छ्या स्ये च्युताते बात 8 - जिरेलबाजि दुईनगी पालो छाप लोक्पाते 1 थेमे थे लुई रीउकी पालो दुईनगी बाजि छाप लोक्जीनचेन आधा घण्टाजो स्वर्गने चकमन्न गाल्सुङ। 2 थेमे परमेश्वर दोन्दु लाला देत्कान्ते दूत दुईनला ङे थोङसुङ। थेबाला बिकुल दुईन बिन्दा ओतान। 3 याङराङ लाःक्तु सेरगी दोबोन्डा खुराज्यीक परमेश्वर दूत वाकीन थानगी खादु लाकीन देत्सुङ। थे थानचेन सेरगी जोबा ओतान। थे थान सिंहासन खादु ओतान। परमेश्वर सन्तानओनगी खाबाते प्रार्थनाताङ स्येला थे थानदु पोराला सिन थे दूतला आउदी काल्बेई धूप बिन्दा ओतान। 4 थे दूतकी धूप पोरजीन थे लाःक्तुकी धूपकी थुताताङराङ खाला परमेश्वर सन्तानओनगी खाबाते प्रार्थनाङ परमेश्वर ओत्साने डुइन ओतान। 5 थेमे थे दूतकी होथे थानदु मे मेल्ताककी दोबोन्डा काङगीन पृथ्वीमा युक युकीन क्युरसुङ। थोक खानामेई नाम गाराङताङ गुरूङ खासुङ, नामज्योक बुराङ साच्याज्यीक ङोरो थोसुङ, चिलाम खासुङ थेमे सेदेर्मुङ गाल्सुङ। बिकुल दुईनगी बात 6 दोक ओङनामेई बिकुल खुरगीन देताते थे परमेश्वर दूत दुईनबोकी बिकुल फुताला ठीक खासुङ। 7 थेमे गाङे भन्दा गोमे दूतकी थे खोरोङ बिकुल फुसुङ। थोक खानामेई ठाक स्येबाते सरेताङ मे ज्वाला पृथ्वीमा ङीम्बाला स्यूसुङ। दोक ओङेकी खित्सादु पृथ्वीदु खण्ड सुमला खण्डज्यीक सा थेमे स्यिङ दोङबोताङ ङोम्मुते सोतेबा गाङे छिगीन खतम गाल्सुङ। 8 थेमे ज्येनते दूतकीङ थे खोरोङ बिकुल फुसुङ। थेकी बिकुल फुनामेई मे ज्वाला बाराई आउदी जोदाई बोम च्योकस्यिक समुन्द्रे नाङमा क्युरसुङ। थेमे खण्ड सुमला खण्डज्यीक समुन्द्रे छ्यु ठाक गाल्सुङ। 9 थेमे थे समुन्द्र ठाक गाल्सादु ओताते जति समुन्द्रे ङ्याताङ बुतेबा गाङे स्यिसुङ। समुन्द्रदु ओताते खण्ड सुम नाङ खण्डज्यीक पानीजहाजतेबाङ गाङे ङ्येसुङ। 10 थे तिरी पालो सुमगी बाजि दूतकी थे खोरोङ बिकुल फुसुङ। दि बाजिलाचेन नामनेकी मे राँको च्योकराङ बाराज्यीक आउदी जोदाज्यीक कार्मा ल्हुम्सुङ। दिचेन चाङबोते खण्ड सुमगी नाङ खण्डज्यीक नाङ थेमे छ्युई मोनगी नाङला ल्हुम्सुङ। 11 दि कार्मे मिनचेन ऐरेलु सिन ओतान। ऐरेलु साबाते खक्तीते साबाते ईन। दि कार्मा ल्हुम्गीन छ्युईते खण्ड सुमला खण्डज्यीक छ्यु गाङे खक्ती जोबेकी थे छ्यु थुकीन मि काल्बेई स्यिसुङ। 12 दि तिरी पालो स्यी बाजि दूतकी बिकुल फुत्जीनचेन दागार, ङीमाताङ कार्मेते खण्ड सुम नाङ खण्डज्यीक नाक्पो गाल्सुङ। दोक ओङगीन दागार, ङीमाताङ कार्मेते खण्ड सुम नाङ खण्डज्यीक नाम्दाकराङ तोरगीन खण्ड सुम ङीनला खण्डज्यीक ङीन मुन्दाक जिङी गाल्सुङ। थोकराङ खाईन खण्ड सुम नुपला खण्डज्यीक नुप मुन्दाक जिङी गाल्सुङ। 13 थे तिरी ताजीन ङे नामगी चेनापा खोकालीङज्यीक फुरगीन ओताते थोङसुङ। थेकी आउदी छेरा खाला “आबिई, आबिई, च्यि ज्यीबा लाङच्ये बात ईन्दाका आबिई। था दि तिरी बाँकी ओताते दूत सुमबोकी बिकुल फुत्जीन सा लुङबादु ओत्कान्ते मिओनला चुक ज्यीबा लाङच्या मेलेबा ओङोङा,” सिन ओतान। |
© 1992 Wycliffe Bible Translators Inc. All rights reserved.
Wycliffe Bible Translators, Inc.