छ्या स्ये च्युताते बात 7 - जिरेलपरमेश्वर मिओनला छाप ग्यापाते 1 थेमे दि तिरी ङे परमेश्वर दूत मेरा स्यी दि पृथ्वी सुर स्यीकारदु लाकीन देता ओता थोङसुङ। थेबाचेन दि सा लुङबा, समुन्द्र थेमे दोङबो नाङला खापाङ ल्हाबा चले मिक्किस्यीत सिन दि सा लुङबे सुर स्यीकारपेकी ओङच्येते ल्हाबा रोके खाईन देता ओतान। 2 लोईन ङे सोम्बोते परमेश्वर छाप खुरा ओताते ज्येनज्यीक परमेश्वर दूतज्यीकला ङीमा स्यारसे छ्य्वापेई ओङगीन ओताते थोङसुङ। थेमे थेकी दि सा लुङबाताङ समुन्द्र नाश ज्वाप्ला अधिकार ङेता ओताते थे लाकीन देताते दूत स्यीबोला छेरा खिनकामा 3 “ङ्योकोनगी ङुरूङ परमेश्वर काम खित्कान्ते मिओनला थेबे टालाला छाप ग्याप्कीन मासिनथुप दि सा लुङबा, समुन्द्र थेमे दोङबोओनला नाश मातोङ,” सिन सिदुक। 4 थे तिरी ङे इस्राएलीओन गाङे थरगी नाङदुकी जम्मा लाखज्यीकताङ हजार खाल ङिताङ स्यी मिला छाप ग्याप्सुङ सिन थोसुङ। 5 थोक खाईन छाप ग्यापाते मि नाङ यहूदे थरगीते हजार च्युन्ङी, रूबेन थरगीते हजार च्युन्ङी, गादकी थरगीते हजार च्युन्ङी, 6 आशेर थरगीते हजार च्युन्ङी, नप्ताली थरगीते हजार च्युन्ङी, मनश्शे थरगीते हजार च्युन्ङी, 7 शिमियोन थरगीते हजार च्युन्ङी, लेवी थरगीते हजार च्युन्ङी, इस्साखार थरगीते हजार च्युन्ङी, 8 जबूलून थरगीते हजार च्युन्ङी, यूसुफ थरगीते हजार च्युन्ङी थेमे बेन्यामीन थरगीते हजार च्युन्ङी ओतान। ङोला ङ्वा मुथुप्च्या मि थोङाते 9 थेमे दि तिरी ताजीन ङे थे सिंहासनताङ थे लुई रीउ दोन्दु ङोला ङ्वा मुथुप्च्या मुन्तीसरी मि थोङसुङ। थेबेकी खोलाक कार्मुतेन्दे खोन्दा ओतान। थेमे लाःक्तु खजूर दोङबो हाँगा खुरा ओतान। दिबाचेन लुङबा लुङबेते, थर थरगीते, जात जातकीते थेमे खुदुक खुदुक भाषे मि ओतान। 10 थेमे थेबा आउदी छेरा खाला खाला “मिला पापकी सजायदुकी डेल्कान्तेचेन सिंहासन लाक देत्कान्ते ङुरूङ परमेश्वर थेमे लुई रीउ ईन,” सिन ओतान। 11 थे सिंहासन, थे मेरा खालज्यीकताङ स्यीबो छ्ये छ्येतेबा थेमे थे ङेपाक ओताते थरी स्यीबो फेरोला परमेश्वर दूतओन गाङे लाकीन देता ओतान। थेमे थे दूतओनगी सिंहासन दोन्दु खोबुकला देत्कीन दोक सिन परमेश्वरते जय जय खासुङ। 12 थेबेकीचेन “आमेन, ङुरूङ परमेश्वरला छ्ये जोइन देत्की। थेते सधैँभरि जय जय ओङस्यीत। थे जस्तो बादोङ छ्या स्येकान्ते ईन। थेला धन्यवाद साला मान खिइ। थेत्ताङ छ्येज्यीक शक्ति ओत। थेकी जस्तो कामोङ खिता थुप्क्यो। आमेन,” सिन ओतान। 13 थेरूई थे मेरा खालज्यीकताङ स्यीबो छ्ये छ्येतेबे नाङ दोक्पोईकी ङाला “दि कार्मुते खोलाक खोन्कान्ते मिओन सु ईन्दे? थेमे दिबा खापेकी वाबाते ईन्दे?” सिन ठिसुङ। 14 ङे थेला “दिबा सु ईन्दे सिन हजूर खोल्लाराङ छ्या ओत,” सिन सिरजीन थेकी “दिबाचेन आउदी छ्ये छ्ये दुक्पा खपे खाईन वाबाते मि ईन। दिबेकी खोपरोङ खोलाक लुई रीउकी ठाकला टुकीन दोक कार्मु जोबाते ईन। 15 थोगीराङ दिबा ङीन नुप परमेश्वर मन्दिर नाङ परमेश्वर सिंहासन दोन्दु देत्ला थेला छ्ये जोइनराङ देत्कीदुक। सिंहासन लाक देत्कान्ते थेबाताङ ङ्योम्बुराङ देत्ला थेकी थेबाला लेमु खाला तेइओ। 16 त्वाबा कोम्बा सिराते था थेबाला नोमुङ मालाङो। ङीमे रापकी थेबाला मिछिगो। खपेराङ खिता मुथुप्च्येते गर्मीकीङ थेबाला छ्याःङ खिता मुथुबो। 17 च्यिला सासीन सिंहासन किल्दु ओताते लुई रीउकी थेबाला लेमु खाला गोठाला खिओ। थेकी थेबाला छ्युई मोनगी नाङला टीला खेरग्यो। थे मोनगी छ्यु थुङकान्ते मिओनगी नोमुङ मिसिन्च्येते जुनी ङेत्क्यो। थेमे परमेश्वरगी थेबे मिगी मिकच्युक पिला तेरग्यो,” सिन सिदुक। |
© 1992 Wycliffe Bible Translators Inc. All rights reserved.
Wycliffe Bible Translators, Inc.