छ्या स्ये च्युताते बात 2 - जिरेलएफिससदु जम्मा ओङकान्ते येशू ख्रीष्ट मिओनला टिबाते चिट्ठी 1 एफिसस सारदु जम्मा ओङकान्ते येशू ख्रीष्ट मिओनला ताकोरा खित्कान्ते परमेश्वर दूतला दोक सिन टि। दि बातचेन सामे लाक्पे नाङ कार्मा दुईन ओताते थेमे बत्ती पारला ज्य्वाच्येते सेरगी सामदान दुईनगी किल्दु ख्याम्कान्ते ङा सिन ओत। 2 च्यि सासीन ख्योकोनगी खिन ओताते गाङे काम ङाला छ्या ओत। ख्योकोनगी स्याप स्याप खाईन काम खाबाते थेमे दुक्पा ओङजीनोङ सेम मेसेता खाईन देताते ङाला छ्या ओत। थेमे थेरू मेलेबा काम खित्कान्ते मिओनला ख्योकोनगी मन परे माक्याबातेङ ङाला छ्या ओत। खोपरोङ येशू ख्रीष्टकी खटे खाबाते मि ईन सिन सिरकान्तेबाला ख्योकोनगी थेबा पक्काराङ थोक्ते मि ईन्दाकाना मेन्दाका सिन विचार खाईन ताकीन थेबा थोक्ते मि मेन सिन छ्या स्येला दुक। थेबानी खोपरोङगी ईन साबा च्योक्ते मि ईनराङ मेन। 3 ङे मि ईन्देकी खित्सादु पीरताङ दुक्पा आइ परे खित्जीनोङ सेम मेसेता खाईन ख्योकोनगी ङाला विश्वास खिनराङ देत्सुङ। 4 दोक ईन्सीनोङ ङे ख्योकोनला सिरा फाप्च्येते बातज्यीक ओत। च्यि सासीन ख्योकोनगी ङाला गोमा च्योकराङ खाला ङिङज्ये मिक्किदुक। 5 ख्योकोनगी नामनामेई ङाला थोक खिता ताङाते ईन्दे सिन ठेम्बा खि। थेमे थोक खिता ताङाते लेमु मेन्दाक्वा सिन छ्या स्येला लोक्ला गोमा च्योकराङ खि। दोक माक्यासुङ सासीन ङा थेपा वाला च्याला थे बत्ती पारला ज्य्वाच्येते सामदानला थेरू मोज्योओ, ङा थे सामदान थेरूकी थेन्ग्यो। 6 बातज्यीकचेन ख्योकोनगी लेमु खाला दुक। निकोलाइटन सिराते पाटी मिओनगी खित्च्येते कामचेन ङाला च्योकराङ ख्योकोनलाङ बान्दा गा मालाङदुक। 7 ङेन्दा सेम ओत्कान्ते मिकी ठाउँ ठाउँला जम्मा ओङकान्ते येशू ख्रीष्ट मिओनला परमेश्वर आत्मेकी च्यि सिन दुका सिन लेमु खाला ङेन। शैतान शक्तिला ग्याल्कान्ते मिलाचेन ङा स्वर्गने ओताते दोङबो फलफूल सार ज्युत्क्यो। थे दोङबो फलफूल साकान्ते मिकी नोमुङ मिसिन्च्येते जुनी ङेत्क्यो। स्मर्नादु जम्मा ओङकान्ते येशू ख्रीष्ट मिओनला टिबाते चिट्ठी 8 स्मर्ना सारदु जम्मा ओङकान्ते येशू ख्रीष्ट मिओनला ताकोरा खित्कान्ते परमेश्वर दूतला दोक सिन टि। दि बातचेन गाङे भन्दा गोमामेई ओताते थेमे तिरी तिरीसाकराङ देत्कान्ते, स्यिइन च्याकीन सोम्बो लोक्पा ओताते ङा सिन ओत। 9 च्यि सासीन ख्योकोनला ज्येनगी दुक्पा बिन्दाते बात ङाला छ्या ओत। थेमे ख्योकोनला दाङच्या ख्योप्च्या मेत सिनोङ ङाला छ्या ओत। ईन्सीनोङ ख्योकोन छ्याःङ मेताते मि मेन। खोपरोङ यहूदी ईन सिन सिरकान तर लेमुते काम मिक्किकान्ते मिओनगी ईन्दा मेन्दे दोष लै खाईन ख्योकोन विरोध खाबाते बात ङाला छ्या ओत। थेबाचेन शैतानताङ डिक्कान्ते मि ईन। 