छ्या स्ये च्युताते बात 3 - जिरेलसार्डिसदु जम्मा ओङकान्ते येशू ख्रीष्ट मिओनला टिबाते चिट्ठी 1 सार्डिस सारदु जम्मा ओङकान्ते येशू ख्रीष्ट मिओनला ताकोरा खित्कान्ते परमेश्वर दूतला दोक सिन टि। दि बातचेन परमेश्वर आत्मा दुईनबो ङ्योम्बु ओताते थेमे लाःक्तु कार्मा दुईन ओताते ङा सिन ओत। च्यि सासीन थेपा ख्योकोनगी च्यि च्यि खाबा ओते सिन गाङे बात ङाला छ्या ओत। मिओनगी ख्योकोनला परमेश्वरताङ डिक्कान्ते आउदी लेमु मि ईन खिदुक। दोक ईन्सीनोङ ख्योकोन थोक्ते मि मेन, ख्योकोननी परमेश्वर लाईदु स्याप छेतराङ गाल्ला दुक। 2 स्याप खाबाते मे फुला जोदा ज्वापच्योक खाला खेराङगी खिता ताङगीन सिन्दा सिन्दा खाबाते काम याङराङ खि। परमेश्वर दोन्दु ख्योकोनगी थोरूमसाक छ्याःङ कामोङ खिता फापाच्योक खाईन खाबा मिन्दुक। 3 ख्योकोनला गोमाका च्यि सिन लापा ओताने थेमे खेराङगी चुक लेमु खाईन ङेन्दा ओताने थे बात सम्झे खि। थेमे लोक्ला गोमा च्योकराङ खि। दोक माक्यासीन ङा ख्योकोन ओत्सादु चोर च्योक थाहाराङ मेङेता खाला ओङगो। ङा नाम ओङगीते सिन ख्योकोनगी छ्याःङ छ्या मेस्येओ। 4 तर सार्डिसदु ख्योकोन नाङ लाला लालेकी खोपरोङ खोलाकला छ्याःङ दाग खो च्युता मिन्दुक। थेबा कार्मुते खोलाक खोन्ला ङात्ताङ ख्याम्बा सोई खित्कान्ते मि ईन। 5 शैतान शक्तिला ग्याल्कान्ते मिला ङा होदोक खाला कार्मुते खोलाक कोन्ला तेरग्यो। थेमे नोमुङ मिसिन्च्येते जुनी ङेत्कान्ते मिओन मिन टिबाते किताब नाङदुकी ङा थे मि मिन मेटे मिक्किओ। थोकराङ खाला ङे आबाताङ थे दूतओन दोन्दु ङा थेला ङाराङ मि ईन सिन सिओ। 6 ङेन्दा सेम ओत्कान्ते मिकी ठाउँ ठाउँला जम्मा ओङकान्ते येशू ख्रीष्ट मिओनला परमेश्वर आत्मेकी च्यि सिन दुका सिन लेमु खाला ङेन। फिलाडेल्फियादु जम्मा ओङकान्ते येशू ख्रीष्ट मिओनला टिबाते चिट्ठी 7 फिलाडेल्फिया सारदु जम्मा ओङकान्ते येशू ख्रीष्ट मिओनला ताकोरा खित्कान्ते परमेश्वर दूतला दोक सिन टि। दि बातचेन सेमला पाप सिराते छ्याःङ मेताते, खिओ साबा च्योकराङ खित्कान्ते ङा सिन ओत। ङात्ताङ गेल्बो दाऊद सारगी गो बेत्च्येते साँचो ओत। ङे पेताते गो सुङगीङ च्येता मुथुबो थेमे ङे च्येताते सुङगीङ बेताङ मुथुबो। 8 ख्योकोनगी खिन ओताते गाङे काम ङाला छ्या ओत। खेराङगी छ्ये छ्ये काम खिता माथुप्सीनोङ ख्योकोनगी ङे साबा च्योकराङ खिन देत्सुङ। खेराङ ङे मि मेन सिन ख्योकोनगी नोमुङ मासासुङ। ङे ख्योकोन दोन्दु गोज्यीक पेत्कीन ज्याक्पा ओत। दि गो सुङगीङ च्येता मुथुबो। 9 दि बात ङेन। चुक सासीन खोपरोङ यहूदी ईन सिन छ्ये खित्कान्ते मिओन परमेश्वरगी साबाते ङेन्कान्ते मि मेन। थेबानी शैतानताङ डिक्कान्ते मिका ईन। ङा थेबाला ख्योकोन तिङबे ओक्तु दुल्ला ख्योकोन काम्बाला से खित ज्युत्क्यो। थेमे थेबेकी ङे ख्योकोनला ङिङज्ये खाबा ओताक्वा सिन छ्या स्येक्यो। 10 थेमे ङे खि साबा च्योकराङ खाईन जस्तो पीरताङ दुक्पालाङ ख्योकोन सेम मेसेता खाईन देत्सुङ। थोगी था तिरी ना थेबेकी पाप खिता तोङगीता सिन ताप्ला दि सा लुङबे मिओनला आइ परे खित्च्येते मेलेबाते दुक्पे बेलाला ङा ख्योकोनला जोए खाला ज्य्वाक्यो। 