छ्या स्ये च्युताते बात 19 - जिरेलपरमेश्वरते जय जय खाबाते 1 थेमे दि तिरी ङे स्वर्गने आउदी काल्बेई मि ङोरो च्योकराङ कस्स्ये खाईन दोक साबा थोसुङ। थेबेकी “हल्लेलूयाह, मिओनला पापकी सजायदुकी डेल्कान्ते ङुरूङ परमेश्वरकामा ईन। थेते जय जय ओङस्यीत। थेत्ताङ छ्येज्यीक शक्ति ओत। 2 सुङलाङ काका पाका मिक्किता खाला सु सुला च्यि सजाय तेरा फाप्च्येते ईन्दे थे सजायराङ बिन्ला न्याय खित्कान्ते थेराङ ईन। थे मोरोङगी खिन ओताते खिता मेङच्येते ङोचा लाङच्येते काम खित च्युत्ला दि सा लुङबा खाङगी मिला ङ्ये ज्युत्कान्ते छ्याःङ ङोचा मेताते रन्डीला थेकी सोई खित्च्याज्यीकराङ सजाय बिन्दा ओत। थे खोरोङ काम खित्कान्ते मिओनला सेतेकी थेकी थेला सजाय बिन्दा ओत,” सिन ओतान। 3 परमेश्वरला छ्ये जोइन थेबेकी याङराङ “हल्लेलूयाह, थे जोदाते सार छिक्पाते थुताचेन सधैँभरि नामने लाला डुइनराङ देत्क्यो,” सिन सिदुक। 4 थेमे थे मेरा खालज्यीकताङ स्यीबो छ्ये छ्येतेबा थेमे थे ङेपाक ओताते थरी स्यीबोकी “आमेन, हल्लेलूयाह,” सिन थे सिंहासन लाक देत्कान्ते परमेश्वरला गुर्बु खाईन से खासुङ। 5 थेमे सिंहासनदुकीचेन “परमेश्वरताङ ज्यीबा खिन थे काम खित्कान्तेबा छ्ये टेक्टे ख्योकोन गाङेकी जय जय सिन ङुरूङ परमेश्वरला छ्ये जो,” साबाते ङे थोसुङ। 6 दि तिरीङ ङे आउदी काल्बेई मिकी छेरा खाबाते ङोरो च्योक थोबा ओतान। थे ङोरोचेन छ्युई छहरे स्य्वाँरा च्योक थेमे नामज्योक बुराङ साच्या खाईन नाम गाराङताङ गुरूङ खाबाच्योक ओतान। थेबेकी “हल्लेलूयाह, गाङे भन्दा छ्येज्यीक शक्ति ओताते ङुरूङ प्रभु परमेश्वरगी था पूरो खाला दि सा लुङबा खाङ राज्य खिओ। 7 ङुरूङ गाङेराङ गा खिइ। आउदी गा खिनकामा थेला छ्ये जोइ। था लुई रीउते फाङमा ओङा खाईन सिन्सुङ। थे बेउलीचेन थे मोरोङराङ ठीक ओङगीन देत्ला दुक। 8 थेला खोन्दाला सिन टल्के खित्च्याज्यीक ओमे थोपो च्योकराङ कार्मुज्यीक आउदी लेमुते कार्मुते खोलाक बिन्दा ओतान,” सिन ओतान। कार्मुते खोलाक साबातेचेन परमेश्वर सन्तानओनगी परमेश्वरगी खि साबा साबाच्योक खाबाते लेमुते काम ईन। 9 थेमे थे परमेश्वर दूतकी ङाला “दि बात टि। लुई रीउ फाङमा साप्ला काताङाते मिओन भाग्यमानी ईन,” सिन सिदुक। थेकी लोक्ला “दि बातचेन साँचोते बातकामा खित्कान्ते परमेश्वर थे खोरोङगीराङ साबाते ईन,” सिनोङ सिदुक। 10 थेकी थोक सानामेई से खिताप सिन ङा थे दूतकी काम्बादु गुर्बु खिता खाबा ओतान। तर थेकी ङाला “खुई ङाला दोक खाला परमेश्वरला च्योक खाला से माकेत। येशू सु ईन्दे, थेकी च्यि खिते सिन लोप्कान्ते खोत्ताङ खुई आज्यो न्वाओन च्योकराङ ङाङ परमेश्वर काम खित्कान्तेकामा ईन। थोगी परमेश्वरलाकामा छ्ये जो। येशू सु ईन्दे, थेकी च्यि खिते सिन लोप्च्येतेचेन परमेश्वर आत्मे छ्य्वापेई खित्च्येते ईन,” सिन सिदुक। कार्मुते घोडे लाक जेक्कान्ते बात 11 थोक थोक ओङगीन सिन्नामेकी ङे स्वर्ग गाङे ओङे फेता ओता थोङसुङ। थेरू घोडा कार्मुज्यीक ओतान। थेमे थे घोडे लाक जेक्कान्ते मिनचेन खिओ साबा च्योकराङ खित्कान्तेताङ नोमुङ ढाँर मिक्किकान्ते ईन। थेकी सुङलाङ काका पाका मिक्किता खाला न्याय खित्च्येते थेमे लडाइँ खित्च्येते खित्च्याक्वा। 