Biblia Todo Logo
Bìoball air-loidhne

- Sanasan -


छ्या स्‍ये च्‍युताते बात 22 - जिरेल

1 थेमे दि तिरी थे दूतकी ङाला चाङबोज्‍यीक तेन्‍सुङ। थे चाङबो बिल्‍लौर सिराते यु च्‍योकराङ साङलोई ओतान। थे चाङबो छ्यु थुङकान्‍ते मिओनगी नोमुङ मिसिन्‍च्‍येते जुनी ङेत्‍क्‍यो। थे चाङबोचेन परमेश्‍वरताङ लुई रीउ देत्‍च्‍येते सिंहासनदुकी थेन्‍गीन

2 थे सारगी मूल लामदुई ख्‍याम्‍गीन ओतान। थे चाङबो फारकेनताङ छुरकेन छेउ ङिकारपा नोमुङ मिसिन्‍च्‍येते जुनी ङेत्‍च्‍येते फलफूल दोङबो ओतान। थे दोङबोला दावाईओङ खाली मेदेता खाला दावे ठाङमा थरी रेरे फलफूल गोन्‍गीनराङ देत्‍च्‍याक्‍वा। थे दोङबो दाम्‍मातेबाचेन लुङबा लुङबे मिला ठाक्‍पा खित्‍च्‍येते मेन दुका।

3 थे सारगी नाङ परमेश्‍वर सराप फापाते मेलेबा सिराते था छ्याःङ मेङगो, सुङ मेङगो। परमेश्‍वरताङ लुई रीउ देत्‍च्‍येते सिंहासन थे सारगी नाङराङ ओङगो। थेमे परमेश्‍वर काम खित्‍कान गाङेकी परमेश्‍वरला छ्ये जोइनराङ देत्‍क्‍यो।

4 थेबा गाङेकी परमेश्‍वर छ्येत थोङगो। थेमे थेबा गाङे टालाला परमेश्‍वर मिन टिबा ओङगो।

5 थेरू था नुप सिराते नोमुङ मेङगो। नाम्‍दाक ओङे लाईदु थेरू बत्तीङ पोरा माफाबो, ङीमे नाम्‍दाकोङ मोगोओ। प्रभु परमेश्‍वरराङ थेबाताङ देतेकी थेराङ थेबे नाम्‍दाक ईन। था थेबेकी सधैँभरि राज्‍य खिनराङ देत्‍क्‍यो।


येशू ग्‍युरला ओङच्‍येते बात

6 थेमे याङराङ थे दूतकी ङाला “थाल्‍लासाक खुई थोङातेताङ थोबाते दि गाङे बात साबाते भन्‍दा नोमुङ खुदुक मोन्‍डोच्‍येते साबा च्‍योकराङ ओङच्‍येते बात ईन। था होत्ता ओङगीन ओताते दि बातओन थे खोरोङ काम खित्‍कान्‍ते मिओनला छ्या स्‍ये ज्‍युताला प्रभु परमेश्‍वरगी थे खोरोङ दूत ताङा ओतान। परमेश्‍वर बात खित्‍कान्‍ते मिओनला थोक खिताला थे खोरोङ आत्‍मा तेरकान्‍ते प्रभु परमेश्‍वरराङ ईन,” सिन सिदुक।

7 थेमे प्रभु येशूकी “था ङा होत्ताराङ ओङगीन ओत। था तिरी ओङच्‍येते परमेश्‍वरगी छ्या स्‍ये च्‍युताते दि किताब नाङ टिबाते बातओन ङेन्‍कान्‍ते मि भाग्‍यमानी ईन,” सिन सिदुक।

8 दि बाततेबा थोकान्‍तेताङ थोङकान्‍ते ङा यूहन्‍ना ईन। ङे दिबा गाङे थोकीनताङ थोङगीन सिन्‍नामेकी ङाला दिबा गाङे तेन्‍ला तेरकान्‍ते परमेश्‍वर दूतला से खिताप सिन ङा थे दूतकी काम्‍बादु गुर्बु खिता खाबा ओतान।

9 थोक खित्‍जीन थेकी ङाला “खुई ङाला दोक खाला परमेश्‍वरला च्‍योक खाला से माकेत। खो थेमे परमेश्‍वर बात खित्‍कान्‍ते खुई आज्‍यो न्‍वाओन थेमे दि किताब नाङ टिबाते बात ङेन्‍कान्‍ते मि गाङे च्‍योकराङ ङाङ परमेश्‍वर काम खित्‍कान्‍तेराङ ईन। थोगी परमेश्‍वरलाकामा छ्ये जो,” सिन सिदुक।

10 थेमे याङराङ थेकी ङाला “था तिरी ओङच्‍येते परमेश्‍वरगी छ्या स्‍ये च्‍युताते दि किताब नाङ टिबाते बातओन छ्याःङ इप्‍ला ब्‍वाला माज्‍यो। च्‍यिला सासीन दुरू साबाच्‍योक गाङे था होत्ताराङ ओङगीन ओत।

11 मेलेबा काम खित्‍कान्‍ते मि मेलेबाराङ खिन देत्‍स्‍यीत। खिता मेङच्‍येते ङोचा लाङच्‍येते काम खित्‍कान्‍ते मिङ थोकराङ खिन देत्‍स्‍यीत। थोकराङ खाला परमेश्‍वरगी खि साबाच्‍योक खित्‍कान्‍ते मि थोकराङ खिन देत्‍स्‍यीत। थेमे सेम खुदुक गाल्‍गीन परमेश्‍वरला मन परे खित्‍च्‍येते काम खित्‍कान्‍ते मिङ खिन ओता च्‍योकराङ खिन देत्‍स्‍यीत,” सिन सिदुक।