11 था ङा होत्ताराङ ओङगीन ओत। खेराङगी थोरूमसाक खिन ओताच्योक लेमु खिनराङ देत। दोक खिनराङ देत्सीन ख्योकोनला ङे तेरच्येते श्रीपेज सुङगीङ ठ्वाला खेरा मुथुबो। 12 शैतान शक्तिला ग्याल्कान्ते मिला ङा ङे परमेश्वर मन्दिरदु थाम जोला ज्य्वाक्यो। थेमे थे सधैँ थेरूराङ देत्क्यो। थे मि लाक्तु ङा ङे परमेश्वर मिन टिइओ। थोकराङ खाला ङा स्वर्गनेकी ङे परमेश्वर छ्य्वापेई ओङच्येते परमेश्वर सार साम्बाते यरूशलेम मिनताङ ङाराङ साम्बाते मिनोङ थे मि लाक्तु टिइओ। 13 ङेन्दा सेम ओत्कान्ते मिकी ठाउँ ठाउँला जम्मा ओङकान्ते येशू ख्रीष्ट मिओनला परमेश्वर आत्मेकी च्यि सिन दुका सिन लेमु खाला ङेन। लाओडिसियादु जम्मा ओङकान्ते येशू ख्रीष्ट मिओनला टिबाते चिट्ठी 14 लाओडिसिया सारदु जम्मा ओङकान्ते येशू ख्रीष्ट मिओनला ताकोरा खित्कान्ते परमेश्वर दूतला दोक सिन टि। दि बातचेन साँचोते बातकामा खित्कान्ते थेमे परमेश्वर सु ईन्दे सिन थेमे थेकी खित्च्येते कामगी बात लेमु खाला लाप्ला तेरकान्ते आमेन सिराते ङा सिन ओत। परमेश्वरगी सा नाम थेमे ओताते जति गाङे ङे छ्य्वापेकीराङ जोबाते ईन। 15 ख्योकोनगी च्यि च्यि खिन ओते सिन गाङे ङाला छ्या ओत। ख्योकोन ना ठङगे मिन्दुक ना ठोम्मु मिन्दुक। दोक ओङासोक बरू ख्योकोन कि ठङगे कि ठोम्मु ओता ईन्सीन लेमु ओङच्या ओतान। 16 ख्योकोन ठङगेङ मेताप, ठोम्मुङ मेताप स्योकीन चाङकामा च्याक्पाते छ्यु च्योक गाला ओतेकी ख्योकोनला ङा खादुई थुक खाला क्युरग्यो। 17 ख्योकोनचेन ङेल्ला जेसुकै दाङा ख्योपा ओत, ङेल्ला मादाङच्या मोख्योप्च्या सिराते छ्याःङ मेत। ङेल्लानी था छ्याःङ मोगोओ खिदुक। खेराङ दुक्पा ङेताते, थोङजीनोङ ङिङज्ये लाङच्या गालाते, छ्याःङ मेत्कान गालाते, अन्ध गालाते थेमे ताजीनोङ ङोचा लाङच्या पेर्दुङबाराङ गालातेनी ख्योकोनला छ्याराङ मिन्दुक। 18 थोगी ङा ख्योकोनला च्यि खि सिते सासीन खेराङला जेसुकै दाङस्यीत ख्योप्स्यीत सिन मेला लुगीन ताकीन सक्कली दुका सिन छ्या स्येबाते सेर ङात्ताङ ङ्यो, ङोचा लाङच्या पेर्दुङबाराङ ओतेकी खोन्दाला ख्योकोनगी ङात्ताङ ओताते खापाङ छ्याःङ दाग माखोबाते खोलाक कार्मुते ङ्योला खोन थेमे खेराङ मिगी थोङस्यीत सिन ङात्ताङ ओताते मलम ङ्योला कु। 19 ङाराङगी ङिङज्ये खाबाते मिओनला ङा थाप्क्यो थेमे लेमु काम खित्स्यीत सिन आबेकी फुज्युङला च्योक ङा थेबाला तालाङ लुक्यो। ख्योकोनगी खिन ओताते मेलेबाते काम खिता ताङला ङे कोता कोताच्योक खि। 20 लो लेमु खाला ङेन। ख्योकोन सेमगी नाङ देताला ओङगो सिन ङा ख्योकोन दोन्दु वाला कातोङगो। ङे थोक खित्जीन थे सेमगी नाङ स्योक सिन सिरकान्ते मि सेमगी नाङ स्यूला ङा थेत्ताङराङ देत्क्यो। थेमे थेत्ताङ ङा ङ्योम्बुराङ भोज सेइओ। 21 शैतान शक्तिला ग्याल्कान्ते मिला ङा ङाराङ सिंहासनदु ङाराङताङ देत ज्युत्क्यो। शैतानला ग्याल्गीन ङाङ ङे आबे सिंहासनदु थेत्ताङराङ देता ओत। 22 ङेन्दा सेम ओत्कान्ते मिकी ठाउँ ठाउँला जम्मा ओङकान्ते येशू ख्रीष्ट मिओनला परमेश्वर आत्मेकी च्यि सिन दुका सिन लेमु खाला ङेन,” सिन सिदुक। |
© 1992 Wycliffe Bible Translators Inc. All rights reserved.
Wycliffe Bible Translators, Inc.