छ्या स्ये च्युताते बात 20 - जिरेलशैतानला लो हजारज्यीकसाक ठाबाते बात 1 थेरूई ङे स्वर्गनेकी ओङगीन ओताते परमेश्वर दूतज्यीकला थोङसुङ। थेकी लाःक्तु खापान खापान तीङ ओताते डालुम गोई साँचोताङ आउदी रोम्बोज्यीक साङलो खुरा ओतान। 2 थेमे थेकी थे डुकला जुम्गीन च्याकीन लो हजारज्यीकसाक छ्याःङ खिता मुथुप्स्यीत सिन साङलोकी ठासुङ। थे डुकचेन गोमामेई मिओनला छक्के खित्कान्ते रूल ईन। थे शैतान दैंता ईन। 3 ठाकीन सिन्नामेई थे दूतकी लो हजारज्यीक माछाङथुप याङराङ थेकी लुङबा लुङबे मिला छक्के मिक्किस्यीत सिन थे डुकला खापान खापान तीङ ओताते डालुम नाङमा युकीन क्युरसुङ। थेमे थे डालुम गो च्येत्कीन सुङगीङ बेता मुथुप्स्यीत सिन थे गोला छाप ग्याप्सुङ। लो हजारज्यीक छाङनामेईचेन टिक्पी दिनगी लाईदुकामा ईन्सीनोङ थेला थेरूई थेन्ला डोला फाप्क्यो। 4 थेमे दि तिरी ङे सिंहासनतेबा थेमे थे लाक्तु देत्कान्तेबाला थोङसुङ। थेबालाचेन न्याय खित्च्येते अधिकार बिन्दा ओतान। लोक्ला ङे येशू सु ईन्दे, थेकी च्यि खिते सिन ज्येनला लापेकी थेमे ज्येनला परमेश्वर बात लापेकी खित्सादु गोः तुप्कीन सेताते मिओन आत्मा थोङसुङ। थेबेकी थे जन्तु थेमे थे मूर्तिला माने खाबा मेतान। थेमे खोपरोङ टालाला कि सामे लाक्पाला थे जन्तु मिनगी छाप देक च्युता मेतान। थेबा गाङेराङ दाक सोम्बो लोक्सुङ। थेमे लो हजारज्यीकसाक ख्रीष्टताङ ङ्योम्बुराङ राज्य खासुङ। 5 स्याप्तेबा सोम्बो लोक्च्येते गाङे भन्दा थोङगी पालोचेन दिराङ ईन। स्याप्तेबाबरी ज्येनचेन थे लो हजारज्यीक मासिनथुप सुङ सोम्बो मालोक्सुङ। 6 स्याप्तेबे नाङ दि गोमे बाजिला परमेश्वरगी सोम्बो लोक्पाते मिओन भाग्यमानी ईन। थेबाचेन सेम खुदुक गाल्गीन लेमु काम खित्कान्ते मिओन ईन। थाचेन दिबेकी ज्यीबा लाङच्याज्यीक मे धुनी नाङ स्यूक्पा फाप्च्येते बातकीते छ्याःङ ज्यीबा खिता माफाबो। दिबा था परमेश्वरताङ ख्रीष्टकी दोन्दु पूजारी ओङला देता ङेत्क्यो। दिबेकी लो हजारज्यीकसाक ख्रीष्टताङराङ राज्य खिओ। शैतानला सधैँभरि लाईदु नरककुण्डमा लुक्पाते 7 थे लो हजारज्यीक सिन्नामेकीचेन शैतानला ठाकीन किल्गीन ज्याक्सादुकी तोङगो। 8 ताङनामेकी थे लुङबा लुङबे मिला छक्के खिताला दि पृथ्वी सुर स्यीकारपा डुइओ। लुङबा लुङबे मि साबातेचेन गोगताङ मागोग ईन। गाल्ला थेकी मिओनला लडाइँ खिताला रूला खुलाङगो। थोक खाईन खुलाबाते मि ङोला ङ्वा मुथुप्च्या मुन्तीसरी ओङगो। 9 थोक खाईन खुलानामेकी थेबेकी दि सा लुङबा खाङ गाङेपा गाल्गीन परमेश्वर सन्तानओन देत्सादु थेमे परमेश्वरगी मन परे खाबाते सारला घेरो हाले खासुङ। तर स्वर्गनेकी मे ङील्गीन थेबा गाङे खराप खुरूप छिगीन स्यिसुङ। 10 थेमे ईन्सीन थोक खाला मिओनला छक्के खित्कान्ते शैतानला गन्धकताङ मे बाराते ज्यीबा लाङच्याज्यीक मे धुनीमा क्युरसुङ। थे जन्तु थेमे डुगी सिर च्युताते बात खित्कान्ते जन्तुलाङ गोमाका थेमाराङ क्युरा ओतान। था थेबा सुमबोकी ङीन नुप नोमुङ ङा स्वा मेङेता खाला खपेराङ खिता मुथुप्च्येते दुक्पा भोगे खिनराङ देता फाप्क्यो। स्याप्ते मि गाङेते न्याय ओङाते 11 थेरूई तिरी ङे कार्मुज्यीक जोदाई सिंहासनताङ थे लाक देत्कान्तेला थोङसुङ। थे मिगी दोन्दुकी साताङ नाम दाक तोरसुङ। थेमे साताङ नाम याङराङ खापाङ माथोङसुङ। 12 थेमे ङे छ्ये टेक्टे स्याप्ते मिबरी गाङेला थे सिंहासन दोन्दु लाकीन देता ओताते थोङसुङ। थेरू किताबओन खोले खासुङ। थे तिरी ज्येनज्यीक किताब खोले खासुङ। दि तिरी किताबचेन नोमुङ मिसिन्च्येते जुनी ङेत्कान्ते मिओन मिन टिबाते किताब ओतान। मिओनगी खोपरोङ जुनी खाङ खाबाते लेमु मेलेबा गाङे काम थे किताबओनला टिबा ओतान। थेबेकी खाबाते काम ताकीनराङ थेबा गाङेते न्याय खासुङ। 13 समुन्द्रे नाङ नुप्कीन स्याप्ते मि गाङे थेजीन थेरू ओतान। थेमे स्याप्तेबा ज्येनलाङ कालगी किल्गीन ज्य्वाबा माथुप्सुङ। थोकराङ खाईन स्याप्ते मिओन देत्च्येते ठाउँदु ओताते मितेबाङ गाङे थेरू वाबा ओतान। थोक ओङनामेई खोपरोङ खोपरोङगी खाबाते काम ताकीन थे मिओन न्याय ओङा ओतान। 14 दि तिरीचेन काल थेमे स्याप्ते मिओन देत्च्येते ठाउँला ज्यीबा लाङच्याज्यीक मे धुनीमा क्युरसुङ। था तिरी ज्यीबा लाङच्याज्यीक मे धुनीमा स्यूक्च्येते सिरातेचेन होदिराङ ईन। 15 नोमुङ मिसिन्च्येते जुनी ङेत्कान्ते मिओन मिन टिबा ओताते किताब नाङ मिन मेताते मिलाचेन गाङेला थे मे धुनीमा क्युरसुङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.