12 थेते मिक मे च्येला च्योकराङ टल्के खित्च्येतेन्दे ओतान। थेमे थेकी आउदी काल्बेई श्रीपेज खोन्दा ओतान। थेते टालाला मिनज्यीक टिबा ओतान। थे मिन च्यि ईन्दे सिन थे खोरोङलाकामा छ्या ओतान। 13 थेकी खोन्दाते खोलाकचेन ठागी नाङ न्वाबाते च्योक ठाकराङ ठागी म्वाबाज्यीक ओतान। थे खोलाक खोन्कान्ते मिनचेन परमेश्वर बात सिरच्याक्वा। 14 थेमे स्वर्गने ओताते फौजतेबाङ ओमे थोपो च्योकराङ कार्मुज्यीक आउदी लेमुते कार्मुते खोलाक खोन्गीन कार्मुतेन्दे घोडाला जेकीन थे तिरी तिरी ख्याम्बा ओतान। 15 थे गोमे घोडा कार्मुते लाक जेबा ओताते खानामेकीचेन लुङबा लुङबे मिला थुपाला आउदी नोम्बोई तरवार थेन्दा ओतान। लुङबा लुङबे मिला आउदी कडा खाला राज्य खित्कान्ते थेराङ ईन। रस छिराला कोलदु लुक्पाते अंगूरला काम्बेकी फाच्यार फुच्युर ङेन्दा च्योकराङ खाला गाङे भन्दा छ्येज्यीक शक्ति ओताते परमेश्वरगी स्येदाङगी चूर गाल्ला तेरच्येते सजाय तेरकान्ते थेराङ ईन। 16 थेकी खोन्दाते खोलाकताङ थे फाल्काला “गेल्बोओनतेङ गेल्बो थेमे गाङे छ्येतेबेतेङ छ्येते” सिन मिन टिबा ओतान। 17 थेमे दि तिरी ङे ङीमे नाङ लाकीन देताते परमेश्वर दूतज्यीकला थोङसुङ। थे दूतकी नामगी चेनापा फुरकान्ते छ्योज्युङमा गाङेला कस्स्ये खाला छेरा खिन “लो ख्योकोन गाङेराङ परमेश्वरगी ठीक खाबाते छ्येज्यीक भोज साप्ला रूला स्योक। 18 लो स्योक, था ख्योकोनगी गेल्बोओन, मिल्टेरी क्याप्टेनओन, छ्येते मिओन, घोडा थेमे घोडे लाक जेक्कान्ते मिओन, योक्पो योङमु थेमे ज्येनोङ छ्ये टेक्टे मि गाङे स्या सा ङेत्क्यो,” सिन कातोङगीन ओतान। 19 दि तिरी ङे थे जन्तुताङ दि सा लुङबे गेल्बोओन खोपरोङ खोपरोङ मिल्टेरी टीकीन थे घोडा कार्मुते लाक जेक्कान्ते थेमे थे फौजताङ लडाइँ खिताला जम्मा ओङाते थोङसुङ। 20 तर थे जन्तुताङ थे छ्य्वापेकी आउदी अचम्बतेन्दे काम खाला तेन्कान्ते जन्तु ङिकारला जुम्गीन ठासुङ। थे ज्येनते जन्तुचेन डुगी सिर च्युताते बात खित्कान्ते ईन। अचम्बतेन्दे काम खाईनराङ थे जन्तुकी थे गोमे जन्तु मिनगी छाप देक ज्युत्कान्ते मिओनताङ थे मूर्तिला माने खित्कान्तेबाला छक्के खाबा ओतान। जुम्गीन ठानामेई थेबा ङिकारला सोम्बोराङ गन्धकताङ मे बाराते ज्यीबा लाङच्याज्यीक मे धुनीमा क्युरसुङ। 21 थेमे थेरू बाँकी देताते जति ज्येन गाङेलाचेन थे घोडा कार्मुते लाक जेबाते खानामेकी थेन्दाते तरवारगी तुप्कीन सेत्सुङ। दोक ओङगीन सिन्नामेई छ्योज्युङमा गाङेकी डाडासाक थेबे स्या सोसुङ। |
© 1992 Wycliffe Bible Translators Inc. All rights reserved.
Wycliffe Bible Translators, Inc.