12 थेमे याङराङ प्रभु येशूकी “था ङा होत्ताराङ ओङगीन ओत। थेबेकी खाबाते लेमु मेलेबा कामताङ बात ताला मि गाङेला सु सुला च्‍यि तेरा फाप्‍कीका थे थेराङ ङा तेरग्‍यो।

13 ङा अल्‍फा थेमे ओमेगा गाङे भन्‍दा गोमामेई ओताते थेमे तिरी तिरीसाकराङ देत्‍कान्‍ते, शुरूलाराङ ओताते थेमे तिरी तिरीसाकराङ देत्‍कान्‍ते ईन,” सिन सिदुक।

14 दाक्‍पोन खोलाक टुला सफा जोला ज्‍य्‌वाकान्‍ते मिओन भाग्‍यमानी ईन। थोक खानामेई थेबेकी नोमुङ मिसिन्‍च्‍येते जुनी ङेत्‍च्‍येते दोङबो फलफूल सा ङेत्‍क्‍यो। थेबा थे सारगी गोनेकी खाला थे नाङ स्‍यूक्‍पा ङेत्‍क्‍यो।

15 थे सारगी फिनामाचेन फेत्‍कान्‍ते कि च्‍योकराङ मेलेबा खित्‍कान्‍ते मिओन, स्‍युत्‍च्‍या फुत्‍च्‍याताङ मन्‍तर तन्‍तर खित्‍कान्‍ते मिओन, रन्‍डीबाजी थेमे होदि च्‍योक्‍ते खिता मेङच्‍येते काम खित्‍कान्‍ते मिओन, मि सेत्‍कान्‍तेबा, ल्‍हा लुला माने खित्‍कान्‍तेबा थेमे ढाँर खिताला छ्याःङ च्‍योक मिक्‍किकान्‍ते मिओनकामा देत्‍क्‍यो।

16 “थाल्‍लासाक तेन्‍गीन बिन्‍दाते बाततेबा ठाउँ ठाउँला जम्‍मा ओङकान्‍ते ङे मिओनला छ्या स्‍ये ज्‍युताला ङा येशूकीराङ ङाराङ दूतला खो ओत्‍सादु ताङाते ईन। ङा दाऊद गेल्‍बो थरगीते थे सन्‍तानराङ ईन। ङोमु पाखाला स्‍यारच्‍येते आउदी खाला टल्‍के खित्‍च्‍येते कार्मा ङाराङ ईन,” सिन सिदुक।

17 थेमे परमेश्‍वर आत्‍माताङ लुई रीउ बेउलीकीचेन “लो स्‍योक, होत्ता स्‍योक,” सिन सिदुक। दि बात थोकान्‍ते मिबरी गाङेकी “लो होत्ता स्‍योक,” सिन सि। सुइँदाला कोम्‍बा लाबा ओत्‍सीन परमेश्‍वर दोन्‍दु स्‍योक। दोक खाला परमेश्‍वरगी तेरच्‍येते छ्यु थुङा सेम खाला थे दोन्‍दु ओङकान गाङेकी छ्याःङ मेज्‍येला खाला नोमुङ मिसिन्‍च्‍येते जुनी ङेत्‍च्‍येते छ्यु थुङा ङेत्‍क्‍यो।

18 था तिरी ओङच्‍येते परमेश्‍वरगी छ्या स्‍ये च्‍युताते दि किताब नाङ टिबाते बातओन ङेन्‍कान गाङेला ङा यूहन्‍ना दि बातला च्‍याङबो खि सिन सिओ। चुक सासीन दि किताब नाङ टिबाते दि बातओन नाङ सुइँदेकी खइँदा ल्‍हाक्‍पा बात थपे खासीन परमेश्‍वरगी थोक्‍ते मिला दि किताबला साबा ओताते आउदी मेलेबा मेलेबा रोग लै खित ज्‍युत्‍क्‍यो थेमे ज्‍यीबा लाङच्‍या दुक्‍पातेबाङ थेलाराङ ओङ ज्‍युत्‍क्‍यो।

19 थोकराङ खाईन सुइँदेकी दि किताब नाङदुकी खइँदा टेक्‍टेज्‍यीक बातकामा थेन्‍गीन क्‍युरसुङ सासीन थोक खित्‍कान्‍ते मिलाङ परमेश्‍वरगी नोमुङ मिसिन्‍च्‍येते जुनी ङेत्‍च्‍येते फलफूल सार मुज्‍युदो। थोक्‍ते मिला परमेश्‍वर सार सिरच्‍येते साम्‍बाते यरूशलेम नाङदुङ स्‍यूक मुज्‍युदो। दि दोङबोताङ सारगी बातचेन दि किताब नाङराङ टिबा ओत।

20 दि गाङे बात दुरू साबा च्‍योकराङ ईन, ईन्‍दातेराङ ईन सिन सिरकान्‍तेकी “था ङा होत्ताराङ ओङगीन ओत,” सिन सिओ। आमेन, लो स्‍योक स्‍योक प्रभु येशू।

21 परमेश्‍वर सन्‍तान गाङेला प्रभु येशूकी दया खिनराङ देत्‍स्‍यीत। आमेन।

© 1992 Wycliffe Bible Translators Inc. All rights reserved.

Wycliffe Bible Translators, Inc.
Lean sinn:



Sanasan