीनोङ ज्येन ज्येन जातकी मिलाङ खिओ। 17 च्यिला सासीन परमेश्वरगी चुक खाला मिओनला दोषी मेन सिते थेमे येशूला विश्वास खित्कान्ते मिलाचेन विश्वास खाबेकी खित्सादु परमेश्वरगी दोषी मेन सिओ सिन गा लाङच्येते बातलाराङ साबा ओत। बात दोकराङ ईन सिन परमेश्वर बातला “थे खोरोङला विश्वास खित्कान्ते मिला परमेश्वरगी दोषी मेन सिओ। थेमे थोक्ते मिकी नोमुङ मिसिन्च्येते जुनी ङेत्क्यो,” सिन साबा ओत। परमेश्वरगी मिओनला च्यिला सजाय तेरगीते 18 बात चुक सासीन मिओनगी परमेश्वरगी माकेत साबाते मेलेबा मेलेबा काम खाईन पाप खाबेकी खित्सादु थेकी स्येदाङगी चूर गाल्गीन स्वर्गनेकी थेबाला सजाय तेराला स्यूबा ओत। परमेश्वरगी सत्यते बात छ्या स्येबा खाईन बिन्दा ओत्सीनोङ थे मेङेन्दा खाला मिओनचेन पापकामा खिन दुक। 19 परमेश्वरगी मिओनला च्यिला सजाय तेरगीते सासीन थे खोरोङ सु ईन्दे, चुक्ते ईन्दे सिन थेकी मिओनला छ्या स्येबा खाईन बिन्दा ओतेकी दि बात मिओनगी लेमु खाला छ्या स्येबा थुप्क्यो। 20 चुक खाला सासीन थेला मिगी माथोङसीनोङ थेकी च्याक दि सा नाम जोजीनमेई जोबातेबरी जेसुकै ताला गोमामेईराङ थेत्ताङ चुक छ्येज्यीक शक्ति ओता ईन्दाका सिन थेमे थे परमेश्वरराङ ईन सिन मिओनगी सजिलो खाला छ्या स्येबा थुप्क्यो। थोगी परमेश्वर ओता मेता सिन ङाला छ्याःङ छ्या मेतान सिन सुङगीङ सिरा मुथुबो। 21 थे सु ईन्दे, चुक्ते ईन्दे सिन छ्या स्येकीन स्येकीनोङ मिओनगी थेला खोराङ परमेश्वर ईन सिन मान माक्यासुङ। थेकी चुक लेमु खासुङा सिन धन्यवादोङ माबिन्सुङ। दोक खाईन थेबेकी थेला छ्याःङ वास्ता माक्याबेकी थेबा लेम्बा गाल्गीन थेबे सेमगी नाङ पापताङ लोभकामा ठुङाला स्यूसुङ। 22 थेबेकी खोपरोङगी जे बादोङ छ्या स्येक्यो, जेङ खिता थुप्क्यो सिराला स्यूनामेई थेबा झन सो साकान पशु च्योकराङ डुइन गाल्सुङ। 23 थोक ओङगीन थेबेकी चुक खिताला स्यूसुङा सासीन सधैँभरि सोन्ला देत्कान्ते छ्येज्यीक शक्ति ओताते परमेश्वरला माने खिते साटोला पालोई स्यिला डोच्येते मि, छ्योज्युङमा, पशुताङ रूलगी मूर्ति जोकीन ल्हा सिन माने खिताला स्यूसुङ। 24 मिओनगी थोक खिताला स्यूबेकी खित्सादु परमेश्वरगी थेबाला खोपरोङ खुशीला ताङसुङ। थोक खानामेई मिओनगी खोपरोङला जे खिता सेम लाङगीदुक थेराङ खिन खिता मेङच्येते ङोचा लाङच्येते कामकामा खिताला स्यूसुङ। 25 दोक खाईन परमेश्वर सु ईन्दे, चुक्ते ईन्दे सिन सत्यते बात छ्या ओत्कीन ओत्कीनोङ थेबेकीनी ओताते जति गाङे जोकान्ते परमेश्वरला माने खिता ताङगीन थेकी जोबातेबालाका ल्हा सिन माने खिताला स्यूसुङ। परमेश्वरतेकामा सधैँ जय जय ओङस्यीत। आमेन। 26 मिओनगी थोक खिताला स्यूनामेई परमेश्वरगी थेबाला थेबेकी खिता चालाच्योक मेलेबाताङ ङोचा लाङच्येते कामराङ खित्स्यीत सिन छारा ताङसुङ। थोक खानामेई फेम्मे मिओनगी ख्योबोताङ ङ्याला च्योक खाईन फेम्मे मिलाराङ ङ्योम्बु ज्याक्ला खिता मेङच्येते काम खिताला स्यूसुङ। 27 थोकराङ खाईन ख्योओ मिओनगीङ फेम्मे मिला च्योक खाईन ख्योओ मिला ङ्योम्बु ज्याक्ला खिता मेङच्येते काम खिताला स्यूसुङ। थोक मेलेबा काम खाबेकी खित्सादु थेबेकी ङेत्च्येते सजाय ङेता ओत। 28 दोस्यिककामा मेन, थेबेकी परमेश्वरगी साबाते च्यिला ङेन्च्येरो सिन थेला छ्याःङ वास्ता माक्याबेकी थेकी थेबाला खोपरोङ सेमला लाबा लाबा खिता मेङच्येते कामराङ खित्स्यीत सिन ताङसुङ। 29 थोगी थेबेकी परमेश्वरगी खिता मेङगो सिन साबाते मेलेबाते कामताङ बातकामा खित्च्येते, लोभ खित्च्येते थेमे खालि ज्येनला खेदापानी खित्च्येते खिताला स्यूसुङ। थोकराङ खाईन डार खित्च्येते, मि सेत्च्येते, थोम्मु जीङगा खित्च्येते, ज्येनला ठगे खित्च्येते, मिला मोता सराप खित्च्येते थेमे मि बात खिन ख्याम्च्येते खिताला स्यूसुङ। 30 दोस्यिककामा मेन, मि मोत्च्येते, परमेश्वर विरोध खित्च्येते, मिला हेपे खाला इज्जत बेइज्जत खित्च्येते, छ्ये खित्च्येते, ङा ङाराङ ईन सिन धाक लै खित्च्येते, जहिलेङ मेलेबाकामा खिता छोल्च्येते थेमे आबा आमेकी लाःपा कोता मेङेन्च्येते खिताला स्यूसुङ। 31 थेबा लेम्बा डुइन गाल्सुङ। थेबा खोपरोङगी जमान खाबा च्योकराङ मिक्किकान, ज्येनला ङिङज्ये मिक्किकान थेमे सेमदु दया माया सिराते छ्याःङ मेत्कान गाल्सुङ। 32 होथोक्ते मेलेबा काम खित्कान्ते गाङेकी सजाय ङेत्ला स्या फाप्क्यो सिन परमेश्वर नियमला साबाते बात छ्या ओत्कीन ओत्कीनोङ मिओनगीचेन खोपरोङकामा मेलेबाते काम खिन देत्च्येते मेनगी ज्येनगी थोक्ते काम खाबा थोङजीन थेबेकी चुक लेमु खासुङा सिन गाका खिओ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.