छ्या स्ये च्युताते बात 6 - जिरेलकिताब छापओन लोक्पाते 1 थेरूई थे लुई रीउकी थे छाप दुईनगी नाङ गाङे भन्दा गोमे छाप लोक्पाते ङे थोङसुङ। थेमे थे ङेपाक ओताते थरी स्यीबो नाङ दोक्पोईकी नाम गुरूङ खिताच्योक खाईन ङोरो तेन्गीन “लो स्योक,” सिन सिरा ङे थोसुङ। 2 थेमे ताजीन ङे घोडा कार्मुज्यीक थेरू ओङा थोङसुङ। थे घोडे लाक जेबा ओतातेकी लाःक्तु दा ज्यु खुरा ओतान। थेमे थेला श्रीपेजज्यीक बिन्सुङ। थे गाङेला ग्याल्कान्ते ईन्देकी थेकी गाङेपा गाङेला ग्याल्सुङ। 3 लोईन थे लुई रीउकी पालो ङिकी बाजि छाप लोक्सुङ। थेमे थे ङेपाक ओताते थरी स्यीबो नाङ ज्येनज्यीगी “लो स्योक,” सिरा ङे थोसुङ। 4 थेमे ठाक च्योकराङ मोर्मुज्यीक घोडा थेरू लिच्युङ। थे घोडे लाक जेबा ओतातेलाचेन सा लुङबा खाङ ओताते मिओनला डिक माच्युत्ला खोपरोङ खोपरोङ नाङ थुपरीङ स्यिरीङ खाला सेत ज्युत्च्येते अधिकार बिन्दा ओतान। थेला लाःक्तु रीम्बुई तरवारज्यीगोङ बिन्दा ओतान। 5 थे लुई रीउकी पालो सुमगी बाजि छाप लोक्जीन थे ङेपाक ओताते थरी स्यीबो नाङ ज्येनज्यीगी “लो स्योक,” सिरा ङे थोसुङ। थेमे ताजीन ङे नाक्पोज्यीक घोडा ओङा थोङसुङ। थे घोडे लाक जेबा ओतातेकी लाःक्तु तराजु खुरा ओतान। 6 थेमे थे ङेपाक ओताते थरी स्यीबो नाङ दोक्पोईकी थे तराजु खुरा ओतातेला “ङीमाज्यीक काम खाला ङेत्च्येते पैसेकी मिकी था कि किलोज्यीक ठा कि किलो सुम जौकामा ङ्य्वा थुप्क्यो। मोर्गु छिरच्येते जैतुन दोङबो थेमे छ्याङ जोच्येते अंगूर दोङबोओनचेन नाश मातोङ,” सिन साबा ङे थोसुङ। 7 थेमे थे लुई रीउकी पालो स्यी बाजि छाप लोक्जीन थे ङेपाक ओताते थरी स्यीबो नाङ गाङे भन्दा तिरीतेकी “लो स्योक,” सिरा ङे थोसुङ। 8 थेमे ताजीन कार्बो स्योरेज्यीक घोडा थेरू ओङा ङे थोङसुङ। थे घोडे लाक जेक्कान्ते मिनचेन स्यिच्येते काल ओतान। स्याप्ते मिओन देत्च्येते ठाउँचेन थे तिरी तिरी ओतान। दि सा लुङबा खाङ कोईला अनिकाल लाङला, कोईला तरवारगी तुप्ला, कोईला मेलेबा मेलेबा रोग खो च्युत्ला, कोईला री रीदाक लै खाला दि सा लुङबा खाङ ओताते बो स्यी मि नाङ बोज्यीकला सेत सिन कालताङ स्याप्ते मिओन देत्च्येते ठाउँला अधिकार बिन्दा ओतान। 9 याङराङ थे लुई रीउकी पालो ङे बाजि छाप लोक्सुङ। थेमे थानगी चावादु ङे च्यि थोङसुङा सासीन ज्येनला परमेश्वर बात लापेकी थेमे येशू ख्रीष्ट सु ईन्दे, थेकी च्यि खिते सिन लापेकी खित्सादु गोमाबा सेताते मिओन आत्मा थोङसुङ। 10 थेबाचेन छेरा खिनकामा “प्रभु परमेश्वर, खो सेमला पाप सिराते छ्याःङ मेताते थेमे खिओ साबा च्योकराङ खित्कान्ते ईन। थोरूमोङ खो नामसाक सा लुङबे मिओन न्याय मिक्किते? ङ्योकोनला सेताते सजाय थेबाला नाम तेरच्ये?” सिन ओतान। 11 थेमे थेबा गाङेला खोन्दाला कार्मुते खोलाक रेरे तेरगीनकामा “खेराङ च्योकराङ परमेश्वर काम खित्कान्ते थोरूम सेता बाँकी ओताते खेराङ आज्यो न्वालाङ ख्योकोनला च्योकराङ खाईन सेत्कीन मासिनथुप टिक्पी दिन गुकीन खि,” सिन सिदुक। 12 थे लुई रीउकी पालो ठुगी बाजि छाप लोक्पातेङ ङे थोङसुङ। थेमे थेरू आउदी ज्यीबा लाङच्याज्यीक सेदेर्मु गाल्सुङ। थेमे ङीमाचेन नाक्पोते फालगी खोलाक च्योकराङ नाक्पो दिङी गाल्सुङ। थोकराङ खाईन दागारचेन ठाक च्योकराङ मोर्मु गाल्सुङ। 13 थेमे हुन्डी खित्जीन नेभारे दोङबोदुकी छोबा मेताते नेभारे च्यिच्यिला ङीला च्योकराङ खाईन नामगी कार्मातेबा साला ङील्सुङ। 14 थेमे नामचेन स्यिउ ठीला च्योकराङ खाईन सरे खिन खिन गाल्सुङ। थोकराङ खाईन बोमतेबा थेमे समुन्द्रे किल्दु ओताते लुङबातेबाङ दाक्पोन दाक्पोन ठाउँलेकी तोक तोक तोरगीन गाल्सुङ। 15 थोक ओङजीन दि सा लुङबे गेल्बोओन, राज्य खित्कान्ते ज्येन छ्ये छ्ये मिओन, मिल्टेरी छ्येते मिओन, छ्युक्पुते मिओन, छ्ये छ्ये मिओन, योक्पो योङमुओन थेमे ज्येन ज्येन मिङ गाङे ठाःगी फुगी नाङला थेमे जोदा जोदातेन्दे दोईकी चेपकी नाङला ईप्सुङ। 16 थेमे थेबेकी बोमताङ ठाःकला बात खिन “ए ख्योकोन राम्ला वाला ङ्योकोनला उप्ला थे सिंहासन लाक देत्कान्ते मिगी दोन्दुकी थेमे थे लुई रीउकी स्येदाङगी चूर गाल्ला तेरच्येते सजायदुकी इप। 17 च्यिला सासीन था थेबेकी स्येदाङगी चूर गाल्ला सजाय तेरच्येते दिन लेप्सुङ। थेबे दोन्दुकी था सुचेन थारा थुप्कीतेरो? था सुङ मि थारा मुथुबो,” सिन सासुङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.