छ्या स्ये च्युताते बात 5 - जिरेललुई रीउताङ किताब बात 1 थेमे ङे थे सिंहासन लाक देता ओत्कान्तेकी ठीलाते स्यिउज्यीक सामे लाःक्तु खुरा ओता थोङसुङ। थे स्यिउला लाक नाङ पट्टि ङिकारपा टिबा ओतान। थेमे थे स्यिउला छाप दुईन ग्यापा ओतान। 2 लोक्ला ङे छ्येज्यीक शक्ति ओताई परमेश्वर दूतज्यीक थोङसुङ। आउदी कस्स्ये खाला छेरा खिन थेकी “दि किताबदु ग्यापाते छाप लोक्ला दि नाङ ओताते बात सुई ता थुप्कीते?” सिन सासुङ। 3 तर स्वर्गदु ओतातेबरी ईन्स्यीत, सा लुङबादु ओतातेबरी ईन्स्यीत थेमे स्यिइन सिन्दाते मिओन नाङदुकी ईन्स्यीत थोक खिता थुप्कान्ते सुङ माथेन्सुङ। 4 थे किताब छाप लोक्ला थे नाङ ता थुप्कान सुङ मोथोङजीन ङाला आउदी मेलेबा लासुङ। थोगी ङा ईमुक खाईन खाईन ङ्वाप्ला स्यूबाप। 5 ङा थोक खाला ङ्वा थोङगीन थे मेरा खालज्यीकताङ स्यीबो छ्ये छ्येतेबे नाङ दोक्पोईकी “ए खो थोक खाला माङु, ङ्वा माफाबो। चुक सासीन यहूदे थरगी नाङ गेल्बो दाऊद सन्तान नाङ केबाते सिंह च्योकराङ मस्सुरज्यीक दोक्पोई ओत। थेकी शैतानला ग्याला ओत। थोगी दि किताबदु ग्यापाते छाप लोक्ला दि नाङ ओताते बात थेकी ता थुप्क्यो,” सिन सिदुक। 6 थेरूई ङे थे सिंहासन दोन्दु लाकीन देताते लुई रीउज्यीक थोङसुङ। थे सिंहासनताङ थे लुई रीउकी फेरोलाचेन थे ङेपाक ओताते थरी स्यीबो थेमे थे मेरा खालज्यीकताङ स्यीबो छ्ये छ्येतेबा देता ओतान। थेला थोताते मा ताजीन थे लुई रीउ सेताते च्योकराङ थोङगीन ओतान। थेते रोज्यो दुईनताङ मिक दुईन ओतान। थे मिक दुईनचेन दि सा लुङबा खाङ खुदुक खुदुक काम खिताला ताङाते परमेश्वर आत्मा दुईनबो ईन। 7 थेमे थे लुई रीउकी सिंहासन लाक्तु देताते दोन्दु गाल्गीन थे सामे लाःक्तुकी थे किताब लासुङ। 8 थेकी थे किताब लानामेई थे ङेपाक ओताते थरी स्यीकारताङ थे मेरा खालज्यीकताङ स्यीबो छ्ये छ्येतेबा गाङेकी थेला गुर्बु खाईन से खासुङ। थेबा गाङे लाःक्तु वीणा सिराते बाजा रेरेताङ धूपकी खाङाते सेरगी कचौरा रेरे ओतान। थे धूपचेन परमेश्वर सन्तानओनगी परमेश्वरला खाबाते प्रार्थना ओतान। 9 थेमे थेबेकी “दि किताब लाला थे छापओन लोक्पा थुप्कान्ते खोकामा ईन। खोल्ला सेता ओतान। खोल्ला सेत्जीन खोरोङ जीउदुकी थेन्दाते ठागी खुई थर थरगीते, खुदुक खुदुक भाषेते, जात जातकीते थेमे लुङबा लुङबे मि नाङदुकी मिओनला परमेश्वर मि ओङाला ङ्योसुङ, 10 खुई थेबाला खोरोङताङराङ राज्य खित्कान्ते मि जोसुङ थेमे ङुरूङ परमेश्वरला माने खित्स्यीत सिन परमेश्वर पूजारी जोसुङ। था थेबेकी दि सा लुङबा खाङ राज्य खिओ,” सिन साम्बाते लुज्यीक लासुङ। 11 थेमे लोईन ताजीन ङे थे सिंहासन, थे ङेपाक ओताते थरी स्यीबो थेमे थे मेरा खालज्यीकताङ स्यीबो छ्ये छ्येतेबे फेरो खाङ परमेश्वर दूत काल्बेई थोङसुङ। ङे थेबे ङोरोङ थोसुङ। थेबाचेन ङोला ङ्वा मुथुप्च्या मुन्तीसरी ओतान। 12 थेमे थेबा गाङेराङ “बाजिई सेताते लुई रीउताङ छ्येज्यीक शक्ति ओत। सा लुङबा खाङ ओताते सम्पत्ति गाङे थेतेराङ ईन। थे जस्तो बादोङ छ्या स्येकान्ते ईन। थेकी जस्तो कामोङ खिता थुप्क्यो। थेला मान खिता सोई खिओ। थेते जय जय ओङस्यीत। थेला छ्ये ज्वा फाप्क्यो,” सिन आउदी कस्स्ये खाला लु लिन्गीन ओतान। 13 लोईन ङे स्वर्गने ओतातेबरी, सा लुङबादु ओतातेबरी, स्यिइन सिन्दाते मिओन थेमे समुन्द्रे नाङ गाङेपा ओताते ङेपाक ओताते जति गाङेकी दोक सिन लु लाबाते थोसुङ। थेबाचेन “सिंहासन लाक्तु देत्कान्ते थेमे लुई रीउला ङ्योकोन छ्ये जोला मान खिन देत्क्यो। थेबेते सधैँभरि जय जय ओङस्यीत। थेबा ङिबोकी गाङेपा गाङेला राज्य खिनराङ देत्स्यीत,” सिन लु लिन्गीन ओतान। 14 थेमे थे ङेपाक ओताते थरी स्यीबोकी आमेन सिन सिरजीन थे मेरा खालज्यीकताङ स्यीबो छ्ये छ्येतेबेकीचेन गुर्बु खाला से खिन थेबा ङिबोला छ्ये जोसुङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.