10 ख्योकोनला आइ परे खिता खाबाते दुक्पा थोङला ख्योकोन ज्यीबा माकेत। ना ख्योकोनगी ङाला विश्वास खिता तोङगीता सिन ताप्ला शैतानगी ख्योकोन नाङ दोक्पोई ङिला जेलला लु ज्युत्क्यो। थोक खासीनोङ ङीमा च्युताम्बाकामा ख्योकोनला दुक्पा ओङगो। स्यापराङ फाप्सीनोङ ख्योकोनगी ङाला विश्वास खिता मातोङ। थेमे ङा ख्योकोनला इनाम तेरग्यो, थेचेन नोमुङ मिसिन्च्येते जुनी ईन। 11 ङेन्दा सेम ओत्कान्ते मिकी ठाउँ ठाउँला जम्मा ओङकान्ते येशू ख्रीष्ट मिओनला परमेश्वर आत्मेकी च्यि सिन दुका सिन लेमु खाला ङेन। शैतान शक्तिला ग्याल्कान्ते मिकी था तिरी ज्यीबा लाङच्याज्यीक मे धुनी नाङ स्यूक्च्येते बातकीते छ्याःङ ज्यीबा खिता माफाबो। पर्गाममदु जम्मा ओङकान्ते येशू ख्रीष्ट मिओनला टिबाते चिट्ठी 12 पर्गामम सारदु जम्मा ओङकान्ते येशू ख्रीष्ट मिओनला ताकोरा खित्कान्ते परमेश्वर दूतला दोक सिन टि। दि बातचेन खानामेकी आउदी नोम्बोई धार ङि खाबाते तरवार थेन्दा ओताते ङा सिन ओत। 13 च्यि सासीन ख्योकोनचेन शैतान सिंहासन ओताते सारदु देता ओत सिन ङाला छ्या ओत। दोक ईन्सीनोङ ख्योकोनगी ङाला माताङसुङ, ङाला विश्वास खिनराङ देत्सुङ। ङा सु ईन्दे, ङे च्यि खिते सिन सिनराङ देत्कान्ते एन्टिपासला थे सारदुराङ सेत्जीनोङ ख्योकोनगी ङाला विश्वास खिता माताङसुङ। 14 थोक ईन्सीनोङ ङे ख्योकोनला सिरा फाप्च्येते बातज्यीक बात ङि ओत। च्यि सासीन ख्योकोन नाङ लाला लाला बालामगी लापाते बात ङेन्कान दुक। बालामगीचेन बालाक गेल्बोला ल्हाला पूजा खाबाते सोसीन ओङगो, रन्डीबाजी थेमे होदि च्योक्ते खिता मेङच्येते काम खासीनोङ ओङगो सिन लाप्कीन बिन्गीन इस्राएलीओनला थोक खित च्युता ओतान। 15 लोक्ला ख्योकोन नाङ कोई कोई निकोलाइटन सिराते पाटी मिओनगी लोप्च्येते बात ङेन्कानोङ दुक। 16 बालाम बात थेमे निकोलाइटन सिराते पाटी मिओनगी लोप्च्येते बात ङेन्ला थेबेकी खि साबा च्योकराङ खित्कान्तेबा ख्योकोनगी थोक खिता थोङ। थोक माक्यासुङ तोबो सासीन ङा थेपा वाला ङे खानामेकी थेन्दा ओताते तरवार खुरला थे मिओनताङ जीङगो। 17 ङेन्दा सेम ओत्कान्ते मिकी ठाउँ ठाउँला जम्मा ओङकान्ते येशू ख्रीष्ट मिओनला परमेश्वर आत्मेकी च्यि सिन दुका सिन लेमु खाला ङेन। शैतान शक्तिला ग्याल्कान्ते मिला ङा परमेश्वरताङ ओताते ब्वाकीन ज्याक्पाते मन्न सा तेरग्यो। थेमे ङा थेला दो कार्मुज्यीक तेरग्यो। थे दोला साम्बाज्यीक मिन टिबा ओङगो। थे दो ङेत्कान्ते मिकीकामा थेरू टिबाते मिनगी अर्थ खोक्यो। थिआटीरादु जम्मा ओङकान्ते येशू ख्रीष्ट मिओनला टिबाते चिट्ठी 18 थिआटीरा सारदु जम्मा ओङकान्ते येशू ख्रीष्ट मिओनला ताकोरा खित्कान्ते परमेश्वर दूतला दोक सिन टि। दि बातचेन मे च्येला च्योक खाला चम्के खित्च्याज्यीक मिकताङ आरनला लुगीन खारे खाबाते पित्तल च्योक खाला टल्के खित्च्याज्यीक काम्बा ओताते परमेश्वर फुज्युङ ङा सिन ओत। 