छ्या स्ये च्युताते बात 21 - जिरेलसाम्बाते नामताङ पृथ्वी बात 1 थेमे ङे साम्बाते नामताङ पृथ्वी थोङसुङ। थे थोङगी नामताङ पृथ्वीचेन तोरगीन सिन्दा ओतान। थाचेन थेरू समुन्द्रङ मेतान। 2 थेमे परमेश्वर सार सिरच्येते साम्बाते यरूशलेम परमेश्वर देत्सादुई स्वर्गनेकी थुल्लाला फाप्कीन ओताते ङे थोङसुङ। थे सारचेन लेमु लेमु खोलाकताङ गहनातेबा कोन्गीन बेउले लाईदु ठीक खाईन ज्याक्पाते बेउली च्योकराङ थोङगीन ओतान। 3 थेमे सिंहासनदुकी आउदी कस्स्ये खाईन “थानामेईचेन सधैँ लाईदु परमेश्वर थे खोरोङ मिओनताङ देत्क्यो। थेमे थेबा परमेश्वर मि ओङगो। परमेश्वर थेबाताङ ङ्योम्बु देत्ला थेचेन थेबे परमेश्वर ओङगो। 4 था थेकी थेबा गाङे मिकच्युक पिला तेरग्यो। स्यिच्येते सिरातेचेन था थेबे नाङ नोमुङ मेङगो। थोकराङ खाला पीर खित्च्येते, ङ्वा फाप्च्येते, नाचाताङ दोक्ते ज्येनतोक दुक्पा सिराते था थेबाला छ्याःङ मेङगो। दोक्ते गोमे बात था गाङे सिन्गीन सिन्दा ओत,” सिन सिरा ङे थोसुङ। 5 थेरूई थे सिंहासन लाक्तु देत्कान्तेकी “था ङा ओताते जति गाङे साम्बा जोइओ,” सिन सिदुक। थेमे थेकी ङाला “दि बातओन टि। दिबा गाङे साबाते भन्दा नोमुङ खुदुक मोन्डोच्येते साबा च्योकराङ ओङच्येते बात ईन,” सिदुक। 6 लोईन थेकी “जे ओङा फाप्च्या ओतान थे था गाङे ओङगीन सिन्सुङ। ङा अल्फा थेमे ओमेगा शुरूलाराङ ओताते थेमे तिरी तिरीसाकराङ देत्कान्ते ईन। कोम्बा खाला ओङकान्ते मिला ङा छ्याःङ मिलिन्दा खाला छ्यु थुङा तेरग्यो। दि मोनगी छ्यु थुङकान्ते मिकी नोमुङ मिसिन्च्येते जुनी ङेत्क्यो। 7 शैतान शक्तिला ग्याल्कान्ते मिकी ङे तेरच्येते होदिबा गाङे ङेत्क्यो। ङा थे मि परमेश्वर ओङगो थेमे थेचेन ङे फुज्युङ ओङगो। 8 तर ङे मि ईन सिरा ज्यीबा खित्कान्तेबा, ङाला विश्वास मिक्किकान्तेबा, मेलेबा मेलेबा काम खित्कान्तेबा, मि सेत्कान्तेबा, रन्डीबाजी थेमे होदि च्योक्ते खिता मेङच्येते काम खित्कान्तेबा, स्युत्च्या फुत्च्याताङ मन्तर तन्तर खित्कान्तेबा, ल्हा लुला माने खित्कान्तेबा थेमे ढाँर खित्कान्तेबाचेन गाङेराङ गन्धकताङ मे बाराते ज्यीबा लाङच्याज्यीक मे धुनीमा स्यूक्पा फाप्क्यो। था तिरी ज्यीबा लाङच्याज्यीक मे धुनीमा स्यूक्च्येते सिरातेचेन होदिराङ ईन,” सिन सिदुक। साम्बाते यरूशलेम बात 9 थेमे दि तिरी परमेश्वर दूतज्यीगी ङाला “देपा स्योक, खोल्ला ङा थे बेउली तेन्ला तेरग्यो। लुई रीउ फेम्मे थेराङ ईन,” सिन सिदुक। थे दूतचेन आउदी मेलेबा मेलेबा रोगताङ अनिकाल लाङ ज्युत्च्येते थेमे ज्यीबा लाङच्या दुक्पा ओङ ज्युत्च्येते जिम्मा खुराते कचौरा दुईनबो खुरकान्ते परमेश्वर दूत दुईनबो नाङ दोक्पोई ओतान। 10 थेरूई परमेश्वर आत्मेकी जुम जुम्बालाराङ थे दूतकी ङाला आउदी थोम्बोज्यीक बोमगी टुप्पो लाक्तु खेरगीन परमेश्वर देत्सादुई स्वर्गनेकी थुल्लाला फाप्कीन ओताते परमेश्वर सार सिरच्येते यरूशलेम तेन्गीन बिन्सुङ। 11 मिगी ताराङ मुथुप्च्या झिलिमिली नाम्दाकला देत्कान्ते परमेश्वर थेरू देता ओतेकी थे सार झिलिमिली गाला ओतान। थे आउदी लेमुते बिल्लौर थेमे स्फटिक सिराते यु च्योकराङ खाला टल्के खाबा थोङगीन ओतान। 