छ्या स्ये च्युताते बात 9 - जिरेलपालो ङे बाजि बिकुल फुबाते 1 थेमे पालो ङे बाजि परमेश्वर दूतकी थे खोरोङ बिकुल फुसुङ। थेमे ङे नामनेकी कार्माज्यीक पृथ्वीमा ङीम्बाते थोङसुङ। थे कार्मालाचेन खापान खापान तीङ ओताते डालुम गो बेत्च्येते साँचो बिन्दा ओतान। 2 थेमे थे कार्मेकी थे डालुम गोई साँचो बेत्जीन थेरूकी इँट स्येक्च्येते आउदी जोदाज्यीक कारखानादुकी च्योकराङ खाईन आउदी काल्बेई थुता थेन्सुङ। दि थुतेकी ङीमे नाम्दाकताङ नाम गाङे नाक्पो दिङी जोसुङ। 3 दि थुते नाङदुकी छ्युच्युपे थेन्गीन से नाङला फाप्सुङ। थे छ्युच्युपेओनगी बिच्छीकी छेतराङ सुक लाङला दुङ देक्च्येते शक्ति ङेता ओतान। 4 थेबाला बालीनालीताङ सो दोङबोला छ्याःङ माकेत। खोपरोङ टालाला परमेश्वर छाप ग्यापा मेताते मिओनलाकामा दुक्पा बिन सिन साबा ओतान। 5 थे छ्युच्युपेओनला थे मिओनला सेताचेन मासेत खालि दावा ङासाक तेरासम्म दुक्पाकामा बिन सिन साबा ओतान। थे छ्युच्युपेओनगी थोक खाला दुक्पा तेरजीन थे मिओनला बिच्छीकी दुङ देक्जीन च्योकराङ खाला सुक खिन ओतान। 6 दावा ङासाक दोक खाला खपे खिता मुथुप्च्ये दुक्पा ओङजीन थे मिओन स्याप छोल्ग्यो। ईन्सीनोङ स्या मेङेदो। थेबा स्यिसीनोङ ओङच्या ओतान सिराच्योक खाला काल गुला देत्क्यो। ईन्सीनोङ थेबे काल माछाङो। 7 थे छ्युच्युपेओन दोक ताजीन लडाइँला खेराला ठीक खाबाते घोडाओन च्योक थोङगीन ओतान। थेबेकी गोःला सेरगी श्रीपेज च्योक्तेन्दे खोन्दा ओतान। थेमे थेबे छ्येतचेन मिते च्योकराङ ओतान। 8 थेबे टा फेम्मे मिते च्योकराङ रीम्बु ओतान। थेबेते साचेन सिंहेते च्योक्तेन्दे ओतान। 9 थेबे ठाङचेन ठाङला खोन्च्येते च्याकी पातेकी उपाच्योक ओतान। थेमे थेबेकी स्योक्पा दुङजीनचेन लडाइँला घोडा काल्बेईकी बग्गी ठुत्जीन थेन्दाते ङोरो च्योकराङ थोकीन ओतान। 10 थेबे पिको बिच्छी ङामा च्योकराङ ओतान। थेबेते दुङोङ बिच्छीते च्योकराङ ओतान। होथे बिच्छी ङामा च्योक्तेकीराङ आउदी सुक लाङच्या खाला दुङ ग्याप्ला थे छ्युच्युपेओनगी मिओनला दावा ङासाक दुक्पा तेरा थुप्च्या ओतान। 11 थे खापान खापान तीङ ओताते डालुमदु ओताते दूतराङ थे छ्युच्युपेओन गेल्बो ओतान। थे डालुमदु ओताते दूतकी मिनचेन हिब्रू बातला एबाड्डोन थेमे ग्रीक बातला अपोल्लियोन ईन। दोक साबाते नाश जोकान्ते साबाते ईन। 12 ज्यीबा लाङच्येते थोङगी दुक्पाओनचेन दाक सिन्सुङ। था थोरूमोङ दोक्ते दुक्पा ङि ओङा बाँकीराङ ओत। पालो ठुगी बाजि बिकुल फुबाते 13 थोक ओङगीन सिन्नामेकी पालो ठुगी बाजि परमेश्वर दूतकी बिकुल फुसुङ। थेरूई परमेश्वर दोन्दु ओताते थे सेरगी थानदुकी बात खाबाते ङोरोज्यीक ङे थोसुङ। थे ङोरोचेन थे थानगी सुर स्यीकारपा जोबा ओताते रोज्यो च्योक्तेदुकी थेन्दा ओतान। 14 थेरू बात खित्कान्तेकी थे पालो ठुगी दूतलाराङ “यूफ्रेटिस सिराते जोदाते चाङबोदु ठाकीन ज्याक्पाते दूत स्यीबोला ठासादुई थोङ,” सिन कोत्सुङ। 15 थेमे साबा च्योकराङ खाईन थे दूत स्यीबोला ठासादुई ताङसुङ। थेबा स्यीबोलाचेन थे बेलाला, थे छोमु, थे दावाताङ थे लोला दि सा लुङबा खाङ ओताते खण्ड सुमगी नाङ खण्डज्यीक मिला सेताला सिन ठीक खाईन ज्याक्पा ओतान। 16 थेमे ङे याङराङ थेरू करोड खालज्यीक घोडे लाक जेबाते फौज ओत सिराङ थोसुङ। 17 ङे थे घोडाओनताङ थे लाक्तु जेबा ओताते फौजला थोङसुङ। थे घोडाओनताङ थे लाक जेबा ओताते फौजकी ठाङनापा खोन्दाते च्याकी पाताचेन मे च्योकराङ मोर्मु, नीर च्योकराङ नीलो थेमे गन्धक च्योकराङ सेर्मु रंगीते थोङगीन ओतान। थे घोडाओन गोःचेन सिंहेते च्योकराङ ओतान। थेमे थे घोडाओन खानामेई मे ज्वाला, थुता थेमे गन्धक बारला थेन्गीन ओतान। 18 थेबे खादुकी थेन्दाते थे मे ज्वाला, थुताताङ बाराते गन्धककी खित्सादु खण्ड सुमगी नाङ खण्डज्यीक मि गाङे स्यिसुङ। 19 थे घोडाओनगी खेकी थेमे ङामेकी मि सेता थुप्कीन ओतान। थेबे ङामाचेन रूल च्योकराङ ओतान। थेमे होथे रूल च्योक्तेकीराङ मिओनला मा तोत्ला सेत्कीन ओतान। 20 दि दुक्पादुकीङ थाराते मिओनगी थोरूमोङ थे खेराङगी खिन ओताते काम खिता माताङसुङ। च्यि सासीन थेबेकी ल्हा ल्हन्डीक माने खिता माताङसुङ। थोकराङ खाईन थेबेकी सेर, चाँदी, पित्तल, दोताङ स्यिङगी मूर्तिला ल्हा सिन माने खिताङ माताङसुङ। थे मूर्तिओनगी थोङाङ मुथुबो, थोबाङ मुथुबो थेमे थेबा ख्याम्बाङ मुथुबो। 21 दोस्यिककामा मेन, थे मिओनगी मि सेत्च्येते, स्युत्च्या फुत्च्याताङ मन्तर तन्तर खित्च्येते, रन्डीबाजी थेमे होदि च्योक्ते खिता मेङच्येते काम खित्च्येते थेमे कुच्येते लेमु मेन सिन मासासुङ, दि कामतेबा खिनराङ देत्सुङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.