19 च्यि सासीन ख्योकोनगी च्यि च्यि खिन ओते सिन गाङे ङाला छ्या ओत। ख्योकोनगी ङाला खजो ङिङज्ये खिते सिरच्येते थेमे ङाला विश्वास खाबाते, लेमुते काम खाबाते थेमे ख्योकोनगी पीर दुक्पा खपे खिन ओताते गाङे बात ङाला छ्या ओत। होदि कामतेबा ख्योकोनगी गोमा भन्दा थरिङोला झन झन ल्हाक्पा खिन ओताते बादोङ ङाला छ्या ओत। 20 दोक ईन्सीनोङ ङे ख्योकोनला सिरा फाप्च्येते बातज्यीक ओत। चुक सासीन ख्योकोनगी जिजेबेलगी साबाते बात ङेन्गीदुक। थेकी थे मोरोङला परमेश्वर बात खित्कान्ते फेम्मे मि ईन साला ङे काम खित्कान ख्योकोनला मेन्दा मेन्दा बात लाप्ला रन्डीबाजी थेमे होदि च्योक्ते खिता मेङच्येते काम खित च्युत्ला थेमे ल्हाला पूजा खाबाते सार च्युत्ला लुइदुक। 21 ङे थेला थोक माकेत साकीन थोक खिता थोङ सिन याङ याङ मौकाङ बिन्दाप। तर थेकी माङेन्सुङ। 22 थोगी था ङा थेला आउदी मेलेबाते रोग खो च्युत्ला नार ज्युत्क्यो। थेमे थेत्ताङ डिक्ला थे च्योकराङ रन्डीबाजी थेमे होदि च्योक्ते खिता मेङच्येते काम खित्कानलाङ थोक्ते काम खिता माताङथुप ङा आउदी मेलेबा खाला दुक्पा तेरग्यो। 23 थोकराङ खाला थे फिजा च्योकराङ ओङला थे बात ङेन्कान्ते मिओनलाङ ङा आउदी मेलेबाते रोग लै खित च्युत्ला स्यिर ज्युत्क्यो। दोक ओङा थोङनामेकी मि सेमगी बात गाङे छ्या स्येकान्ते ङाराङ दुका सिन ठाउँ ठाउँला जम्मा ओङकान्ते येशू ख्रीष्ट मि गाङेकी छ्या स्येक्यो। ङा ख्योकोन काम ताला लेमु खाबा ओत्सीन लेमु, मेलेबा खाबा ओत्सीन मेलेबाराङ खिओ। 24 थेमे थिआटीरादु देत्कान्ते ज्येनगी च्योक मिक्किकान ख्योकोनलाचेन ङा खेराङगी खिन ओताते लाक्तु ज्येन ल्हाक्पा दुक्पा मेतेरो। ख्योकोनचेन ज्येन च्योकराङ जिजेबेलगी साबाते बात मेङेन्कान्ते थेमे कोई कोई मिकी साबाच्योक शैतानगी कोई कोई मिलाकामा छ्या स्ये ज्युत्च्येते बात मेङेन्कान्ते मि ईन। 25 बातज्यीकचेन ङा ख्योकोनला सिओ। च्यि सासीन ङा ओङ ओङसाक ख्योकोनगी थोरूमसाक खिन ओता च्योकराङ खाला ङाला विश्वास खिन देत। 26-27 तिरीसाक ङे साबाच्योक खिन देत्ला शैतान शक्तिला ग्याल्कान्ते मिला ङा लुङबा लुङबे मिला राज्य खित्च्येते अधिकार तेरग्यो। ङे आबेकी ङाला राज्य खित्च्येते अधिकार बिन्दा च्योकराङ खाला ङाङ थेला दोक खाला राज्य खित्च्येते अधिकार तेरग्यो। थेमे थेकी च्याकी डन्डीकी सबी गरी पुरा च्योकराङ खाला लुङबा लुङबे मिला आउदी कडा खाला राज्य खिओ। 28 थेमे थेला ङा ङोमु पाखाला स्यारच्येते कार्मा तेरग्यो। 29 ङेन्दा सेम ओत्कान्ते मिकी ठाउँ ठाउँला जम्मा ओङकान्ते येशू ख्रीष्ट मिओनला परमेश्वर आत्मेकी च्यि सिन दुका सिन लेमु खाला ङेन। |
© 1992 Wycliffe Bible Translators Inc. All rights reserved.
Wycliffe Bible Translators, Inc.