12 थे सारगी फेरोला फेरो खिरी आउदी जोदाईताङ थोम्बोज्यीक गारो चिबा ओतान। थे गारोला गो च्युन्ङी थेन्दा ओतान। थेमे थे गो रेरेला परमेश्वर दूत रेरे पाले देता ओतान। थे गो च्युन्ङी लाक्तु इस्राएलीओन थर च्युन्ङी मिन टिबा ओतान। 13 थे गोओनचेन पूर्व, पश्चिम, उत्तर, दक्षिण सुर रेरेला सुम सुम सुम सुम थेन्दा ओतान। 14 थे सारगी गारोते जग च्युन्ङी ओतान। थे जगओन लाक्तुचेन लुई रीउकी खटे खाबाते मेन्दा च्युन्ङी मिओन मिन टिबा ओतान। 15 ङात्ताङ बात खित्कान्ते दूतकी लाःक्तु थे सारताङ थे गो थेमे सारगी गारो थाप्च्येते सेरगी डन्डी ओतान। 16 थे सार गाजालाङ रीम्बुलाङ बराबर ओताज्यीक सुर स्यी खाबाई ओतान। थे सेरगी डन्डीकी थाप्जीन थे सार कोस सय दुईनताङ खाल ङिताङ च्युताम्बा जोदा ओतान। थे गाजाला, थोम्बोला थेमे रीम्बुलाङ बराबर ओतान। 17 थेमे थे दूतकी सारगी गारोङ थाप्सुङ। मिओनगी थापा च्योकराङ खाला थाप्जीन थे गारो ठु खाल दुईनताङ स्यी थोम्बो ओतान। 18 थे गारोचेन स्फटिक सिराते युईते जोबा ओतान। थेमे थे सारचेन सिसा च्योकराङ जेसुकै छ्याङे थोङा थुप्च्याज्यीक सक्कलीते सेरगी जोबा ओतान। 19 गारो जगओनचेन आउदी लेमुते खुदुक खुदुकते यु लुगीन जोबा ओतान। गाङे भन्दा गोमे जगचेन स्फटिक सिराते युईते, थे तिरी जग नीर सिराते युईते, 20 थे तिरीते लाल सिराते युईते ओतान। थे तिरी जग पन्ना सिराते युईते, थे तिरीते गोमेद सिराते युईते थेमे थे तिरीते सारडियस सिराते युईते ओतान। थे तिरी जग पीत सिराते युईते, थे तिरीते फिरोजा सिराते युईते थेमे थे तिरीते पुष्पराज सिराते युईते ओतान। थोकराङ खाला थे तिरी जग लहसुने सिराते युईते, थे तिरीते धूम्रकान्त सिराते युईते थेमे गाङे भन्दा तिरी जगचेन मर्तिस सिराते युईते ओतान। 21 थे गारो गो च्युन्ङीचेन मोती च्युन्ङीकी जोबा ओतान। थे गोतेबा मोती रेरेकी गो रेरे जोबा ओतान। थे सारगी लामचेन सिसा च्योकराङ जेसुकै छ्याङे थोङा थुप्च्याज्यीक सक्कलीते सेरगी जोबा ओतान। 22 थेमे ङे थे सारगी नाङ परमेश्वर मन्दिर माथोङसुङ। च्यिला सासीन थे सारगी नाङ मन्दिरचेन गाङे भन्दा छ्येज्यीक शक्ति ओताते प्रभु परमेश्वर थेमे लुई रीउराङ ईन। 23 नाम्दाक ओङाला थेरू दागार ङीमा गोकीन मेतान। मिगी ताराङ मुथुप्च्या झिलिमिली नाम्दाकला देत्कान्ते परमेश्वर थेरू ओतेकी थे सारला नाम्दाक छ्याङे जोच्याक्वा। लुई रीउराङ थे सारदु नाम्दाक तेरकान्ते बत्ती दुका। 24 लुङबा लुङबे मि थे नाम्दाकलाराङ ख्याम्ग्यो। थेमे सा लुङबा खाङगी गेल्बोओनगीङ खोपरोङ सम्पत्तितेबा थे सारगी नाङ खुलाङगो। 25 थे सारगी गारो गोतेबा नोमुङ मेच्येदो। च्यिला सासीन नुप सिराते थेरू ओङराङ मेङगो। 26 लुङबा लुङबे मिकी खोपरोङ सम्पत्ति थेमे खोपरोङताङ ओताते जति गाङे थे सारगी नाङ खुलाङगो। 27 परमेश्वरला मन परे मिक्किच्येते सिराते थे सारगी नाङ छ्याःङ मेङगो। खिता मेङच्येते ङोचा लाङच्येते काम खित्कान्ते थेमे ढाँर खित्कान्तेबाचेन बान्दा थे सारगी नाङ स्यूक्पा मेङेदो। खालि नोमुङ मिसिन्च्येते जुनी ङेत्कान्ते मिओन मिन टिबा ओताते किताब नाङ खोपरोङ मिन ओताते मिओनकामा थे सारगी नाङ स्यूक्पा ङेत्क्यो। थे मिन टिबाते किताबचेन लुई रीउते ईन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.