छ्या स्ये च्युताते बात 4 - जिरेलस्वर्गने परमेश्वरला छ्ये जोबाते 1 थेमे दि तिरी ताजीन ङे स्वर्गे गो फेता ओताते थोङसुङ। थेमे गोमा ङाराङताङ बात खित्कान्तेकी बिकुल ङोरो च्योकराङ खाईन याङराङ ङाला दोक सिन बात खाबाते ङे थोसुङ। थेकी ङाला “लो देने स्योक। था ङा खोल्ला दि तिरी ओङा फाप्च्येते बातओन तेन्दामीन,” सिन सिदुक। 2 थेमे परमेश्वर आत्मेकी ङाला दाक जुम्सुङ। थेमे ङे स्वर्गने सिंहासनज्यीकताङ थे लाक्तु देत्कान्तेला थोङसुङ। 3 थे सिंहासन लाक्तु देत्कान्ते छ्येतचेन मिकराङ तिरिमिरी जोच्याज्यीक खाला टल्के खित्च्याज्यीक स्फटिकताङ सारडियस सिराते यु च्योक थोङगीन ओतान। थे सिंहासन फेरोलाचेन पन्ना सिराते यु च्योक थोङच्याज्यीक जा सुक्पा ओतान। 4 थेमे थे सिंहासन फेरोला खालज्यीकताङ स्यी ज्येनोङ सिंहासन ओतान। थे ज्येन ज्येन सिंहासन लाक्तुचेन मेरा खालज्यीकताङ स्यी छ्ये छ्येतेबा देता ओतान। थेबेकी खोलाक कार्मुतेन्दे थेमे सेरगी श्रीपेज खोन्दा ओतान। 5 किल्दु ओताते सिंहासनदुकीचेन चिलाम खिन ओतान, नामज्योक बुराङ साच्याज्यीक ङोरो थोकीन ओतान, नामोङ गुरूङ खिन ओतान थेमे थे सिंहासन दोन्दुराङ मे राँको च्योक खाईन बाराते नाम्दाक दुईन ओतान। थे नाम्दाकचेन परमेश्वर आत्मा दुईनबो ईन। 6 थे सिंहासन दोन्नापाला सिसा च्योकराङ सम्मज्यीक थेमे बिल्लौर सिराते यु च्योकराङ साङलोज्यीक समुन्द्र च्योक ओतान। थेमे थे सिंहासन फेरोला खुदुक खुदुक स्वरूप खाबातेन्दे ङेपाक ओताते थरी स्यी देता ओतान। थेबेते गाङेपा मिकराङ मिककामा ओतान। 7 थेबा स्यीबो नाङ दोक्पोई सिंह च्योकस्यिक, दोक्पोई लाङ च्योकस्यिक, दोक्पोई मि छ्येत खुराई थेमे दोक्पोईचेन नामला फुरगीन ओताते खोकालीङ च्योकस्यिक ओतान। 8 थेबा स्यीकारते स्योक्पा ठुक ठुक ओतान। थेमे स्योक्पाओनलाङ लाक नाङ मिकराङ मिक ओतान। थेमे थेबाचेन ङीन नुप रकस्यिकोङ खाराक्पा मेदेता खाला “गाङे भन्दा छ्येज्यीक शक्ति ओताते प्रभु परमेश्वर, खो मेलेबा सिराते छ्याःङ मिक्किकान्ते ईन। सेमला पाप सिराते छ्याःङ मेताते खोकामा ईन। खो गोमा ओतान, थरिङोलाङ ओत थेमे तिरी तिरीसाकराङ देत्कान्तेङ खोराङ ईन,” सिनराङ देत्कीन ओतान। 9 थोक खाला थेबा स्यीकारगी थे सिंहासन लाक देत्कान्तेला थेते जय जय ओङस्यीत सिन ओतान। थेबेकी थेला मान खिन धन्यवाद तेरगीन ओतान। थे सिंहासन लाक देत्कान्तेचेन सधैँभरि देत्कान्ते ईन। 10 थे ङेपाक ओताते थरी स्यीबोकी सधैँभरि सोन्ला थे सिंहासन लाक देत्कान्तेते थोक खाला जय जय खित्जीन थे मेरा खालज्यीकताङ स्यीबो छ्ये छ्येतेबेकीचेन गुर्बु खाला थेला से खिन ओतान। थेमे थे खेराङगी खोन्दाते श्रीपेज थेन्ला च्याला थे सिंहासन खादु ज्याक्ला 11 “ङ्योकोन प्रभु परमेश्वर, खुईते जय जय ओङस्यीत। खोल्ला मान खिता सोई खिओ, खोत्ताङ छ्येज्यीक शक्ति ओत। च्यिला सासीन सा नाम थेमे ओताते जति गाङे खुईराङ जोबाते ईन। थोगी दिबा ओङाते ईन। दिबा गाङे खुई ज्वा चाला च्योकराङ खाईन जोबाते ईन,” सिन ओतान। |
© 1992 Wycliffe Bible Translators Inc. All rights reserved.
Wycliffe Bible Translators, Inc.